PSALMS 13 - Navajo Bible

Ach'į' nahwii'náagi sohodizin

¹ Bóhólníihii nílíinii, haash nízahjį' sheidiyíínah? Da' hool'áágóósh? Haa nízáagishą' doo shiníníł'į́į da doo?

² Haa nízáagishą' shá bíighah shijéí yínííł nilį́įgo shii' sizíinii bi'diił'áa doo? Haa nízáagishą' shi'ana'í shide át'ée doo?

³ Bóhólníihii shiDiyin God nílíinii, shaa nitsíníkees áádóó shich'į' ééhonísįįhgo shidziil áshílééh, áko doo dadeestsaał da,

⁴ doodaii' shi'ana'í, Hak'eh díshdlį́į́', dashididooniił, índa shik'ee dadiniihígíí nahjį' kódashiilaago yaa bił nidahoozhǫǫh doo.

⁵ Nidi aa a'ááh nínízinii baa jííníshłí áádóó nibee yisdá'iildéehii shijéí yaa bił hózhǫ́ǫ dooleeł.

⁶ Bóhólníihii t'áá íiyisí shaa jooba'go bąą bich'į' hashtaał doo.