PSALMS 18 - Navajo Bible

Yisdá'oodzáájí David biyiin

¹ Bóhólníihii bee shidziilii nílíinii, ayóó'ánósh'ní.

² Bóhólníihii éí tsé shá nilį́, índa bine' adziihii shá nilį́, áádóó yisdáshiiłteehii nilį́; shiDiyin God éí bee shidziilii nilį́įgo bine' ahinishchééh; shinaage' índa adziil bee yisdáhásháahii nilį́įgo bikáá' nehesdzíihii nilį́.

³ Bóhólníihii aa ha'niih yą́ą́h nilíinii náoshkąąh doo, áko shi'ana'í danilíinii yits'ą́ąjį' yisdáshiiłteeh dooleeł.

⁴ Aniné bik'ee yínííł shináhaazláá nít'éé' áádóó doo Diyin God k'ehgo ádaat'éii t'áadoo bee néelą́'ígóó nááséełii shił yéé' dahasłį́į́'.

⁵ Hool'áágóó ti'hoo'nííh bik'ee yínííł na'adáii shináhaazláá nít'éé'; aniné biloh shiyah náhodiłhis nít'éé'.

⁶ Shił nahodít'é sélį́į'go Bóhólníihii néisiskan; ShiDiyin God, shíká anilyeed, bidííniid. Bikin bii' sohodizin bii' dę́ę́' shidiizts'ą́ą́', áko náoshkąąhígíí yidiizts'ą́ą́'.

⁷ Ákohgo nahasdzáán hidees'náa'go ditłid silį́į́'; báhóóchįįdígíí bąą dził bee daniłdzilii ałdó' nidahaas'náa'go daditłid nít'éé'.

⁸ Bíníí'dę́ę́' łid ha'ííjool, índa bizéé'dę́ę́' kǫ' ó'oołdįįłii hadíínóodgo bee tsííd dadiiltłah.

⁹ Yót'ááh hiníláii ąą ádeile'go hadááyáago bikee' biyaagi chahałheeł dah yildoh.

¹⁰ Áko diyingo naal'a'í chérab wolyéii yik'i dah sidáago éí bił yít'a'; t'áá aaníí níłch'i bąąh diits'a'go honílįįd.

¹¹ Níłtsą́ k'os diłhił éí bik'i hííkaadgo chahałheeł bił dashoogishgo í'diilyaa.

¹² Bits'ádi'nílídígíí bilą́ąjį' k'os biyi'dę́ę́' níló tsé nahalingo áádóó tsííd dadiltłi'ii nááłdááz.

¹³ Bóhólníihii ii'ni' nahalingo yádiłhił biyi'dę́ę́' biinéé' diists'ą́ą́', áádóó Aláahgo Ayóó'át'éii haadzíí', áko níló éí tsé nahalingo áádóó tsííd dadiltłi'ii aheesdááz.

¹⁴ Bik'aa' yee adziiłt'óohgo ana'í tainooskaad; nída'iilgęshgo áyiilaago yik'ee t'óó bił dahóóląąd.

¹⁵ Bóhólníihii nílíinii, adínítehgo níníí'dę́ę́' niyolígíí bee tó dahidinééh yę́ęgóó yit'į́ daazlį́į́', áko nahasdzáán bee niłdzilii ííshjání daazlį́į́'.

¹⁶ Aghánáhóó'áádę́ę́' shíká adoolnii'go tó daditáanii biyi'dę́ę́' hááshííłtį́.

¹⁷ Shi'ana'í bidziilii yits'ą́ąjį' yisdáshííłtį́, índa dashijoołá nít'ée'ii yits'ą́ąjį' yisdáshííłtį́, háálá éí shiláahgo ádabóodziil nít'éé'.

¹⁸ Shich'į' nahwii'náago yoołkááł yę́ędą́ą́' shaatįįh yíná, nidi Bóhólníihii bee nisdzil nít'éé'.

¹⁹ Hóteelgo haz'ą́ąjį' shił íí'áazhgo yisdáshííłtį́, háálá shaa bił hózhǫ́.

²⁰ T'áá ákogi ánísht'éii bik'ehgo Bóhólníihii shich'į' na'nílá; a'át'e' shąąh ádinígíí bik'ehgo Bóhólníihii shich'į' na'nílá.

²¹ Háálá Bóhólníihii bik'eh honish'į́įgo yishááł nít'éé', índa doo yá'ádaashóonii doo baa naasháágóó t'áadoo shiDiyin God bits'áníyáa da.

²² Háálá yee nihodiiz'áanii shilą́ąjį' hólǫ́ǫ́ nít'éé', áádóó yee nihwiiz'áanii doo áts'ą́ąjį' kwíishłaa da.

²³ Binááł t'áá ákóne' ásht'į́į́ nít'éé', índa doo ákwii át'éii bits'ąą ádaa áháshyą́ą́ nít'éé'.

²⁴ Éí bąą t'áá ákogi ánísht'éii bik'ehgo Bóhólníihii shich'į' na'nílá, áádóó binááł a'át'e' shąąh ádinígíí bik'ehgo Bóhólníihii shich'į' na'nílá.

