PSALMS 45 - Navajo Bible

Aláahgo naat'áanii iiyehjí sin

¹ Shijéí bee yá'át'éehii baa hodeeshnihii wó'ą́ą́lį́; bee hahasdziihii aláahgo naat'áanii bee bił hashne'; shitsoo' éí yiyiichįįhgo ak'e'ałchíii nahalin.

² Diné ba'áłchíní danilíinii bitahdóó ni aláahgo naa dzólní; jiiníba'go t'éiyá yáníłti'; éí bąą Diyin God hool'áágóó nik'ijisdli'.

³ Aláahgo naat'áanii ayóó ábóodziilii nílíinii, nits'ádi'nílídígíí áádóó ayóó ánít'éhígíí bee hadínéehgo nidiltłish nąąh ní'áago ánílééh.

⁴ Aláahgo naat'áanii ayóó át'éii nílį́įgo ak'eh dídlį́įgo łį́į́' nił yildloshgo t'áá aaníinii áádóó aa a'ááh hasinii índa t'áá ákogi át'éii bich'ą́ą́h nahóle'. Níla' nish'náájíígíí t'óó bik'ee tsízdólyésígi ádaat'éii yee naninitin doo.

⁵ Nik'a' dadeeníigo aláahgo naat'áanii bi'ana'í dabijéí baa ahilyeed, áko ał'ąą dine'é niyaajį' naa'ahinidééh.

⁶ Diyin God nílíinii, bikáá'dóó nahó'áii bikáá'dóó hóó'áałgo hool'áágóó ahóyéel'á. Bee nóhólníihgo bił haz'áanii biyi' naat'á gish éí ts'ídá t'áá ákogi át'éii át'é.

⁷ T'áá ákogi át'éii ayóó'ííní'ní, índa doo yá'áshóonii éí jiiníłá. Éí bąą Diyin God, niDiyin God nilíinii ak'ah nik'i yayiiziidgo bił da'ahíínítą'ii biláahgo át'éego nił hózhǫ́ǫgo ániilaa.

⁸ Mir áádóó álooz índa káshiya daolyéii łikání dahalchinígíí ni'éé' bąąh dahalchin; aláahgo naat'áanii bikin góne' áívori bee naashch'ąą'ii ákóne' tsin bąąh tł'óół daneelzhee'ígíí dadiits'a'go nił hóóshǫǫd.

⁹ Asdzání nił danilíinii bitahgi aláahgo naat'áanii danilíinii dabitsi'ké ła' naazį́: asdzą́ą́ naat'ááh éí Ófer kéyahdę́ę́' óola bee éé' disǫsii ályaaígíí yee hadít'éego ninish'náájí sizį́.

¹⁰ Ch'ikę́ę́h nílíinii, shich'į' dah díníit'aahgo nitsíníkeesgo shíísíníłts'ą́ą́'. Nidine'é áádóó nizhé'é bighandóóígíí baa yoonééh.

¹¹ Áko aláahgo naat'áanii ayóó áníínílninígíí yidánoolníi doo. NiBóhólníihii nilínígíí bąą bich'į' hodíínísin.

¹² Táir hoolyéii bich'é'é, t'áá éí agháago da'at'íinii nihich'ozhdooniił danízingo deit'íinii naa deidiyoonił.

¹³ Aláahgo naat'áanii bitsi' bighan góne' ayóó ánóolningo óola yishbizhgo éé' ályaii yee hadít'é.

¹⁴ Éé' naashch'ąą'ii yee hadít'éego aláahgo naat'áanii baa doodlóós. Ch'ikéí t'ah doo diné bee dahaleehii yił ałchodaa'néego bikéé' tádíkáhígíí nił yah adoot'ish.

¹⁵ Baa hózhǫ́ǫgo áádóó baa ił nihoozhǫǫhgo bi'doot'ish doo. Aláahgo naat'áanii bighan góne' yah adookah.

¹⁶ Danizhé'é naazį́į́ nít'éé' yę́ęgi niye'ké naazį́į dooleeł; nahasdzáán t'áá náhwiiz'ą́ą́ nít'éé' bikáá'góó naat'áanii danilį́įgo ádadííliił.

¹⁷ Náás da'ahideeshchíinii t'áá ałtso bitahgóó nízhi' bééhániihgo ádeeshłííł. Éí bąą hool'áágóó ahóyéel'áágóó diné naa dahaniih doo.