PSALMS 148 - Navajo Bible

Ádabi'diilyaii t'áá ałtso Bóhólníihii yaa dahaniih doo bee biyahoniidlįįh

¹ Bóhólníihii baa dahohniih! Yá'ąąshiidę́ę́' Bóhólníihii baa dahohniih! Aghanídahaz'áágóó baa dahohniih!

² Bidiyingo naal'a'í danohłíinii t'áá ánółtso, baa dahohniih; yá'ąąshdi hinooláii t'áá ánółtso, baa dahohniih!

³ Jį́honaa'éí índa ooljéé', sǫ' nihídazdilidii t'áá ánółtso, baa dahohniih!

⁴ Yá'ąąsh aghá'ánízáadii áádóó biláahdi tó honohłóonii, Bóhólníihii baa hohniih!

⁵ Bíni'dii Bóhólníihii bízhi' yaa dahaniih! Háálá haadzíi'go ha'át'íhída t'áá ádaadindę́ę́' dahazlį́į́'.

⁶ Áádóó hool'áádę́ę́' ahóyéel'áágóó hasht'eyiilaa; bee haz'áanii ts'ídá doo bił yóó'ahodoogáałii áyiilaa.

⁷ Nahasdzáán bikáá'dóó Bóhólníihii baa dahohniih; tónteel biyi'góó ayóó ádaníldíilgo nidaaldeehii índa tó daditáanii t'áá ánółtso, baa dahohniih.

⁸ Kǫ' áádóó níló, áádóó yas índa siil, áádóó níyol náádǫ́ǫsii danohłíinii, Bóhólníihii bizaad bohoolníiłii baa dahohniih!

⁹ Dził naaznilii índa deílk'idii t'áá ánółtso, áádóó tsin nihineest'ą' nihąąh nídahoodleełii índa gad t'áá ánółtso,

¹⁰ nidaaldlooshii índa alį́į́' t'áá ánółtso, nidaah'na'ii índa tsídii nidaaht'a'ii t'áá ánółtso Bóhólníihii baa dahohniih!

¹¹ Nahasdzáán bikáá'góó aláahgo naat'áanii danohłíinii índa dadine'é t'áá ánółtso, naat'áanii danohłíinii índa nahasdzáán bikáá'góó ánihwii'aahii danohłíinii t'áá ánółtso,

¹² tsíłkéí índa ch'ikéí danohłíinii t'áá ánółtso, diné hadasoohtihii índa áłchíní nohłíinii, Bóhólníihii baa dahohniih!

¹³ Bíni'dii Bóhólníihii bízhi' yaa dahaniih, háálá bí bízhi' t'éiyá ts'ídá aláahgo át'éii át'é; nahasdzáán índa yádiłhił biláahgo Bóhólníihii ayóó át'éii nilį́.

¹⁴ Bidine'é dabidziilgo áyiilaa; bidiyį́į́' danilíinii t'áá ałtso baa dahaniih; éí Bóhólníihii yit'ááhgóó naaldeehii Ízrel dine'é danilíinii baa dahaniihgo áyiilaa. Bóhólníihii baa dahohniih!