²⁵ Aa a'ááh danízinii bich'į' aa a'ááh nínízingo í'díínílzin; t'áá ákóne' ádaat'į́įgo deíkáahii bich'į' t'áá ákóne' ánít'į́įgo í'díínílzin.

²⁶ Ba'át'e' ádaadinii bich'į' na'át'e' ádingo í'díínílzin, áádóó ák'edahal'íinii bik'ijį' nílį́įgo í'díínílzin.

²⁷ Jó, diné atídabi'dil'íinii yisdáhínííł, nidi ádaa deidzódlíii níníł'į́; éí a'ohgo ádaat'éego ádíílííł.

²⁸ Jó, bee hool'iní shá didííłtłił; shił tł'ée'go Bóhólníihii shiDiyin God shił ch'ídi'doołdlał.

²⁹ Jó, ni neego siláo yinéełii bik'eh dideeshdleeł, índa shiDiyin God bee tsé ahénátł'inígíí báhátis dah dínéeshjį́į́ł.

³⁰ Áko Diyin God t'áá bí át'éii ts'ídá t'áá ákogi át'é, Bóhólníihii bizaad bóhoneestą́ą'go bee baa hodzoosdlíí'; baa deidzólíii t'áá ałtso yá naagé nilį́.

³¹ Háí lá Diyin God nilį́? Bóhólníihii lą́ą. Háísh tsé niłdzilii nilį́? NihiDiyin God lą́ą.

³² Éí Diyin God nilíinii adziil yee áká nínáshiisisgo áshósin; t'áá ákogi ánísht'éego áshósin.

³³ Bįįhtsa'ii dilwo'ígi át'éego shikee' bee doo shił nahontł'agóó áshósin, áádóó shi'aghádahaz'áagi dah náshiisįįh.

³⁴ Shíla' bee ana'ash'į́į doogo yínashiniłtin, áko shigaan éí béésh łitsoii ałtį́į́' náyiiłtas.

³⁵ Nibee yisdá'iildééh naagé ałdó' shaa dííní'ą́, áádóó nigaan nish'náájí bee de áshíínísin, áko ná áhwiinít'į́'íii bee ayóó ánísht'éego áshiinilaa.

³⁶ Doo nantł'agóó nihidishtaałgo áshiinilaa, áko t'áadoo ałtádiighaz da.

³⁷ Shi'ana'í danilíinii nidaníłchą́ą'go nibéhéshwod, áádóó ałtso t'áadoo ánáhoosht'įįhí áséłdįįdjį' nibéhéshwod.

³⁸ Atídeishłaa, áko doo náádahidoojeeh ádaadzaa da; shiyaajį' naa'aníídee'go bik'i dadiis'eez.

³⁹ Háálá ana'al'į́į doogi adziil bee áká síszaazgo áshiinilaa; shik'i néijah yę́ę shiyaajį' bik'eh dadínídlį́į́'.

⁴⁰ Shi'ana'í danilíinii shits'ánííníłkaad, áko shik'ee dadiniihii ádahodeeshdįį ł.

⁴¹ Bíká adoolwołígíí yíká dadilwosh nít'éé', nidi t'áadoo yisdábóníłí da; Bóhólníihii yich'į' dadilwosh nít'éé', nidi t'áadoo bich'į' ééhoosįįd da.

⁴² Áko níyol bidáahjį' łeezhgi át'é daazlį́į'jį' bik'ída'iisíłhaal; kintah nida'aztiingi łeezh nahjį' ajii łkaad nahalingo nahjį' ahéłkaad.

⁴³ Diné saad dahółóonii bits'ąą yisdáshííníłtį́; ał'ąą dine'é aláahgo binanisht'áago áshiinilaa; dine'é doo béédahasinii shá nidaal'a'.

⁴⁴ T'áá shaa dahodiits'į́hí shik'eh dahół'į́; dé'éyóní danilíinii shiyaajį' ni'ídii'nííł.

⁴⁵ Dé'éyóní bichoo'į́ ádaasdįįd, áádóó bidziilgo bił nahaz'ą́ą́dę́ę́' bitah dahoditłidgo ch'éhékááh.

⁴⁶ Bóhólníihii hiná; éí shitsé niłdzilii nilį́įgo baa ha'niih le', áádóó Diyin God yisdáshíłtéehii ayóó át'éii nilį́į le';

⁴⁷ Diyin God éí shá k'éédoo'nííł áádóó t'áá bí dadine'é shá yik'eh doodleełgo shiyaa ayiinííł.

⁴⁸ Shi'ana'í danilíinii bits'ąą yisdáshíłtééh; t'áá aaníí shi'ana'í danilíinii shik'i néijahígíí bilááh ánísht'éego áshíínísin; diné doo daats'íidii bits'ąą yisdáshíłtééh.

⁴⁹ Éí bąą shí nich'į' ahééh nisin doo. Bóhólníihii nílíinii, ał'ąą dine'é bitahgóó nízhi' baa hashniihgo hashtaał doo.

⁵⁰ Aláahgo bá nant'áii ayóó át'éego ak'eh didlį́įgo áyósin, índa ak'ah bik'i yaadziidgo yiyíísį́į'ii David áádóó bits'ą́ą́dóó náás ahoolchíłígíí ał dó' Bóhólníihii aa a'ááh nízinii hool'áágóó hach'į' yit'íní áyósin doo.