PSALMS 61 - Navajo Bible

Diyin God nihich'ą́ą́h hólónígíí bee baa dadzííníidlí

¹ Diyin God nílíinii, nánooshkąąhígíí diits'į́į́h. Shisodizin yíníłts'ą́ą́'.

² Shąąh nahaka'go ni' nihoneel'ą́ą́dę́ę́' nich'į' sodideeszįįł. Tsé shilááh áníłtsoii baa shinílóós.

³ Háálá nine' nehésdzíí' áádóó ana'í bits'ąą kin niłdzilgo yaa'áii shá nílį́.

⁴ Niníbaal bii' hodílzinii hool'áágóó bii' kééhasht'į́į doo. Nit'a' biyaagi doo shihodééłníígóó naa jííníshłíi doo. Síilah.

⁵ Háálá, Diyin God nílíinii, bee ádee hadeesdzíi'ii shá disíníts'ą́ą́'. Nízhi' deidísinii bíí' dadooleełígi át'éii shaa dííní'ą́.

⁶ Aláahgo naat'áanii nízaadgóó hináago bá ánílééh. Náás da'íchíhígi át'éego hináago bá ánílééh!

⁷ Diyin God bidááhdóó hool'áágóó hojílǫ́ǫgo ahool'áa doo. Aa a'ááh hasinii áádóó t'áá aaníinii haa áhályą́ą doo biniyé hasht'ehólééh!

⁸ Áko t'áá ákwíí jį́ ádee hahidisdziihígíí be'esh'į́įgo hool'áágóó nízhi' baa hashniihgo hashtaał doo.