PSALMS 65 - Navajo Bible

Iiná bee yá'át'éehii lą'í Diyin God bee baa ha'niih

¹ Diyin God nílíinii, Záíyandi naa haniihii hólǫ́. Áádóó nich'į' bee ádee ha'oodzí'ígíí éí bihodoolnííł.

² Sodizin yidiits'a'ii nílíinii, diné t'áá ałtso naa hakááh.

³ Doo ákwii ádaat'éii shide ánát'įįh. Bee haz'áanii dahiitíhígíí éí nihits'ánídidíí'áałgo nihá yóó'adidíí'ááł.

⁴ Nídiniłtíinii nikin bił haz'ání góne' kééhat'į́į doo biniyé t'áá áháníjį' níínílóozii éí bik'ihojidlí. Nikin, t'áá éí nikin bii' sohodizin hodiyin haz'ą́ą́dóó yá'ádaat'éehii dahólónígíí bee hwiih daniidlį́į doo.

⁵ T'áá ákogi ááníiłgo ayóó át'é ádahooníłígíí bee nihich'į' ééhodíísįįł, Diyin God bee yisdáhiikáahii, nahasdzáán nidahonees'ą́ąjį' índa tónteel nidahonees'ą́ąjį' diné bá ił chohoo'íinii nílį́.

⁶ Ni lą́ą adziil bee áká sínílzaazii, nidziil bee dził nidasínínil.

⁷ Tónteel dadiits'a'ígíí, áádóó tónteel deílk'oołgo dadiits'a'ígíí, índa dadine'é hadahas'áhígíí hasht'éédííłt'eeł.

⁸ Ákohgo nahasdzáán nidanees'ą́ąjį' kéédahat'íinii nits'ą́ą́dę́ę́' bee éédahózinii yéédaaldzid. Ha'ii'aah áádóó i'ii'aah bił nihoozhǫǫhgo íínísin.

⁹ Diyin God bitooh hadeezbingo ch'ínílį́įgo bee nahasdzáán nínáníłtłohgo bikáá' nida'nt'ą'go ánáádlííł. Éí hasht'einilaago nihokáá' dine'é bá álástsii' hólǫ́ǫgo íínísin.

¹⁰ Nahałtingo tó daneets'ee'ígóó tó lą'í danílį́įgo íínísin. Tó neets'ee'ígóó náhodííłkǫǫłgo ni' hoolzhólí ánáhóódlííł, índa nanise' nooséełgo bik'ijiinídlí.

¹¹ Nináháháahjį' áda'azįįd bee bik'ijiinídlí. T'áá nahóle'góó bee ak'ijiinídlíhígíí bee áda'azįįd.

¹² Honoojíidi dahootsogóó nidi bee áda'azįįd. Áádóó dah daask'idígíí bił nidahoozhǫǫh.

¹³ Dahootsogóó dibé deíl'á. Deíldzisgóó bílástsii' dahólóonii deíl'á. Dahootsoígíí índa deíldzisígíí nídididla'go bił dahózhǫ́ǫgo dahataał.