PSALMS 147 - Navajo Bible

Bóhólníihii éí Jerúsalem yik'ijidlíii baa ha'niih

¹ Bóhólníihii baa dahohniih! Háálá nihiDiyin God baa dahwii'niihgo bich'į' dahwiitaałgo yá'át'ééh, háálá ayóó ánóolnin, áádóó haa ha'niihgo t'éiyá hweełt'é.

² Bóhólníihii éí Jerúsalem háididlééh; Ízrel dine'é ch'íneelkaadii áłah ánéídlééh.

³ Diné t'áá íiyisí bijéí yínííł danilíinii hada'ólníigo áyósin, áádóó adadeezneh yę́ęgóó ałch'į' áńdeidle'.

⁴ Sǫ' ánéelą́'ígíí yee nihoní'ą́; t'áá ałtso bízhi' dahólǫ́ǫgo yee dayózhí.

⁵ NihiBóhólníihii ayóó át'éii nilį́, áádóó ayóó ábóodziilii nilį́; doo bóhonee'ą́ą́góó bił ééhózin.

⁶ Bóhólníihii éí a'ohgo ádaat'éii chánah ánáyoodlííł; diné doo yá'ádaashóonii éí naa'ayiinííł.

⁷ Ahééh danohsingo Bóhólníihii bich'į' dahohtaał; tsin tł'óół bąąh daneelzhee'go bee nida'a'néii bee bá nidaahnéego nihiDiyin God baa dahohniih!

⁸ Yót'ááh hiníláii bich'ą́ą́h k'os nídiilkǫǫhgo ánáyiil'įįh; nahasdzáán bá níłtsą́ hasht'ééyiil'įįh; dziłgóó ch'il hááhinoot'į́įłgo áyósin.

⁹ Naaldlooshii índa gáagii yáázh ádaaníinii bich'iyą' yich'į' kwííł'į́.

¹⁰ Łį́į́' bidziilii éí doo yaa bił nihoozhǫǫh da, índa diné bits'íís bidziilii doo yaa bił nihoozhǫǫh da.

¹¹ Nidi Bóhólníihii dabidósinii, áádóó aa a'ááh nízinii bee bił chodahoo'íinii éí Bóhólníihii baa bił nihoozhǫǫh.

¹² Jerúsalem nílíinii, Bóhólníihii baa hóniih! Záíyan nílíinii, niDiyin God baa hóniih!

¹³ Háálá nee dáń'da'ditį́į́h bich'ą́ą́h dah nídaatį́hígíí dabidziilgo áyósin; na'áłchíní ákóne' kééhat'íinii yik'ijidlí.

¹⁴ Nihoodzoh biyi'jígo hasht'ehodít'éego áyósin; tł'oh naadą́ą́' agháago yá'ádaat'éehii lą'ígo ná áyósin.

¹⁵ Nahasdzáán bikáa'jį' hahadziihgo haneeteehída bizaad bohoolnííł.

¹⁶ Aghaałgaii nahalingo yas nihidégaigo ííł'į́; łeeshch'iih nahalingo dahts'os nihiyiiłkaad.

¹⁷ Bááh bizéí ajiiłkaad nahalingo níló nihiyiiłkaad; deesk'aazgo ánáyiil'įįhgoshą' háí yii' sizį́įgo yíneel'ą́?

¹⁸ Bizaad k'ehgo da'ayį́į́h; níyolgo ánáyiil'įįh, áko tó danílį́.

¹⁹ Bizaad éí Jéíkab dine'é yił ííshjání ííł'į́; yee nihwiiz'áanii índa bik'eh hoogáałii Ízrel dine'é yee yił halne'.

²⁰ Náánáła' dine'é doo kót'éego yá ááníił da, éí bik' eh hoogáałii doo bił béédahózin da. Bóhólníihii baa dahohniih!