PSALMS 7 - Navajo Bible

T'áá ákogi ájít'éego há hadoodzihgo há sohodizin

¹ Bóhólníihii shiDiyin God nílíinii, ni naa jííníshłí; bik'ee neeshchéełii t'áá ałtso bits'ą́ąjį' yisdáshíłteeh,

² éí doodaii' shíká adoolwołígíí ádingo náshdóítsoh bitsiijį' daditł'ooígíí nahalingo nidashidiyoołdlał.

³ Bóhólníihii shiDiyin God nílíinii, díí baa niséyáago, shíla' bee doo ákwii át'éii áát'įįdgo,

⁴ áádóó shich'į' k'énídzinii doo yá'át'éehii bich'į' naníláago, doodaii' t'áadoo biniinaanígóó shi'ana'í nilíinii bigha'ayéshnilgo,

⁵ bíni'dii shélyeedgo shił dah dii'aash; bee hinishnánígíí bíni' yik'i naaghá, áádóó bee ił nishłíinii ni'jį' kwíílééh. Síilah.

⁶ Bóhólníihii nílíinii, náháchį'go díldzííł; shida'ana'í ádéédahooldzídígíí bich'į' nídiibááh; aa nídíít'įįłgo bee nihwííní'áanii ákwii shá díldzííł.

⁷ Áko diné áłah nilínígíí ninaagóó ahénál'áa doo, áádóó wót'áahdi bá dah sínídáhídi dah nánídaah.

⁸ Bóhólníihii éí ał'ąą dine'é t'áá ałtso yeinít'į́; Bóhólníihii nílíinii, t'áá ákogi ááshníłígíí bik'ehgo índa doo shina'adlo'ígíí bik'ehgo shaa nánít'įįh.

⁹ Diné doo yá'ádaashóonii yaa nidaakaígíí ninít'i' le', nidi diné t'áá ákogi ádaat'éii hasht'e'síníłnil; jó, Diyin God t'áá ákogi át'éii nilíinii éí diné íinízinii índa bijéí haisííd.

¹⁰ Shich'ą́ą́h nahale'ii éí Diyin God; éí t'áá aaníí góne' át'éii yisdáyiiłteeh.

¹¹ Diyin God éí t'áá ákogi át'éego ainít'į́, áádóó Diyin God t'áá ákwíí jį́ bąąhági ádajooníiłii yich'į' báháchį'.

¹² Doo łahgo át'éego tsínídazdikeesgóó bidiltłish háídiyook'ash; azdoołkah biniyé be'ełtį́į́' yideests'ǫ́ǫ́d;

¹³ bik'ee anoonéełii ałdó' t'áá áłdįįdgo áyiilaa; diné atída'ał'íinii bik'ijį' bik'a' bik'e'íyée'go áyósin.

¹⁴ Jó, diné doo yá'áshóonii éí ádílááh yéé'niiltsąąhgo doo ákwii át'éii béédii'nahgo wooch'ííd niyiiłchííh.

¹⁵ Hahwiiniłgo ahoodzą́ągo áyiił'įįh, áádóó hahwiiznil góyaa iitłish.

¹⁶ Be'ádílááh t'áá bí bik'ijį' nídoodleeł, áádóó yee até'éł'ínígíí t'áá bí bitsii'káa'jį' nídoodleeł.

¹⁷ Bóhólníihii t'áá ákogi át'éhígíí bik'ehgo bich'į' ahééh nisin doo, áádóó Bóhólníihii Aláahgo Ayóó'át'éii bízhi' baa hashniihgo hashtaał doo.