PSALMS 17 - Navajo Bible

Ade áhósinii bich'ą́ą́h sohodizin

¹ Bóhólníihii nílíinii, t'áá ákogi át'éii yíníłts'ą́ą́'; bíká ádíshníinii baa ákonínízin; shí doo saad bee shina'adlo'góó nich'į' sodiszinígíí shá diits'į́į́h.

² Háni'dii honílǫ́ǫ́dóó t'áá ni shaa nánít'į́į le'; háni'dii ádahat'ínígíí aheełt'éego níníł'į́į le'.

³ Tł'ée'go shaa hwííníle'go shijéí át'éegi háínísidgo nabínínítą́ą́'; doo yá'ádaat'éehii doo ła' shii' hólǫ́ǫ́góó nił bééhózin; doo t'áá k'ad bee haz'áanii heshtíihgo hahideesdzih da niizį́į́'.

⁴ Nizaad bee hahídziihii baa ákonisingo bąą diné yaa deíkááhjí, éí ádéédahooldzíidgo atída'ał'íinii doo bił naashkai da nít'éé'.

⁵ Nikék'eh hashchį́į́góó nihidishtaałgo yishááł nít'éé'; t'áadoo ałtádiighaz da.

⁶ Diyin God nílíinii, nániisiskan, háálá shich'į' ééhodíísįįł; shich'į' dah díníit'aahgo ádíshnínígíí diits'į́į́h.

⁷ Yisdá'iiníiłii nílíinii, diné naa dadzólíii bik'ijį' danilíinii bits'ą́ąjį' nigaan nish'náájí bee yisdáhíníiłii, bik'ee t'óó ił ahayóigo aa a'ááh nínízinii yit'íní ánílééh.

⁸ Anáá' baa áháyánígi át'éego shaa áhólyą́; nit'a' biyaagi náshidíł'įįh;

⁹ diné shide ádahósinii áádóó agháago shi'ana'í danilį́įgo shinás'áhígíí bits'ąą náshidíł'įįh.

¹⁰ T'áá bí dabijéí doo bił adahojoobá'ígóó ádaa dadzódlíigo yádaałti'.

¹¹ Deíníikááhgóó nihináshzhiizh; naa'adanihidiyoołtł' ił biniyé danihinéł'į́;

¹² náshdóítsoh bitsiijį' daditł'ooígíí t'áá k'adę́ę oolghalígíí nidahalin, áádóó náshdóí yáázh bitsiijį' daditł'ooígíí t'áá nant'inee aa naa'na'ígíí nidahalin.

¹³ Bóhólníihii nílíinii, díldzííł! Shi'ana'í bidááh nínáahgo bik'eh dídleeh! Diné doo yá'ádaashóonii bits'ą́ąjį' nidiltłish bee shii' sizíinii yisdáníłteeh,

¹⁴ Bóhólníihii nílíinii, diné bits'ą́ąjį' yisdáshíłteeh, éí diné nihokáá' bił nidahazt'i'ii t'éiyá yiniyé dahiná. T'ah dahináago bíí' dooleełii bá hasht'e'nihínínil; t'áá éí bee bibid bii' hadadeezbin le', ba'áłchíní t'óó ahayóí, áádóó daneeznáago dabinaalye'é yę́ę ba'áłchíní nídeididoolééł.

¹⁵ Shí éí t'áá ákogi ánísht'éego ninísh'į́į doo; ch'éénísdzidgo ánít'éegi nísh'į́įgo shił yá'át'éeh doo.