NUMBERS 26 - Navajo Bible

Mó'ab kéyahgi Ízrel dine'é dabi'déélta'

¹ Áko nahasnii' yę́ędóó bik'ijį' Bóhólníihii éí Mózes áádóó náá'iiłniihii Éran biye' Eliyéízar yich'į' haadzíi'go ání,

² Ízrel dine'é dabizhé'é yę́ę ba'áłchíní náás ahoolchíiłii t'áá ałtso bik'ehgo naadiindóó yówehgo béédááhaii ana'al'į́ yídaneel'áanii t'áá ałtso Ízrel dine'é bitahgi yídóoł tah.

³ Áádóó Mózes índa náá'iiłniihii Eliyéízar éí Mó'ab kéyah dadzígaigi Jórdan tooh nílíní bíighahgi Jériko binaashiijí hach'į' hahaasdzíi'go ání,

⁴ Diné deínółta'; éí naadiindóó yówehgo béédááhaii Bóhólníihii éí Mózes índa Ízrel dine'é yich'į' yee haadzíi'ii át'é. Ííjip kéyahdę́ę́' ch'íná'nánígíí:

⁵ Éí Rúben, Ízrel dine'é alą́ąjį' bá yizhchínígíí: Rúben biye' Héínak ba'áłchíní Héínak dine'é danilį́. Rúben biye' Pállu ba'áłchíní Pállu dine'é danilį́.

⁶ Rúben biye' Hézran ba'áłchíní Hézran dine'é danilį́. Rúben biye' Kármii ba'áłchíní Kármii dine'é danilį́.

⁷ Díí éí Rúben dine'é bada'áłchíní náás ahoolchíiłii ádaat'į́. Áko éí dízdiindóó ba'aan tádiindi mííldóó ba'aan tsosts'idi neeznádiindóó ba'aan tádiingo ánéelą́ą́'.

⁸ Áádóó Pállu biye' Iiláíyab wolyé.

⁹ Índa Iiláíyab biye'ké Nému'el, Déíthan índa Abáíram dabidi'ní. Díí dah oonééł bitahdóó Déíthan áádóó Abáíram néidiinilígíí éí Kórah yiłgo Mózes áádóó Éran yighada'dit'áahgo Bóhólníihii yich'į' nidaalteeh yę́ę ádaat'į́.

¹⁰ Áko éí ni' ąą áhoodzaago Kórah t'áá hoł aho'doolna'go ádadzisdįįd, índa naakidi neeznádiindóó ba'aan ashdladiingo ázhnéelą́ą'go kǫ' ahodííłk'ą́ą́'. Áko éí bee ééhózinii dadzizlį́į́'.

¹¹ Kórah ba'áłchíní t'éiyá t'áadoo ábi'disdįįd da.

¹² Díí Símiyan biye'ké bada'áłchíní náás ahideeshchínígíí ádaat'į́: Símiyan biye' Nému'el ba'áłchíní Nému'el dine'é danilį́. Símiyan biye' Jéímin ba'áłchíní Jéímin dine'é danilį́. Símiyan biye' Jéíkin ba'áłchíní Jéíkin dine'é danilį́.

¹³ Símiyan biye' Zíírah ba'áłchíní Zíírah dine'é danilį́. Símiyan biye' Shéíyal ba'áłchíní Shéíyal dine'é danilį́.

¹⁴ Díí éí Símiyan dine'é bada'áłchíní náás ahoolchíiłii ádaat'į́; éí naadiin naakidi mííldóó ba'aan naakidi neeznádiingo ánéelą́ą́'.

¹⁵ Díí Géed biye'ké bada'áłchíní náás ahideeshchínígíí ádaat'į́: Géed biye' Zíífan ba' áłchíní Zíífan dine'é danilį́. Géed biye' Hágai ba'áłchíní Hágai dine'é danilį́. Géed biye' Shúnai ba'áłchíní Shúnai dine'é danilį́.

¹⁶ Géed biye' Áznai ba'áłchíní Áznai dine'é danilį́.

¹⁷ Géed biye' Éírad ba'áłchíní Éírad dine'é danilį́. Géed biye' Aríílai ba' áłchíní Aríílai dine'é danilį́.

