PSALMS 149 - Navajo Bible

Ízrel éí Bóhólníihii baa dahohniih bidi'ní

¹ Bóhólníihii baa dahohniih! Sin ániidíii bee Bóhólníihii bich'į' dahohtaał; bidiyį́į́' áłah nádleehgi sin bee baa ha'niihii bee dahohtaał!

² Bíni'dii Ízrel dine'é Ábiilaii baa bił nidahoozhǫǫh; bíni'dii Záíyandóó dine'é binanit'a'í t'áá íiyisí yaa bił dahózhǫ́!

³ Bíni'dii da'alzhishgo ásaa' yigádígíí índa tsin tł'óół bąąh daneelzhee'go bee nida'a'néii yee nidaanéego bízhi' yaa dahaniih le'!

⁴ Háálá Bóhólníihii bidine'é yaa bił hózhǫ́; diné a'ohgo ádaat'éii bee yisdá'iildéehii yee haididoolííł.

⁵ Bíni'dii bidiyį́į́' baa bił dahózhǫ́ǫgo baa dahaniih le'; bíni'dii bitsásk'eh bikáá'góó bił dahózhǫ́ǫgo dahataał le'.

⁶ Bíni'dii Diyin God yaa dahaniihgo nídididla' le' áádóó diltłish ałts'ą́ąjį' deeníinii dah deítįįh le',

⁷ áko éí yee ał'ąą dine'é k'éédeidoodlííł, áádóó dadine'é atídeił'į́į doo,

⁸ áádóó aláahgo binanit'a'í danilíinii béésh da'ahólzha'í yee yééda'atł'óoh doo, índa bá aghádahideezíinii nidi ákódeił'į́į doo,

⁹ áko bee bá nidahodiyoot'áałgo bee bik'e'ashchíinii yee ááníił doo. Bóhólníihii bidiyį́į́' t'áá ałtso díí yee yił nilį́. Bóhólníihii baa dahohniih!