PSALMS 3 - Navajo Bible

Abínígo sodizin bee Bóhólníihii baa hodzódlí

¹ Bóhólníihii nílíinii, dooládó' shich'į' nidahwiiłnáanii lą'í silį́į' da! Lą'í shik'i néijah;

² lą'í shaa nídaat'į́įgo ádaaní, Diyin God doo háká adoolwoł da. Síilah.

³ Nidi ni, Bóhólníihii nílíinii, shinaage' nílį́; bee ił nishłíinii áádóó dah neesht'áałgo áshósinii nílį́.

⁴ Bóhólníihii chánahgo náoshkąąhgo bihodiyingo dah yisk'idę́ę́' shich'į' ééhoosįįd. Síilah.

⁵ Nishtéehgo ná'iishwosh áádóó ch'ééhésdzííd, háálá Bóhólníihii shaa áhályą́.

⁶ Shinaagóó neeznáadi mííl diné shik'iidoojah biniyé nidahaaznánígíí doo binásdzid da dooleeł.

⁷ Bóhólníihii nílíinii, díldzííł! ShiDiyin God yisdáshíłteeh! Háálá shida'ana'í t'áá ałtso biniishjaa' náhidíníłhaal. Doo Diyin God k'ehgo ádaat'éii biwoo' dahíníti'.

⁸ Bóhólníihii t'éí bee yisdá'iildéehii bee hólǫ́; bee ak'ijiinídlíii éí nidine'é bee dahólǫ́ǫ le'! Síilah.