Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

PSALMS 68 - Navajo Bible


Diyin God éí Dził Sáínai áádóó diyingo haz'ą́ągi hólóonii

1 Háni'dii Diyin God dildzííł! Háni'dii bi'ana'í danilíinii tabidi'nooskaad! Háni'dii bik'ee dadiniihii bits'ą́ąjį' yóó'iijeeh!

2 Łid bił yóó'iiyołígi át'éego yóó'abí'dísooł! Ak'ah konibąąhgóó diłhįhígi át'éego Diyin God binááł háni'dii diné doo yá'ádaashóonii ádabi'dildįįh!

3 Nidi bíni'dii t'áá ákogi ádaat'éii bił dahózhǫ́! Bíni'dii Diyin God binááł bił nidahoozhǫǫh! T'áá aaníí, t'áá íiyisí bił nidahoozhǫǫh le'!

4 Diyin God bich'į' dahohtaał; bízhi' baa dahohniihgo dahohtaał! Éí yót'ááh hiníláii yikáá' náhodididleehii yéego bich'į' dahohtaał! Bízhi' éí Jiihóvah wolyé, éí bidááhdóó nihił nidahoozhǫǫh le'!

5 Diyin God éí áłchíní bizhé'é ádaadinii yiTaa' nilį́ áádóó hodiyingo kééhat'į́įgi asdzání bąąh ádahasdįįdii yá ánihwii'aahii nilį́.

6 T'áá bita'ígóó naagháii bighan hólǫ́ǫ doogo Diyin God baidiyii'aah. Awáalyaa naazhjé'ígíí ch'íyii'éésh. Nidi nidaalteehii t'éiyá kéyah dahóółtseiigi kéédahat'į́.

7 Diyin God nílíinii, nidine'é bilą́ąjį' dah diniyáago honoojíí góne' bá ch'íhwííníle'. Síilah.

8 Áko ni' nahaas'náá', Diyin God hólóonii binááł, wót'ááhdę́ę́' t'áá íiyisí nahóółtą́, Ízrel biDiyin God nilíinii binááł Dził Sáínai nahaas'náá'.

9 Diyin God nílíinii, nik'ehgo t'óó ahayóí nahóółtą́. Nidine'é kéyah bíí' dooleełígíí nídínéesdzáago hasht'éinidlaa.

10 Ákwii nidine'é kéédahat'į́į́ nít'éé'. Diyin God nílíinii, baa dahojoobá'íii nidi jiiníba'ígíí binahjį' baa áhosínílyąąd.

11 Bóhólníihii haadzíí'. Sáanii t'óó ahayóí dahalne'go kódaaní,

12 Ana'í dah deínéehii éí aláahgo bindanit'a'í t'áá bił yóó'adahinichééh! Hooghandi asdzání nidaazdáhígíí éí ana'í binaalye'é daasnáanii nideiniih.

13 Dibé naazhjéé' bitahgóó danohjahgo hasbídí bit'a' béésh łigaii bik'ésti' nahalinígíí, áádóó bits'os nineezígíí éí óola łitsoii bik' ésti' nahalinígíí nidahonohłin.

14 Aláahgo Ayóó'ábóodziilii éí aláahgo naat'áanii danilíinii yik'eh deesdlį́į́'dóó tainooskaadgo yas nahalingo Dził Zálman bąąh yígai.

15 Diyin God bidził ła' Béíshan wolyé; Béíshan éí dził deelzhaaígi át'é.

16 Dził dah dahats'osii nohłíinii, ha'át'íísh biniyé dziłghą́ą'gi Bóhólníihii kééhasht'į́į doo nízingi deinołch'į́į́d? T'áá aaníí, ákwe'é Bóhólníihii hool'áágóó kééhat'į́į dooleeł!

17 Tsindaabąąs bijáád naakiígíí yee dah deínéehii éí diyingo naal'a'í naadiindi mííl, áádóó míildi ałk'i náámíilgo ánéelą́ą́'. Dził Sáínaigi Bóhólníihii diyingo hólónígi át'éego éí bitahgi hólǫ́.

