Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

PSALMS 44 - Navajo Bible


Yisdá'ooldee' áádóó k'ad ach'į' nahwii'náanii

1 Diyin God nílíinii, t'áá nihí dasidiits'ą́ą́', éí danihizhé'é bídayéełkaah yę́ędą́ą́' baa nisíníyáhígíí yee nihił dahoolne'.

2 T'áá ni ał'ąą dine'é kéyah bii'dóó hahinííníłkaad. Áko índa tsin k'izhdííláhígíí nahalingo ákwii nihwíínínil. Ał'ąą dine'é éí bich'į' nidahoyíníłnáá' índa nidine'é k'ee'ąą noot'į́įłgo íinilaa.

3 Jó, t'áá bí bidiltłish yee doo kéyah dayoosbą́ą da áádóó doo t'áá bí bigaan yee yisdáákai da. Nidi nigaan nish'náájí áádóó t'áá ni nidziilígíí índa ninii' bits'ádi'nílídígíí bee íínít'įįd. Háálá bich'oniníigo ánít'į́.

4 Ni lą́ą, aláahgo shinanit'a'í nílį́, shiDiyin God nílíinii. Jéíkab dine'é yisdádookah, diníigo bá hahídziih.

5 Ninahjį' nihi'ana'í ni'jį' naa'adahoyii'nííł. Anaa' danihił'íinii nízhi' binahjį' bik'i nideiikai.

6 Háálá shi'ałtį́į́' doo ba'ííníshłíi da índa shidiltłish doo bee deesdzih da.

7 Nidi nihi'ana'í danilíinii bits'ą́ąjį' yisdánihíínínil áádóó nihik'ee dadiniihii t'óó baa yáhásinígi íinilaa.

8 Diyin God éí t'áá áłahjį' baa dadzííníidlíigo baa dahwii'niih áádóó hool'áágóó nízhi' baa dahwii'niih doo. Síilah.

9 Nidi nahjį' kónihiinilaa áádóó doo da'niidlį́į́góó ánihiinilaa, áko nihisiláo t'áadoo bił nisíníbaa' da.

10 Ana'í t'áá bich'į'dóó naníshiijée'go ánihiinilaa. Áádóó danihijoołxáii éí nihinaalye'é yę́ę áłah ádayiilaa.

11 Atsį' biniyé dibé nidadootsiłii nidahoniidlingo ánihiinilaa. Índa ał'ąą dine'é bitahgóó tanihiníníłkaad.

12 Nidine'é niidlíinii t'įįhdígo nihą́ą́h da'ílį́įgo nanihiyíníłnii', áádóó doo lą'í nihą́ą́h ni'iizlį́į' da.

13 Bił kéédahwiit'íinii bich'į'go bá nahat'i'ii ánihiinilaa. Nihinaagóó kéédahat'íinii nihá nidahałt' i'go índa t'óó nihaa daadlohgo íinilaa.

14 Ał'ąą dine'é bitahgóó t'óó nihee niyá'ádahodilti'go áádóó nihich'į' bitsii' deiłmazgo íinilaa.

15 T'áá áłahjį' doo ił nishłį́į da, áádóó t'óó ádaa yánísdzin shide ádzaa.

16 Háálá shá nidahałt'i'go saad shich'į' adayiiníiłgo dashódziih áádóó ana'í índa k'éédidoo'níiłii biniinaa t'óó ádaa yániisdzį́į́'.

17 Díí t'áá ałtso nihik'ijį' dahéełdas daazlį́į́', nidi doo naa deisii'nah da; nihił aha'díínít'ánígíí t'áadoo doo ákǫ́ǫ́ ádeiilyaa da.

18 Nihijéí biyi'di doo t'ą́ą́' áńdeiidzaa da, índa nik'ehgo áhoot'éii doo bits'áhaakai da,

19 azhą́ mą'ii bitahdi nanihidiníyiish nidi, áádóó anoonééł bichaha'oh nihik'iiniłdoh nidi, t'áadoo kódeiidzaa da.

20 NihiDiyin God bízhi' baa deisii'nahgo, doodaii' diyin dabidi'níinii bich'į' dah dadiilnii'go,

21 da' doósh éí Diyin God bił bééhodoozįįł da? Jó, bí ajéí biyi'di nidanil'inii bił bééhózin?

22 T'áá aaníí, niniinaa shá bíighah nanihi'ditseed; dibé nidootsiłii nidahoniidlingo nihaa nitsáhákees.

23 Bóhólníihii nílíinii, ch'éénídzííd! Ha'át'íísh bąą íłhosh? Nídiidááh! Hool'áágóó nahjį' kónihóólééh lágo!

24 Ha'át'íísh bąą nihits'ąą na'ádiníl'in áádóó bee atídanihi'dil'íinii índa bee nihide ádahólzinii baa náyoo'nah?

25 Háálá nihii' naazíinii ni'jį' yaa dadínéest'ą́. Índa ni'jį' nihídazhdiiłjéé' nidahoniidlin dasiidlį́į́'.

26 Díldzíiłgo nihíká anilyeed! Aa a'ááh nínízinii binahjį' nihik'é niná'nídléego yisdánihínííł.

Navajo Bible © 2000 American Bible Society. All rights reserved. 

Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).

American Bible Society
ကြှနျုပျတို့နောကျလိုကျပါ:



ကြော်ငြာတွေ