PSALMS 118 - Navajo Bible

Yisdá'iildééh éí Bóhólníihii bich'į' baa ahééh hwiindzin

¹ Bóhólníihii bich'į' ahééh danohsin, háálá yá'át'éehii nilį́, aa a'ááh nízingo ahóyéel'á!

² Háni'dii Ízrel dine'é ádaaní, Aa a'ááh nízingo ahóyéel'á.

³ Háni'dii Éran dine'é ádaaní, Aa a'ááh nízingo ahóyéel'á.

⁴ Háni'dii Bóhólníihii deidísinii ádaaní, Aa a'ááh nízingo ahóyéel'á.

⁵ Tsístł'asíyáago Bóhólníihii náoshkąąhgo bich'į' sodeeszin; Bóhólníihii shich'į' ééhoosįįdgo doo shihodiit'i'góó hótsaa haz'ą́ągi nishiníłtį́.

⁶ Bóhólníihii shich'ijí nilį́; doo násdzid da doo. Dinéshą', haa dashizhdoolííł?

⁷ Shíká anájahígíí yił Bóhólníihii shich'ijí nilį́. Éí bąą shik'ee dadiniihii bik'eh hodeesdlį́į'go bá laanaa nisinii yideestsééł.

⁸ Diné beijólíhígíí biláahgo Bóhólníihii beijólííjígo yá'át'ééh.

⁹ Naat'áanii danilíinii beijólíhígíí biláahgo Bóhólníihii beijólííjígo yá'át'ééh.

¹⁰ Ał'ąą dine' é t'áá ałtso shináshzhiizh, nidi Bóhólníihii bízhi' baa jííníshłíigo áhodeeshdįįł!

¹¹ Shináshzhiizh, t'áá ałtsodę́ę́' shináshzhiizh, nidi Bóhólníihii bízhi' baa jííníshłíigo áhodeeshdįįł!

¹² Tsés'ná haanánísą́ nahalingo shináshzhiizh; ch'il dadeeníinii kǫ' bi ł hadíínóodgo tsį́įłgo adíídeezígíí nahalingo, Bóhólníihii bízhi' baa jííníshłíigo áhodeeshdįįł!

¹³ Naa'adeeshgoh biniyé t'áá na'níle'dii náás adashiyoołhan, nidi Bóhólníihii shíká aalwod.

¹⁴ Bóhólníihii éí bee shidziilii áádóó shiyiin nilį́; k'ad bee yisdááyáii silį́į́'.

¹⁵ Diné t'áá ákogi ádaaníiłii biníbaal naaznil biyi'dóó baa hózhǫ́ǫgo yisdá'iildééhjí sin diits'a'; Bóhólníihii bigaan nish'náájí yee doo nánílyéésgóó áánííł!

¹⁶ Bóhólníihii bigaan nish'náájí yee ayóó át'éii í'dólzin; Bóhólníihii bigaan nish'náájí yee doo nánílyéésgóó áánííł!

¹⁷ Doo dadeestsaał da, nidi hinishnáago Bóhólníihii binaanish baa hashne' doo.

¹⁸ Bóhólníihii t'áá íiyisí shich'ahashkéego nashineeztą́ą́', nidi anoonééł t'áadoo yaa shidiní'ą́ą da.

¹⁹ T'áá ákogi át'éii bidáádadilkał shá ąą ádanile'go Bóhólníihii baa hashniihgo yah adeeshááł.

²⁰ Díí Bóhólníihii bidáádílkał át'é; éí diné t'áá ákogi ádaaníiłii ákóne' yah ahidookah.

²¹ Shich'į' ééhosínísįįdgo bee yisdéíyáii sínílį́'ígíí bąą naa hashniih doo.

²² Kin ádeił'íní tsé doo deiniizį́į' da yę́ę t'áá éí tsé bee naaná'ástł'inii silį́į́'.

²³ Díidí Bóhólníihii áát'įįdígíí át'é, áko daníil'į́įgo bik'ee t'óó nihił adahayóí.

²⁴ Díí yoołkáłígíí Bóhólníihii áyiilaa, éí baa nihił nidahoozhǫǫhgo nihił dahózhǫ́ǫ doo.

²⁵ Bóhólníihii nílíinii, nánooshkąąh, k'ad yisdánihínííł! Bóhólníihii, nánooshkąąh, nihee ída'azįįdgo ánihílééh!

²⁶ Bóhólníihii bízhi' bee bi'dójíigo yigáłígíí bik'ihojidlíi doo! Bóhólníihii bikin si'ą́ą́dóó naa dahwii'niih.

²⁷ Bóhólníihii éí Diyin God nilį́, áádóó adinídíín nihaidiní'ą́. Bikáá' náá'iiniihí naa nídaaz'áhígi náádahidoolnihígíí bik'i nida'ohtł'o'.

²⁸ ShiDiyin God nílį́, áádóó naa hashniih doo. ShiDiyin God nílį́; t'áá íiyisí naa hashniih doo.

²⁹ Bóhólníihii bich'į' ahééh danohsin, háálá yá'át'éehii nilį́; aa a'ááh nízingo ahóyéel'á.