PSALMS 38 - Navajo Bible

Ti'hooníihii ádił oodzíí' yąąh bíni'ii bisodizin

¹ Bóhólníihii nílíinii, náháchį'go t'áadoo nashidíteehí, t'áá íiyisí doo nił hózhǫ́ǫ́góó t'áadoo hashkée nashinítiní!

² Háálá nik'a' shaa adaazhjil, áádóó yéego shik'i dinilchid.

³ Doo nił hóózhǫǫdígíí biniinaa shitah nahastseed; sha'át'e' biniinaa shits'in dadiniih.

⁴ Háálá doo ákwii áát'įįdii shik'i diilkǫ'; hééł nahalingo shide áníłdáás.

⁵ Doo áháshyánígíí biniinaa tídááná yę́ęgóó dííłdzidgo daniłchxon.

⁶ Shich'į' nahwii'náago shá bíighah yínííł nishłį́įgo yéego bik'ee naashyiish.

⁷ Shiníí'dóó yaago kǫ' hózhdínił nahalingo shitah nahastseed.

⁸ Ho'dishjizhígíí nahalingo shitah doo hwiináa da silį́į́'. Ayóo shijéí yidíłniihígíí bik'ee dish'ní.

⁹ Bóhólníihii, bídin nishłíinii t'áá ałtso nił bééhózin; dish'nínígíí doo nits'ąą nees'į́į' da.

¹⁰ Shijéí nitsináltłi'; shąąh nááháka'go shiná'oh náhoojį́į́h.

¹¹ Bee shąąh dahoo'a'ígíí biniinaa dashich'ooní índa bił naashdeeh yę́ę doo shinádadízin da, shik'éí danilíinii t'áá níléí shits'áhwiiní'ą́ądi nidaakai.

¹² Dahodiyiilyééł dashó'níinii shá nináda'a'nił. Atídashidoolíiłii doo yá'át'ééhgóó shindahagizgo shida'doolohígíí shá bíighah yaa nitsídaakees.

¹³ Nidi shí diné bijééhkałii nahalingo doo adiists'a' da. Diné doo yáłti'ii nahonishłin.

¹⁴ T'áá aaníí, diné bijééhkałii nahonishłingo t'áadoo bee haosdziihí da.

¹⁵ Bóhólníihii nílíinii, ni t'éí níká shił chohoo'į́; ni lą́ą, Bóhólníihii shiDiyin God nílíinii, ni éí shich'į' ééhodíísįįł.

¹⁶ Háálá ándííniid, Ałtánídiisghasgo shee ádaa daha'niihii t'áadoo shaa bił dahózhóní.

¹⁷ Jó, k'adę́ę naa'iishtłíísh áádóó t'áá áłahjį' shił hodiniihgo yínííł naashá.

¹⁸ Doo ákwii áát'įįdii bee ádaa hashne' áádóó ádił ni'iisdzíihgo bąąh shíni'.

¹⁹ Shi'ana'í danilíinii dabiinéigo ayóó ádabóodziil, áádóó éí t'áadoo biniinaanígóó shik'ee dadiniihii t'óó ahayóí.

²⁰ Áádóó ałdó' yá'át'éehii bidiníná doo yá'áshóonii shaa nídayii'níiłii éí shi'ana'í danilį́, háálá yá'át'éehii bik'ehgo yishááł.

²¹ Bóhólníihii nílíinii, yóó'ashidóó'ááł yíila'! ShiDiyin God nílíinii, t'áadoo shits'áhwiiní'ą́ądi honílóní!

²² Bóhólníihii yisdáshíłtéehii, tsį́įłgo shíká anilyeed!