¹⁸ Díí éí Géed dine'é bada'áłchíní náás ahoolchíiłii ádaat'į́; éí dízdiindi mííldóó ba'aan ashdladi neeznádiingo ánéelą́ą́'.

¹⁹ Díí Júdah biye'ké Er áádóó Ónan wolyé: áko Er áádóó Ónan éí Kéínan kéyahdi jineezná.

²⁰ Áádóó díí Júdah biye'ké náánáła' bada'áłchíní náás ahideeshchínígíí ádaat'į́: Júdah biye' Shíílah ba'áłchíní Shíílah dine'é danilį́. Júdah biye' Píírez ba'áłchíní Píírez dine'é danilį́. Júdah biye' Zíírah ba'áłchíní Zíírah dine'é danilį́.

²¹ Áádóó Píírez biye'ké Hézran áádóó Héímal wolyé. Hézran ba'áłchíní Hézran dine'é danilį́. Héímal ba'áłchíní Héímal dine'é danilį́.

²² Díí éí Júdah dine'é bada'áłchíní náás ahoolchíiłii ádaat'į́; éí tsosts'idiindóó ba'aan hastą́ądi mííldóó ba'aan ashdladi neeznádiingo ánéelą́ą́'.

²³ Díí Ísakar biye'ké bada'áłchíní náás ahideeshchínígíí ádaat'į́: Ísakar biye' Tóla ba'áłchíní Tóla dine'é danilį́. Ísakar biye' Púwa ba'áłchíní Púwa dine'é danilį́.

²⁴ Ísakar biye' Jéíshab ba'áłchíní Jéíshab dine'é danilį́. Ísakar biye' Shímran ba'áłchíní Shímran dine'é danilį́.

²⁵ Díí éí Ísakar dine'é bada'áłchíní náás ahoolchíiłii ádaat'į́; éí hastą́diindóó ba'aan dį́įdi mííldóó ba'aan táadi neeznádiingo ánéelą́ą́'.

²⁶ Díí Zébyulan biye'ké bada'áłchíní náás ahideeshchínígíí ádaat'į́: Zébyulan biye' Sííred ba'áłchíní Sííred dine'é danilį́. Zébyulan biye' Íílan ba'áłchíní Íílan dine'é danilį́. Zébyulan biye' Jáliiyel ba'áłchíní Jáliiyel dine'é danilį́.

²⁷ Díí éí Zébyulan dine'é bada'áłchíní náás ahoolchíiłii ádaat'į́; éí hastą́diindi mííldóó ba'aan ashdladi neeznádiingo ánéelą́ą́' lá.

²⁸ Áádóó díí Jóseph biye'ké Manáseh áádóó Íífreiyim wolyéii bada'áłchíní náás ahideeshchínígíí ádaat'į́:

²⁹ díí Manáseh biye'ké bada'áłchíní náás ahoolchíiłii ádaat'į́: Manáseh biye' Méíkir ba'áłchíní Méíkir dine'é danilį́. Áko Méíkir éí Gíliyad yizhé'é nilį́. Gíliyad ba'áłchíní Gíliyad dine'é danilį́.

³⁰ Díí Gíliyad dabiye'ké bada'áłchíní náás ahoolchíiłii ádaat'į́: Gíliyad biye' Jeyíízer ba'áłchíní Jeyíízer dine'é danilį́. Gíliyad biye' Híílek ba'áłchíní Híílek dine'é danilį́,

³¹ áádóó Gíliyad biye' Ásriyel ba'áłchíní Ásriyel dine'é danilį́. Gíliyad biye' Shííkem ba'áłchíní Shííkem dine'é danilį́,

³² índa Gíliyad biye' Shiimáída ba'áłchíní Shiimáída dine'é danilį́. Gíliyad biye' Híífer ba'áłchíní Híífer dine'é danilį́.

³³ Áko Híífer biye' Ziilófehad t'áadoo biye'ké hazlį́į' da, nidi hatsi'ké t'éí hólǫ́. Díí Ziilófehad bitsi'ké kódaolyé: Mála, Nóah, Hágla, Mílka índa Térza.

³⁴ Díí éí Manáseh dine'é bada'áłchíní náás ahoolchíiłii ádaat'į́; éí ashdladiindóó ba'aan naakidi mííldóó ba'aan tsosts'idi neeznádiingo ánéelą́ą́'.

