PSALMS 16 - Navajo Bible

Bíí' silį́į'ii yá'át'éehii

¹ Diyin God nílíinii, shaa áhólyą́, háálá t'áá ni naa jííníshłí.

² Bóhólníihii ábidishní, ShiBóhólníihii nílį́, yá'ádaat'éehii t'áá ałtso nits'ą́ą́dę́ę́' t'éiyá shaa hindééh.

³ Nidi nahasdzáán bikáa'gi Diyin God bidiyį́į́' danilíinii éí t'áá íiyisí ił danilíinii ádaat'éego baa shił nihoozhǫǫh.

⁴ Diyin dabidi'níinii yada'ólíii t'óó tsé'édin yínííł bide ádaanííł; dił yanáadzi'go náádayiiłniihii doo bee atah deeshłeeł da. Índa dabízhi' doo ła' bee hadeesdzih da.

⁵ Bóhólníihii éí shíí' dooleełii índa shibee adlání shá ats'éiní'áanii nilį́; shíí' nilíinii shá baa áhólyą́.

⁶ Yá'ádahoot'éehgo nidahaz'ą́ą́góó shá nídahasdzoh; aoo', bidziilgo dah aashłééł.

⁷ Bóhólníihii shá na'ak'íyáłti'ii baa hashniih doo; tł'ée'go ałdó' shijéí nashinitin łeh.

⁸ Bóhólníihii t'áá áłahjį' shilą́ąjį' hólǫ́ǫgo íínísin, háálá shinish'náájí hólǫ́ǫgo doo shił na'ii'náa da doo.

⁹ Éí bąą shijéí bił hózhǫ́, áádóó shii' sizíinii bił nihoozhǫǫh, índa shits'íís ałdó' hasih haz'ą́ągi hanályį́į́h.

¹⁰ Háálá shii' sizíinii doo t'áá hool'áágóó ti'hoo'níihdi hólǫ́ǫgo ádíílíił da; niDiyin Nilíinii ałdó' didoołdziłjį' doo ninádidíí'áał da.

¹¹ Iiná bá honít'i'ígíí shił bééhózingo áshiinilaa; honílǫ́ǫgi t'áá íiyisí bee ił hózhóonii hólǫ́; ninish'náájí baa honeeninii hólǫ́ǫgo ahóyéel'á.