PSALMS 22 - Navajo Bible

Ti'hoo'níihgo sohodizin áádóó sin bee Diyin God baa ha'niih

¹ ShiDiyin God, shiDiyin God, ha'át'éegoshą' yóó'ashidííní'ą́? Ha'át'éegoshą' shíká adíílwołgi doo deeghánídi shits'ąą honílǫ́, índa saad bee nidish'ni'ígíí bits'ą́ądi honílǫ́?

² ShiDiyin God nílíinii, jį́įgo nánooshkąąh, nidi doo shich'į' ééhonísįįh da, áádóó tł'ée'go ałdó' doo dííníshhéel da.

³ Nidi ni diníyin; Ízrel dine'é yee naa dahaniihígíí bee dah sínídá.

⁴ Danihizhé'é yę́ę naa dadzólíí nít'éé', áko naa dadzólíigo yisdéínínil.

⁵ Nídanooskango yisdéínínil; naa dadzólíí nít'éé', áko t'áadoo baa yádahóósįįd da.

⁶ Nidi ch'osh nahonishłin, áko doo diné nahonishłin da; diné bá nahat'i'ii índa diné bi'dit'íinii nishłį́.

⁷ Dashoo'íinii t'áá ałtso shaa daadlohgo shá nidahałt'i'; shich'į' bidaa' yee dah daałchi', áko bitsii' deiłne'go kódaaní,

⁸ Bóhólníihii hááhodoołtéełgo beijólí; háni'dii yisdáháłteeh, háálá haa bił nihoozhǫǫh!

⁹ Nidi niyee' iishch'id biyi'dę́ę́' hashííníłtį́; shimá yisht'o'dą́ą́' shił chohoo'į́įgo áshiinilaa.

¹⁰ T'áá shi'dizhchį́į́dę́ę́' naa shi'deet'ą́; t'áá shimá shishchį́į́dę́ę́' shiDiyin God nílį́.

¹¹ T'áadoo nízaadi shits'ą́ądi honílóní, háálá ach'į' nahwii'ná kǫ́ǫ́ hólǫ́, áko t'áadoo shíká oolyeedí da.

¹² Diné éí dóola nidahalinígíí t'óó ahayóí shinás'á; diné éí Béíshan hoolyéédóó dóola bidziilii nidahalinígíí shináshzhiizh;

¹³ náshdóítsoh bitsiijį' daditł'ooígíí alghałgo yéego ánínígi át'éego shich'į' dadéezhch'ago k'adę́ę dashííníiłháásh.

¹⁴ Tó yaadziidii nahonishłin; shits'in t'áá át'é ahádahaazwod; ak'ah neesk'ihii dííłhį́'ígi át'éego shijéí niseedzá;

¹⁵ ásaa'ts'iil yíłtseígi át'éego shidziil nááltsei, áádóó shitsoo' shiyaats'iin bídiiłgan; anoonééł bileezh bii' nishííníłtį́.

¹⁶ Háálá łééchąą'í haatįįh yíjéé' nahalingo diné doo yá'ádaashóonii shináshzhiizh; doo yá'át'ééh ádaaníiłii shinás'á; shíla' áádóó shikee' yaa'ada'ashiizh.

¹⁷ Shits'in t'áá át'é yídéeshtahgo bíneesh'ą́; dashiníł'į́įgo dashidiniilgęęzh;

¹⁸ shi'éé' ałtais'nii', índa shi'é'ígíí yiniyé yáá'iilt'e' yaa naaskai.

¹⁹ Nidi, Bóhólníihii nílíinii, t'áadoo nízaadi shits'ą́ądi honílóní! Adziil shá nílíinii, tsį́įłgo shíká anilyeed!

²⁰ Diltłish bits'ą́ąjį' shii' sizíinii yisdáníłteeh, she'iina' aháláane'go baa nitsískeesii éí łééchąą'í nahalingo diné hashkéii bibee adziilii bits'ą́ąjį' yisdáníłteeh!

²¹ Náshdóítsoh bitsiijį' ditł'ooígíí bizéé'dę́ę́' áádóó dóola da'ałchinii bidee' bits'ą́ąjį' yisdáshíłteehgo shich'į' ééhonísįįh!

²² Shik'isóó danilíinii nízhi' bee bił dahodeeshnih; áłah nádleehii bitahgi naa hashniih doo:

²³ Bóhólníihii dadíínóhsinii, baa dahohniih! Jéíkab bits'ą́ą́dóó yichíiłii danohłíinii, t'áá ánółtso ayóó át'éego baa dahohniih; Ízrel ba'áłchíní ahoolchíiłii, t'áá ánółtso dahodíínóhsin!

²⁴ Háálá hach'į' nahwii'náanii t'áadoo yiyíí'įįd da, áádóó t'áadoo yaa'ih niizį́į' da, índa t'áadoo hats'ą́ąjį' ádzaa da, nidi níjookąąhgo hodiizts'ą́ą́'.

²⁵ Ayóó át'é áłah ílį́įgi bee naa hashniihii nits'ą́ą́dę́ę́' neheleeh; dabidósinii binááł t'áá aaníí ádíshníigo bee ádee hadeesdzíi'ii bi'deeshłííł.

²⁶ Hojooba' ádaat'éii da'dooyį́įłgo hwiih dadooleeł; Bóhólníihii hadeintáii éí baa dahaniih doo! Hool'áágóó nihijéí hináa le'.

²⁷ Nahasdzáán nidahonees'ą́ąjį' t'áá ałtso Bóhólníihii yéédadoolnihgo yich'į' dah nídahididookah, áko ał'ąą dine'é t'áá ałtso nidááhdóó nich'į' nidahałáa doo.

²⁸ Háálá aláahgo bee óhólníihgo bił haz'áanii éí Bóhólníihii bíí', áádóó ał'ąą dine'é yinant'á.

²⁹ Nihokáá'góó diné ayóó át'é da'at'íinii t'áá ałtso da'dooyį́į́ł áádóó nidahałáa doo; t'áá ałtso łeeshtahjį' náádleełii hadáahjį' yaa ádadoonííł; bii' naazíinii dadínóonéełii hach'į' yaa ádadoonííł.

³⁰ Náás da'ahílchíhígíí t'áá ałtso há nidaal'a' doo; náás ahoolchíiłii ałdó' Bóhólníihii bee bił dahane' doo.

³¹ Náasdi diné dadoochíłígíí bich'į' Bóhólníihii bit'áá ákogi át'éii yaa dahalne'go, Bóhólníihii kódzaa, daaníi doo.