PSALMS 107 - Navajo Bible

Bóhólníihii éí ach'į' nahwii'ná yits'ą́ąjį' yisdá'iinííł

¹ Haa'íshą' Bóhólníihii bich'į' ahééh danohsin, háálá éí yá'át'ééh, aa a'ááh nízingo ahóyéel'á!

² Bi'ana'í bílák'eedę́ę́' yik'é niná'ídláago hááyoo'nilii Bóhólníihii nááyiyiisnii'ii bíni'dii kódaaníi le'.

³ Éí kéyah nahaz'ą́ą́dę́ę́', ha'a'aahdę́ę́', e'e'aahdę́ę́', náhookǫsdę́ę́', shádi'ááhdę́ę́' áłah ánáyiidlaa.

⁴ Ła' kin haal'áagi kéédahat'į́į dooleełgi ch'ééh hadeintáago honoojíidi doo naagháhídi tádadookai.

⁵ Dichin danilį́įgo áádóó dibáá' danilį́įgo ch'ééh dadeeskai.

⁶ Áko índa bich'į' nidahwii'náago Bóhólníihii nídayooskan, áko tsístł'adahaaskaii yits'ą́ąjį' yisdáyíínil.

⁷ Kin haal'áá léi'gi kéédahojit'į́į dooleeł biniyé t'áá k'éhézdon atiingóó honí'eezh.

⁸ Bóhólníihii aa a'ááh nízinígíí áádóó t'óó bik'eda'ayóii diné bada'áłchíní yá yaa naayáhígíí yaa dahaniih laanaa!

⁹ Ii' sizíinii yídin nilínígíí yee hwiih nilį́įgo ánáyoodlííł. Dichin nilį́įgo yá'ádaat'éehii yee hwiih yił'į́.

¹⁰ Ła' atídabi'dil'į́įgo béésh da'ahólzha'í bee dah dabi'diistł'ǫ́ǫgo chahałheełgi índa aniné bichaha'ohgi nidaháaztą́.

¹¹ Háálá Diyin God bizaad yich'į' naastee', áádóó Aláahgo Ayóó'át'éii binahat'a' doo deiniizį́į' da.

¹² Éí bąą naanish bidziilii bee badahojoobá'ígo ájiilaa. Naa'azhníídee'go t'áadoo háká oolyeedí da nít'éé'.

¹³ Áko índa bich'į' nidahwii'náago Bóhólníihii nídayooskan, áko tsístł'adahaaskaii yits'ą́ąjį' yisdáyíínil.

¹⁴ Chahałheeł índa aniné bichaha'ohdóó ch'éébí'nil, índa bee dah dadziistł'ónígíí há yiyiizhnizh.

¹⁵ Bóhólníihii aa a'ááh nízinígíí áádóó t'óó bik'eda'ayóii diné bada'áłchíní yá yaa naayáhígíí yaa dahaniih laanaa!

¹⁶ Háálá béésh łitsoii bee dáń'dadilkał ádaalyaii yiidiiłtaa', áádóó bich'ą́ą́h dah nída'atį́įhii béésh bee ádaalyaii aháiníłne'.

¹⁷ Doo ádahalyáanii éí bee haz'áanii áádóó doo ákwii ádáát'įįdígíí biniinaa bich'į' nidahwiis'náá'.

¹⁸ Ch'iyáán t'áá ałtso deiz'įįd, k'asdą́ą́' daneezná.

¹⁹ Áko índa bich'į' nidahwii'náago Bóhólníihii nídayookąąhgo tsístł'adahaaskaii yits'ą́ąjį' yisdáyíínil.

²⁰ Hane' yich'į' áyiilaago hadaałt'é áńdayiidlaa áádóó áho'niidįįd yę́ę bits'ą́ąjį' yisdáhóónil.

²¹ Bóhólníihii aa a'ááh nízinígíí áádóó t'óó bik'eda'ayóii diné bada'áłchíní yá yaa naayáhígíí yaa dahaniih laanaa!

²² Ahééh danízingo nááhániihii náádayiiłniih le'! Áádóó bił dahózhǫ́ǫgo baa nijiyáhígíí yaa dahalne' le'!

