PROVERBS 2 - Navajo Bible

Hódzą́ hájít'į́įgo shóizhdoołt'eeł

¹ Shiye', shizaad nídiniláago, áádóó shibik'eh ó'oo'níiłii hasht'e'nihidí'níiłgo,

² áko lá índa bee hódzáanii bíká na'ííníłts'ą'go áádóó nijéí ak'idi'yiitįįh baa dííní'ą́ągo,

³ ákót'éego lą́ą ił ééhózin baa ná'iinikąąhgo ak'idi'yiitįįh yéego yíníkeedgo

⁴ áádóó béésh łigaii hazhnitáhígi át'éego áádóó yódí nées'į́į'ii házdéez'į́'ígi át'éego hánít'į́įgo,

⁵ áko índa Bóhólníihii dólzingi bik'idi'díítį́į́ł áádóó Diyin God át'éegi bééhodíísįįł.

⁶ Háálá Bóhólníihii bee hódzáanii eidiyii'aah; ił ééhózin áádóó ak'idi'yiitįįh yee hahadziih.

⁷ T'áá ákogi ádaaníiłii yá hódzą́ yá'át'éehii hasht'e'niyiinííł. T'áá ákóne' át'éego deíkáahii yá naagé nilį́.

⁸ T'áá ákogi ádaat'íinii bá dahonít'i'ii yik'iiní'į́į́' áádóó bidiyį́į́' danilíinii bá dahonít'i'góó yá hasht'eyósin.

⁹ Áko índa t'áá ákogi át'éii, áádóó doo haada yit'éii índa aheełt'éego iiná, t'áá aaníí, éí t'áá ákǫ́ǫ́ dahonít'i'ígíí t'áá ałtso nił bééhodoozįįł.

¹⁰ Jó, nijéí hodooyąął, áádóó ił ééhózin éí nii' sizíinii yił hodooshǫǫł;

¹¹ yá'át'éehii áádóó doo yá'át'éehii nił bééhózingo éí bee nihídzíih doo; ak'idi'yiitįįh naa áhályą́ą doo.

¹² Áko doo yá'áshǫ́ǫ́góó áhoot'éii áádóó nahagizgo yádaałti'ii yits'ą́ąjį' nélnáa doo,

¹³ áádóó diné chahałheeł nideinishin doo biniyé t'áá ákogi át'éego dahonít'i' yits'ádahaaskaii yits'ą́ąjį' yisdándoołtééł.

¹⁴ Éí doo yá'át'éehii yaa nidaakaigo bił nidahoozhǫǫh áádóó diné doo yá'ádaashóonii bidoo yá'áshǫ' doo nahjį' nideidó'ááł át'éégóó deíkáahii t'áá íiyisí bił nidahooshǫǫh.

¹⁵ Éí binda'adlo'go dahiná áádóó nidahagizgo deíkááh.

¹⁶ Áádóó ayóní, éí asdzání ałjiłnii nilíinii łikango yáłti'ígíí yits'ąą naa áhályą́ą doo.

¹⁷ Éí t'áá ániid naagháádą́ą́' bahastiin nilį́įgo hoolzhiizh yę́ę yóó'iidíí'ą́, áádóó Diyin God binááł aha'deet'áanii yaa yooznah.

¹⁸ Jó, bikin si'ánídóó anoonééł góyaa ahóót'i' áádóó ch'į́įdiitah bił haz'ą́ą́ góyaa ahalóós.

¹⁹ Baa hakáahii doo t'ą́ą́' hááhákáah da índa yá'át'éehgo iiná doo yik'éhékáah da.

²⁰ Áko diné yá'ádaat'éehii dayíkááhgóó yínáał doo, áádóó diné t'áá ákogi ádaaníiłii ádaat'ínígi ánít'į́į doo.

²¹ Háálá t'áá ákogi ádaat'éii kéyah yikáá' kéédahat'į́į doo áádóó t'áá ákogi ádaaníiłii ákwii kéédahat'į́į doo.

²² Nidi diné doo yá'ádajíshóonii éí kéyah bits'ą́ąjį' áhodi'dooldįįł, índa nináda'dii'aahii kéyah bits'áhodi'doo'nił.