PSALMS 60 - Navajo Bible

Ana'í bits'ą́ąjį' nihíká i'doolwołgi bíká sohodizin

¹ Diyin God nílíinii, doo nihininizį́į́'góó áádóó tanihinííníłkaadgo nihich'į' náhóóchįįd nít'éé'; k'ad éí ách'į' ninánihí'nííł.

² Ni' naha'náago íinilaa. Ni' nehedlaadgo íinilaa. Ákǫ́ǫ́ ałch'į' áńdahódlééh, háálá ni' hoditłid.

³ Bik'eda'íyée'ii bik'ee nidine'é ti'dahooníihgo íinilaa. Wáin deiidlą́ągo bik'ee nida'niit'igo ánihiinilaa.

⁴ T'áá aaníinii níl'į́į doo biniyé dandísinii dah na'at'a'í baa dííní'ą́. Síilah.

⁵ Shich'į' ééhonísįįh! Ayóó'ííní'níinii yisdádooltééł biniyé nigaan nish'náájí bee shíká anilyeed.

⁶ Diyin God diyinii nilį́įgo díí yee haadzíí': Baa shił hózhǫ́ǫgo Shííkem ahádeesoh, áádóó Sákath honíteel bídí'néesh'ąął.

⁷ Gíliyad éí shí; Manáseh éí shí; Íífreiyim éí shibéésh ch'ah át'é. Júdah éí bee haz'áanii ííł'íní shá nilį́.

⁸ Mó'ab éí shibii' tá'ádísgisí át'é. Íídam bikáa'jį' shikee' ahideeshxą́ą́ł. Filístiya dine'é danohłíinii, nihik'eh díshdlį́į'go yéego hadadołgháásh.

⁹ Bohoníłdzilgo kin haal'áajį' háishą' shił doo'ash? Íídamgóoshą' háí shił doo'ash?

¹⁰ Diyin God nílíinii, doósh nahjį' ninihidííní'ą́ą da? Diyin God nílíinii, nihisiláo dah yinéełii t'áadoo bił yínínáa da.

¹¹ Nihi'ana'í bich'į' nihíká anánílwo', háálá diné t'éiyá áká iilwo'go t'áadoo nádleehí da.

¹² Diyin God biłgo doo nídaniilyées da doo, háálá bí nihi'ana'í nihá yik'i nidoogaał.