³⁵ Díí Íífreiyim biye'ké bada'áłchíní náás ahideeshchínígíí ádaat'į́: Íífreiyim biye' Shuthíílah ba'áłchíní Shuthíílah dine'é danilį́. Íífreiyim biye' Bííker ba'áłchíní Bííker dine'é danilį́. Íífreiyim biye' Téíhan ba'áłchíní Téíhan dine'é danilį́.

³⁶ Áko díí Shuthíílah biye'ké bada'áłchíní náás ahoolchíiłii ádaat'į́: Shuthíílah biye' Ííran ba'áłchíní Ííran dine'é danilį́.

³⁷ Díí éí Íífreiyim biye'ké bada'áłchíní náás ahoolchíiłii ádaat'į́; éí tádiindóó ba'aan naakidi mííldóó ba'aan ashdladi neeznádiingo ánéelą́ą́'. Áko díí éí Jóseph biye'ké bada'áłchíní náás ahideeshchínígíí ádaat'į́.

³⁸ Díí Bénjamin biye'ké bada'áłchíní náás ahideeshchínígíí ádaat'į́: Bénjamin biye' Bííla ba'áłchíní Bííla dine'é danilį́. Bénjamin biye' Áshbel ba'áłchíní Áshbel dine'é danilį́. Bénjamin biye' Aháíram ba'áłchíní Aháíram dine'é danilį́.

³⁹ Bénjamin biye' Shúfam ba'áłchíní Shúfam dine'é danilį́. Bénjamin biye' Húfam ba'áłchíní Húfam dine'é danilį́.

⁴⁰ Áádóó Bííla biye'ké Ard áádóó Néíyaman wolyé. Bííla biye' Ard ba'áłchíní Ard dine'é danilį́. Bííla biye' Néíyaman ba'áłchíní Néíyaman dine'é danilį́.

⁴¹ Díí éí Bénjamin dine'é bada'áłchíní náás ahoolchíiłii ádaat'į́; éí dízdiindóó ba'aan ashdladi mííldóó ba'aan hastą́ądi neeznádiingo ánéelą́ą́'.

⁴² Díí éí Dan biye'ké bada'áłchíní náás ahideeshchínígíí ádaat'į́: Dan biye' Shúham ba'áłchíní Shúham dine'é danilį́. Díí éí Dan bada'áłchíní náás ahoolchíiłii ádaat'į́.

⁴³ Shúham dine'é bada'áłchíní t'áá ałtso hastą́diindóó ba'aan dį́įdi mííldóó ba'aan dį́įdi neeznádiingo ánéelą́ą́'.

⁴⁴ Díí Ásher biye'ké bada'áłchíní náás ahideeshchínígíí ádaat'į́: Ásher biye' Jímna ba'áłchíní Jímna dine'é danilį́. Ásher biye' Jésowai ba'áłchíní Jésowai dine'é danilį́. Ásher biye' Biiráíyah ba'áłchíní Biiráíyah dine'é danilį́.

⁴⁵ Biiráíyah biye'ké ła': Biiráíyah biye' Hííber ba'áłchíní Hííber dine'é danilį́. Biiráíyah biye' Málkiyel ba'áłchíní Málkiyel dine'é danilį́.

⁴⁶ Ásher bitsi' éí Sárah wolyé.

⁴⁷ Díí éí Ásher dine'é bada'áłchíní náás ahoolchíiłii ádaat'į́; éí ashdladiindóó ba'aan táadi mííldóó ba'aan dį́įdi neeznádiingo ánéelą́ą́'.

⁴⁸ Díí Náftalai biye'ké bada'áłchíní náás ahideeshchínígíí ádaat'į́: Náftalai biye' Jáhziyel ba'áłchíní Jáhziyel dine'é danilį́. Náftalai biye' Gúnai ba'áłchíní Gúnai dine'é danilį́.

⁴⁹ Náftalai biye' Jíízer ba'áłchíní Jíízer dine'é danilį́. Náftalai biye' Shíllem ba'áłchíní Shíllem dine'é danilį́.

⁵⁰ Díí éí Náftalai dine'é bada'áłchíní náás ahoolchíiłii ádaat'į́; éí dízdiindóó ba'aan ashdladi mííldóó ba'aan dį́įdi neeznádiingo ánéelą́ą́'.

