PSALMS 140 - Navajo Bible

Atída'ał'íinii bich'ą́ą́h sohodizin

¹ Bóhólníihii nílíinii, diné doo yá'ádaashóonii bits'ą́ąjį' yisdáshíłteeh; diné doo daats'íidii bits'ąą shaa áhólyą́.

² Éí dabijéí biyi'di doo yá'ádaat'éehii yaa nitsídaakees; anaa' hodooleełígíí yaa nídaat'į́į doo biniyé t'áá áłahjį' ahéédadiikah.

³ Tł'iish bitsoo' hááhaashchii'ii nahalingo bitsoo' dadeení áádóó biwooshtł'ah góne' tł'iish bik'asda' naaziid. Síilah.

⁴ Bóhólníihii nílíinii, diné doo yá'ádaashóonii dabíla' bits'ąą shaa áhólyą́; diné doo daats'íidii bits'ąą shaa áhólyą́; jó, shijátah dadí'nóołdisgo shindahaz'ą́.

⁵ Diné shide ádeinízinii łoh shiniyé nideiz'ą́ągo nídeidees'į́į́'; yishááłgóó ałdó' shiniyé tł'óół ahideełnádaastł'óonii ádayiilaa áádóó shidáahdi shiniyé łoh nideiznil. Síilah.

⁶ Bóhólníihii ábidishní, ShiDiyin God nílį́, Bóhólníihii nílíinii, nánooshkąąhígíí shá yíníłts'ą́ą́'!

⁷ Bóhólníihii shiDiyin God ayóó ánóodziilgo yisdáshiyíłteehii nílíinii, anaa' náhádleehgo shitsiits'iin shá bik'íná'ííłtihgo shaa áhólyą́ą́ nít'éé'.

⁸ Bóhólníihii nílíinii, diné doo yá'ádaashóonii deinízinii doo baa didíí'áał da; doo yá'át'ééhgóó yinahazgizii doo bá náás kódíílíił da! Áko doo ayóó át'éego ádadi'doolníił da. Síilah.

⁹ Shinás'áhígíí ádílááh yee yádaałti'ii, bíni'dii t'áá éí bitsiits'iin bik'ijį' nádleeh!

¹⁰ Bíni'dii tsííd dadiltłi'go bik'ijį' naałdaas! Bíni'dii doo náádahididookah da biniyé tsídza bi'dilkaad; bíni'dii da'a'áán góyaa abi'dilkaad!

¹¹ Diné doo yá'áshǫ́ǫ́góó yáłti'ii nihokáa'gi bíni'dii doo hasht'edoolníił da; doo yá'át'éehii éí diné doo yits'íidii yik'eh didoodleeł biniyé haintá.

¹² Atíbi'dil'íinii yiniyé át'íinii áádóó badahojoobá'íii bee bá haz'áanii éí Bóhólníihii yá yaa áhályą́ą dooleełgo shił bééhózin.

¹³ T'áá aaníí t'áá ákogi ádaaníiłii nízhi' yich'į' ahééh dadínóozįįł; t'áá ákogi ádaat'éii honílǫ́ǫgi kéédahat'į́į doo.