18 Aghánáhóó'áajį' hahosíníle'. Yisnááh t'áadoo bee néelą́'ígóó hashíní'eezh. Áádóó ákwii Bóhólníihii kééhat'į́į doo biniyé diné bitahgi aa deet'áanii naa dayiiznil; nidaalteehii nidi bitahgi ałdó' naa da'iiznil.

19 Bóhólníihii éí t'áá ákwíí jį́ nihiyéél nihá yooyéełii, t'áá éí Diyin God yisdánihiiníiłii baa ha'niih. Síilah.

20 NihiDiyin God éí bee yisdá'iildéehii nilį́. Áádóó Bóhólníihii Diyin God éí anoonééł bik'ee'ąą hodeezt'i'ii nilį́.

21 Nidi Diyin God éí bi'ana'í danilíinii dabitsiits'iin yidoołjish. Bitsii' t'óó ahayóii ádaa ha'niihii ádihodiilt'i'go naagháii bitsiits'iin yidoołjish.

22 Bóhólníihii ání, Éí Béíshandę́ę́' nídeesh'ish; tónteel tá łtł'ááhdę́ę́' hahideeshnił.

23 Áko ni'ana'í bidił bii'góó ch'ídíínááł, áádóó nilééchąą'í éí da'doołch'ał.

24 Diyin God nílíinii, hodílzingo ná da'ínéehii dayoo'į́. ShiDiyin God aláahgo shinanit'a'í, hodiyingo haz'ání bii'jį' bá da'ínéehii dayoo'į́.

25 Dahataa łígíí alą́ąjį' yikah. Akéédę́ę́' bibee na'a'néhí sin yee nidaanéhígíí yikah. Bita' góne' éí ch'ikéí ásaa' daagádígíí yee nidaanéego yikah.

26 Diné t'óó ahayóí áłah danilį́įgi Diyin God baa dahohniih. Nihí Ízrel bits'ą́ą́dóó dahosoolį́į'ii, Bóhólníihii baa dahohniih.

27 Bénjamin lą́ą, akéédę́ę́' naagháhígíí éí alą́ąjį' oo'ish; Júdah dine'é yá aląąjį' naazíinii yił yinéełii bił, áádóó Zébyulan dine'é yá aląąjį' naazíinii, Náftalai dine'é yá aląąjį' naazíinii ałdó' akéé' yinééł.

28 Ayóó ánóodziil doogo niDiyin God ná haadzíí'. Diyin God nílíinii, nihá binishínílnishii niłdzilgo ánílééh.

29 Jerúsalem kin haal'áagi nikin bii' sohodizin si'ánígíí hoł danilį́įgo aláahgo naat'áanii dajílíinii aa yílyáii naa dajiiníił doo.

30 Lók'aa'tahgóó naaldlooshii ałchinii áádóó dóola índa diné bibéégashii yáázh deíl'áhígíí nidahojílinii nidahodíteehgo béésh łigaii baa dajidlee'go naa dahizhdoojih. Anaa' baa bił nidahoozhǫǫhii tanoołkaad.

31 Ííjip kéyahdę́ę́' naat'áanii danilíinii ch'ídookah; Iithiyópiya dine'é tsxį́įłgo Diyin God yich'į' k'ídidoolchiłgo náyookąąh doo.

32 Ał'ąą dine'é nihił dah nahaz'ą́ą́dę́ę́' Diyin God bich'į' dahohtaał; Bóhólníihii baa dahohniihgo dahohtaał. Síilah.

33 T'áá shiidą́ą'dii yót'áahdi hiníláii yikáá' náhodididleehii bich'į' dahohtaał. Jó'akon, hahadziihgo biinéé' ayóó íits'a'.

34 Diyin God bidziil dadohníigo baa dahohniih. Aláahgo yee ayóó át'éii yee Ízrel yaa áhályą́ áádóó bidziilígíí éí wót'áahdi hólǫ́.

35 Diyin God nílíinii, nikin bii' sohodizin góne' ayóó át'éego nits'ąą hasti'go ni'dólzin. Ízrel biDiyin God éí bidine'é dziil áádóó bibee adziilii yeidii'aah. Diyin God baa dahohniih!

Navajo Bible © 2000 American Bible Society. All rights reserved. 

Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).

American Bible Society
ကြှနျုပျတို့နောကျလိုကျပါ:



ကြော်ငြာတွေ