PSALMS 31 - Navajo Bible

Diyin God baa hodzódlíigo ha'iidziihii

¹ Bóhólníihii nílíinii, niniit'a náníshchééh; ts'ídá t'ááká t' óó baa yáhásinígi áshi'dólnééh yíila'; t'áá ákogi ánít'éhígíí binahjį' yisdáshíłteeh!

² Shich'į' dah díníit'aahgo shidiits'į́į́h, tsį́įłgo yisdáshíłteeh! Tsé bine' na'adzi'ii bidziilii shá nílį́į le', bine' adziihii shá nílį́į le'!

³ Háálá tsé índa bine' na'adzi'ii shá nílį́; éí bąą nízhi' binahjį' shíílóós áádóó shá hwííní'į́;

⁴ t'áá nahont'inee shiniyé łoh niit'áanii biyi'dę́ę́' hááshíłteeh, háálá niniit'a hinishchéehii nílį́įgo ni t'éí nee shidziil.

⁵ Níłch'i shii' sizíinii nílák'e dish'aah; Bóhólníihii Diyin God t'áá aaníinii nílíinii, shik'éniná'íínídlá.

⁶ T'áadoo biniyéhígóó eda'alyaii yich'į' nidahałáii jooshłá, nidi Bóhólníihii baa jííníshłí.

⁷ Aa a'ááh nínízinii baa shił hózhǫ́ áádóó baa shił nihoozhǫǫh doo, háálá bik'ee ti'hoosh'níihii yiniłtsą́ągo shii' sizíinii bich'į' nahwii'náanii nił bééhózin,

⁸ áádóó shi'ana'í danilíinii t'áadoo bílák'ee shidííní'ą́ą da; hóteelgi nishidííníł'eezgo sézį́įgo áshiinilaa.

⁹ Bóhólníihii nílíinii, shaa jiiníbaah, háálá shich'į' nahwii'ná; yínííł bik'ee shináá' nídínéesht'áázh; shii' sizíinii índa shits'íís ałdó' nídínéesdzá.

¹⁰ Háálá yínííł bąąh niníyá, áádóó ádił hahasdzoołgo shee nináháhááh; doo ákwii áát'įįdii biniinaa doo shidziil da yishłeeł, áádóó shits'in deízháásh.

¹¹ Shida'ana'í t'áá ałtso biniinaa t'óó shá nahat'i'; t'áá aaníí bił kééhasht'íinii agháago ákódashił'į́, áádóó bił ahéédahoniszinii shéédaaldzid daazlį́į́'; bitahgóó hidisháahgo dashiiłtséehgo shits'ą́ąjį' hidijeeh.

¹² Diné daaztsą́ągo baa hoyoos'nahii nahonishłin; łeets'aa' sits'ilii nahonishłin.

¹³ Háálá shinaagóó t'óó hóyé'ígi ádaaníigo t'óó ahayóí ałjeeh nídanilniihgo diits'a'; shindahagizgo áádóó t'áá nahont'inee shizéé' nideii'áago ahínéikah.

¹⁴ Nidi ni, Bóhólníihii nílíinii, naa jiisélíí', Ni éí shiDiyin God nílį́, nidishní.

¹⁵ T'áá áłahjį' shaa áhólyą́; shi'ana'í danilíinii áádóó atídashił'íinii bílák'eedę́ę́' yisdáshíłteeh!

¹⁶ Ná naal'a'í nishłį́įgo shaa a'ááh niizįįhgo shik'i di'niłdíín; aa a'ááh nínízinii bee yisdáshíłteeh!

¹⁷ Bóhólníihii nílíinii, doo t'óó shaa yáhásinígi áshidi'doolníił da, háálá nánooshkąąhgo sodeeszin; bíni' doo yá'ádaashóonii t'óó baa yáhásinígi ádabi'dilnééh; bíni'dii t'áadoo yee hadaodziihígóó daneeznánígíí bitahgi łeeyi' shijée' le'.

¹⁸ Dabiyooch'íidii ádaa daha'niihgo diné t'áá ákogi ádaaníiłii doo bił danilį́į́góó dei'į́įgo nayíyádaałti'ii bíni'dii dadéesxéelgo ánílééh.

¹⁹ Diné dandósinii ne'ajooba' bá hasht'e'nííníláii éí diné dabinááł naa dadzólíii bá binishínílnishii dooládó' ayóó ánéelą́ą' da.

²⁰ Diné yee indaha'áii bits'ąą nahont'inee honílǫ́ǫgi nidahoníł'in; saad bee ak'éhát'áahii bits'ąą hasih haz'ą́ągi nidahoníł'in.

²¹ Bóhólníihii baa ha'niih le', háálá kin haal'áii ana'í bináshzhiizhii bii' góne' yee aa a'ááh nízinii ayóó ánóolninígíí shich'į' ííshjání áyiilaa.

²² Háálá ádił náhodishchił yę́ędą́ą́' ádííniid, Nits' ą́ąjį' kóshi'diilyaa. Ákondi, Shíká anilyeed, nidishníigo nániisiskango shidisíníts'ą́ą́'.

²³ Bidiyį́į́' danohłíinii, t'áá ánółtso Bóhólníihii ayóó'ádeínóh'ní! Baa hodzódlíii Bóhólníihii baa áhályą́, nidi diné ádaa ha'niihgo naagháii éí Bóhólníihii lą'í yee k'ééhodidoodlííł.

²⁴ Chánah danohłį́, t'áá ánółtso Bóhólníihii bee nihił chodahoo'íinii, nihijéí dabidziilgo ádanihidoolííł.