PSALMS 36 - Navajo BibleDiyin God hool'áágóó aa a'ááh nízinii 1 Diné doo yá'áshóonii éí bee haz'áanii hitíhígíí bijéí biyi' bich'į' yáłti'; éí diné binááł Diyin God doo yidísin da. 2 Doo ákwii áát'įįdii bik'ee hodi'niihgo bééhoozinjį' ádąąh haldéehgo saałką́ą́' yee bina'adlo'. 3 Saad doo ákwii át'éii índa na'adlo' yee yáłti', doo áhoosyąąd da, índa yá'át'éehii doo áyóle' át'ée da silį́į́'. 4 Bitsásk'eh yikáá' sitį́įgo bee ádíláahgo ádooníłígíí yinaha'á; doo yá'át'ééhgóó áhoot'éii yee niiltih; doo yá'áshóonii doo yijoołáa da. 5 Bóhólníihii nílíinii, aa a'ááh nínízinii yá'ąąshdi hólǫ́; na'ahódlíhígíí éí k'os bíneel'ą́. 6 T'áá ákogi ánít'éhígíí dził ayóó ádaat'éii nidahalin; bee ánihoyí'aahii tónteel ayóó íídéetą́'ígíí nidahalin; Bóhólníihii nílíinii, ni éí diné índa naaldlooshii baa áhólyą́. 7 Diyin God nílíinii, dooládó' aa a'ááh nínízinígíí ílį́į da! Éí bąą dine'é danilíinii nit'a' biyaagi chaha'ohjį' adahinichééh. 8 Nikindóó bee áda'azįįdii yee hwiih dadooleeł, áádóó nibee ił hózhóonii tooh nahalingo na'áłchíní baa hidí'aahgo deidlą́. 9 Háálá tó bee iináago háálíinii nee hólǫ́; adííníłdíingi adinídíingo deiit'į́. 10 Néédahósinígíí baa a'ááh nínízingo áánííł, áádóó diné bijéí yee t'áá ákogi át'éii bich'į' t'áá ákogi áánííł. 11 T'ááká diné ádaa ha'niihii ła' shik'i naoya' yíila', índa t'ááká diné doo yá'áshóonii ła' yóó'ashinóyóód yíila'. 12 Ákwii lą́ą doo ákwii ádaaníiłii tsé'yaa aheestł'íidgo tsé'yaa ahineezdee', áko doo náádoojeeh át'ée da. |
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
American Bible Society