PSALMS 30 - Navajo Bible

Aniné bits'ąą yisdá'iildéehii baa ahééh hasin

¹ Bóhólníihii nílíinii, yéego naa hashniih doo, háálá hááshííníłtį́, áádóó shi'ana'í danilíinii doo shaa bił dahózhǫ́ǫ́góó íinilaa.

² Bóhólníihii shiDiyin God nílíinii, nániisiskango nááshidinisá.

³ Bóhólníihii nílíinii, ch'į́įdiitah bidáá'dóó shii' sizíinii háíníłtį́; a'áán góyaa deeshłeełígíí bits'ąą she'iina' shá baa áhólyą́ą́ nít'éé'.

⁴ Diyin God bidiyį́į́' danohłíinii, Bóhólníihii baa dahohniihgo bich'į' dahohtaał, áádóó bízhi' diyinii béédaołniihgo baa ahééh danohsin.

⁵ Háálá t'óó kónígháníjį' báháchįįh, nidi ni'jiłdįįh bijį́įjį' bee ach'oha'níinii yee hak'ijidliih. Tł'éé' bíighah níjícha, nidi biiskání hoł hózhǫ́ǫ łeh.

⁶ Shí éí t'áá ałtsoní shoosánígo ádííniid, Ts'ídá doo nahjį' kóshidoolíłí da.

⁷ Bóhólníihii nílíinii, shich'ijí nílínígíí bee dził niłdzilgo si'ánígíí nahalingo áshiinilaa; doo shiníníł'į́į́góó shich'į' nahwii'náá nít'éé'.

⁸ Bóhólníihii nílíinii, haleebee nániisiskan; Bóhólníihii néisiskan.

⁹ Dasétsą́ągo a'áán góyaa yishłeehgo shidił ha'át'íísh nídoodleeł? Shits'íís łeezh násdlį́į'goósh naa haniih doo? Nit'áá aaníiniísh ná yaa halne' doo?

¹⁰ Bóhólníihii nílíinii, shidiits'į́įhgo shaa jiiníbaah! Bóhólníihii nílíinii, shíká anánílwo'!

¹¹ Atínídinishdleeh yę́ę bitsásk'ehgi shił hózhǫ́ǫgo ashzhishgo áshiinilaa; tł'oh yishbizh shi'é'ígíí shaa nídiniłtsoozgo bee ił hózhóonii bee áká shííníłzaaz,

¹² áko shii' sizíinii naa haniihgo nich'į' hataał doo, índa doo t'óó déesxéel da doo. Bóhólníihii shiDiyin God nílíinii, ahóyéel'áágóó nich'į' ahééh nisin dooleeł.