PSALMS 145 - Navajo Bible

Bóhólníihii bits'ą́ą́dóó yá'át'éehii áádóó bibee adziilii baa ha'niih

¹ ShiDiyin God, aláahgo naat'áanii nílíinii, t'áá íiyisí naa hashniih doo, áádóó hool'áágóó ahóyéel'áágóó nízhi' baa hashniih doo.

² T'áá ákwíí jį́ naa hashniih doo, áádóó hool'áágóó ahóyéel'áágóó nízhi' baa hashniih doo.

³ Bóhólníihii éí ayóó át'éii nilį́, áko t'áá íiyisí baa ha'niihgo yą́ą́h nilį́, índa yee ayóó át'éii doo nijółkaah át'ée da.

⁴ Áálíiłii ła' oochííłdę́ę́', éí náás oochííłgóó yee yił náádahalne'go naa dahaniih doo, áádóó íínít'įįdii ayóó ádaat'éii yaa dahalne' doo.

⁵ Bee ił nílíinii bee ayóó ánít'éhígíí áádóó t'óó bik'eda'ayóigo baa nanináhígíí nabik'ítsískees doo.

⁶ Adziil bee t'óó bik'eda'íyée'go íínít'įįdii bee diné naa nidahalne' doo, áádóó ayóó ánít'éhígíí baa ch'íhwiish'aah doo.

⁷ Ne'ajooba' ayóó ánéelą́ą'ii bééhániihgo ná yaa nidahalne' doo, áádóó t'áá ákogi ááníiłii ałdó' yee dahataał doo.

⁸ Bóhólníihii éí jooba' áádóó aa a'ááh hasin bii' hadeezbin; doo hah báháchįįh da índa bił hadlee'go aa a'ááh nízin.

⁹ Bóhólníihii t'áá ałtso yich'į' yá'át'éehgo áánííł índa t'áá ałtsoní áyiilaii yoosánígo yaa a'ááh nízin.

¹⁰ Bóhólníihii nílíinii, áálíiłii t'áá ałtso naa dahaniih doo, áádóó nidiyį́į́' danilíinii t'áá ałtso naa dahaniih doo!

¹¹ Bee nóhólníihgo bił haz'áanii ayóó át'éii yaa dahalne' doo, áádóó nidziilígíí yaa yádaałti' doo,

¹² áko ayóó át'éego áyoolíłígíí índa bee nóhólníihgo bił haz'áanii ayóó át'éii ił ídlį́ ayóó ánóolninii diné yił ííshjání ádahósin.

¹³ Bee nóhólníihgo bił haz'áanii hool'áágóó hólǫ́ índa oochííłgóó t'áá ałtso bee nóhólnííh.

¹⁴ Bóhólníihii éí diné chą́ą́h dadigeehii t'áá ałtso de áyósin, áádóó bąąh nidahwiikaadii t'áá ałtso chánah ánáyoodlííł.

¹⁵ T'áá ałtso níká dadéez'į́į'go niba' ádaat'é, áko baa náhwiilzhíishgo bich'iyą' baa hidí'aah.

¹⁶ Níla' ąą ánéinil'įįhgo hináanii t'áá ałtso nináneel'ą́ąjį' deinízinii yee hwiih danilį́įgo áníł'į́.

¹⁷ T'áá ałtsojį' Bóhólníihii t'áá ákogi át'éii jílį́, áádóó jijooba'go t'áá ałtsoní ájoolííł;

¹⁸ Bóhólníihii nídabookąąhgo bich'į' sodadilzinii, éí t'áá ałtso t'áá aaníí ádaaníigo nídabookąąhii yíighahgi hólǫ́.

¹⁹ Dabidísinii deinízinii yeidii'aah; nídabookąąhgo ałdó' yidiits'a'go yisdáyiinííł.

²⁰ Bóhólníihii ayóó'ádabó'níinii t'áá ałtso yaa áhályą́, nidi diné doo yá'ádaashóonii éí t'áá ałtso íidoołdįįł.

²¹ Bóhólníihii bee baa ha'niihii bee yáshti' doo, áádóó nihokáá' dine'é nináneel'ą́ąjį' bíni'dii bízhi' diyinii hool'áágóó ahóyéel'áágóó yaa dahaniih doo.