⁵¹ Díí éí Ízrel dine'é dabi'déélta'ígíí ádaat'į́: éí hastą́ądi neeznádiindóó ba' aan t'ááłáhídi mííldóó ba'aan tsosts'idi neeznádiindóó ba'aan tádiingo ánéelą́ą́'.

Yáá'iilt'e' bik'ehgo kéyah ahádaasdzo

⁵² Bóhólníihii éí Mózes ííłní,

⁵³ Díí daházhi'ígíí bik'ehgo kéyah daahó dooleełígíí há ahádadíízoh.

⁵⁴ Dabidine'é lą'í daalt'éhígíí éí kéyah bí dadooleełii dahótsaago bitaa dadidíí'aał, áádóó dabidine'é ádaałch'į́dígíí éí kéyah bí dadooleełii ádahoołts'ísígo bitaa dadidíí'aał. Áko dabidine'é t'áá ałtso ádanéelą́'ígíí dabik'ehgo kéyah daabí dadooleełígíí bitaa dadidíí'aał.

⁵⁵ Nidi kéyah éí yáá'iilt'e' bik'ehgo ahádahidoodzoh; dahazhé'é yę́ę bits'ą́ą́dóó hodine'é dabízhi'ígíí bik'ehgo daahóó' dadooleeł.

⁵⁶ Áko yáá'iilt'e' bik'ehgo kéyah daahóó' dadooleełii dajilą'ígíí áádóó ádajíłch'į́dígíí há ałts'ádahidíízoh.

Líívai dine'é

⁵⁷ Áádóó díí Líívai dine'é bada'áłchíní náás ahideeshchínígíí dabi'déélta': Líívai biye' Gérshan ba'áłchíní Gérshan dine'é danilį́. Líívai biye' Kóhath ba'áłchíní Kóhath dine'é danilį́. Líívai biye' Miirárai ba'áłchíní Miirárai dine'é danilį́.

⁵⁸ Díí ałdó' Líívai dine'é bada'áłchíní náás ahoolchíiłii ádaat'į́: Líbnai dine'é, Hííbran dine'é, Málai dine'é, Múshai dine'é índa Kórah dine'é ádaat'į́. Áádóó Kóhath éí Ámram bá yizhchį́.

⁵⁹ Áko Ámram be'asdzą́ą́ éí Jákebed wolyé; éí Líívai bitsi', áko éí Ííjip kéyahdi hamá Líívai yá hashchį́, áko Éran áádóó Mózes índa bilah Míriyam éí Ámram bá nijiishchį́.

⁶⁰ Áádóó Néídab, Abáíhu, Eliyéízar índa Íthamar éí Éran bá niheezhchį́.

⁶¹ Nidi Bóhólníihii binááł Néídab áádóó Abáíhu éí kǫ' doo dílzingóó náádziisnii'ígíí biniinaa t'áá ákǫ́ǫ́ dzineezná.

⁶² Díí Líívai dine'é dayéélta'ígíí éí naadiin táadi mííl; éí t'áá át'é ashiiké t'ááłá'í bee nídadeezidóó yówehgoígíí; éí doo Ízrel dine'é bił dabi'déélta' da, háálá Ízrel dine'é bitahgi kéyah daahóó' dadooleełii doo ła' haa dadeest'ą́ą da.

Kéíleb áádóó Jáshowa t'éiyá ch'éé'áázh

⁶³ Díí daho'déélta'ígíí éí Mó'ab kéyah dzígai Jórdan tooh nílíní bíighahgi Jériko binaashiijí Ízrel dine'é dajílíinii Mózes áádóó náá'iiłniihii Eliyéízar hóółta'.

⁶⁴ Áko Mózes áádóó náá'iiłniihii Éran éí Dził Sáínai honoojíigi Ízrel dine'é yiyííłta' yę́ędą́ą́' éí díí dayéélta'ígíí bitahdóó doo ła' hoł da'éélta' da nít'éé'.

⁶⁵ Háálá éí Bóhólníihii hainít'į́įgo ádííniid, T'áá aaníí honoojítahgi dazhdínóonééł. Áko íídą́ą́' dinéhígíí doo ła' ch'ééyáa da; t'áá hazhó'ó Jiifáneh biye' Kéíleb áádóó Nan biye' Jáshowa t'éiyá ch'éé'áázh.