²³ Tónteel bikáá'góó ahaa na'iiniih yaa nidaakai doo biniyé tsinaa'eełtsoh yiih dahakáahii

²⁴ éí Bóhólníihii áyoolíłígíí índa táyi'góó t'óó bik'eda'ayóigo ó'ooł'įįłígíí dayoo'į́.

²⁵ Háálá níyol yich'į' hahadziihgo éí tó náádadiidáahgo ííł'į́įgo

²⁶ hoł wót'ááh néí'ááh áádóó níléí góyaa hoł taah náyii'aah, áko hach'į' nidahwii'nánígíí hoł áńdahadįįh.

²⁷ Adláanii nahalingo nidazhnit'i áádóó naanídazhnéekaad índa t'áadoo ánáádajó'ne'é da.

²⁸ Áko índa bich'į' nidahwii'náago Bóhólníihii nídayookąąhgo tsístł'adahaaskaii yits'ą́ąjį' yisdáyíínil.

²⁹ Ayóogo níyolígíí ííyolgo áyiilaa, áko tó náádadiidáhígíí ádahodiilzee'.

³⁰ Ákohgo hodiiyeelígíí baa hoł dahóózhǫǫd áádóó táts'áda'diil'oł dazhnízingo da'jíł'eeł yę́ęjį' táłts'áházh'eezh.

³¹ Bóhólníihii aa a'ááh nízinígíí áádóó t'óó bik'eda'ayóii diné bada'áłchíní yá yaa naayáhígíí yaa dahaniih laanaa!

³² Diné áłah nilį́įgi baa dahaniih le'! Aląąjį' naazíinii áłah danilį́įgi baa dahaniih le'!

³³ Tooh danílínígóó dahonoojíigo áyoolííł. Tó hadaazlínígóó dahóółtseigo áyoolííł.

³⁴ T'áadoo le'é nidant'ą'ígóó tááníí' hadaasgaigo áyoolííł; ákwii kéédahat'íinii doo yá'ádaashónígíí biniinaa ákót'éego áyoolííł.

³⁵ Honoojíígóó tó naazką́ągo áyoolííł. Hazgango haz'ą́ągi tó hadaazlį́įgo áyoolííł.

³⁶ Dichin danilíinii ákwii kéédahat'į́įgo áyoolííł, áko ákwii kin haal'á yii' kéédahat'į́į dooígíí ádeidoolííł.

³⁷ Áádóó dá'ák'ehgóó k'ééda'didlééh áádóó ch'il na'atł'o'ii k'éédeididléehgo t'áá doozhǫǫgo nínáda'niłt'į́į́h.

³⁸ Yik'ijidlíhígíí bee t'áá íiyisí k'ee'ąą noot'į́į́ł, áádóó bibéégashii éí doo ła' bits'ą́ą́' bi'oh dooleełgóó yá yaa áhályą́.

³⁹ Náánáłahgo hade ádahólzingo áádóó atídaho'dil'į́įgo índa yínííł dajílį́įgo ájíłch'į́dí dadzizlį́į́' áádóó hadahojoobá'í ádaho'diilyaa.

⁴⁰ Naat'áanii danilíinii t'óó daho'didláashgo honoojíidi doo nida'aztiindi t'áá ádzaagóó t'óó ahii' naaníjookah nít'éé'.

⁴¹ Nidi bich'į' nidahwiiłnáanii bits'ą́ą́dóó badahojoobá'íii néidiyiiłjeeh áádóó dibé deíl'á nahalingo bada'áłchíní k'ee'ąą noot'į́įłgo áyoolííł.

⁴² Diné t'áá ákogi ádaat'éii éí dayiiłtséehgo bił nidahoozhǫǫh łeh. Nidi diné doo ákwii ádaaníiłii t'áá ałtso dabidi'doolyił.

⁴³ Hojíyáanii díidí t'áá ałtso baa ákoznízin doo áádóó Bóhólníihii aa a'ááh nízinígíí baa nitsídzíkees doo.