NUMBERS 24 - Navajo Bible

¹ Áko Béílam éí Bóhólníihii bił hózhǫ́ǫgo Ízrel dine'é yik'iizhdoodliiłígíí yaa ákoniizį́į́'; átséédą́ą́' biniyé ałnáájídáhígíí álíleego bee ééhózingo bee nahadláii t'áadoo bíkajiyáa da, nidi t'óó honoojíijigo jidéé'į́į́'.

² Nít'éé' Béílam hajííghalgo Ízrel bidine'é danilínígíí bik' ehgo dabiníbaal yii' dabighango dziiłtsą́, áko Diyin God biNíłch'i hak'i hoole'.

³ Áádóó hane' bee ak'idi'dootį́įłii baa ahozhniilne'go ájíní, Bíyor biye' Béílam kódííniid; bił ééhózingo oo'íinii ání:

⁴ kóní, Diyin God bizaad yidiizts'ą́ą'ii éí Aláahgo Ayóó'ábóodziilii bił ádzaago yiyiiłtsą́ągo ni'jį' íítłizh, nidi t'áá yiníł'į́:

⁵ Jéíkab dine'é nohłíinii, dooládó' nihiníbaal danizhóní da; Ízrel dine'é nohłíinii, dooládó' nihighan nizhóní da!

⁶ Téehgi át'éego índa tooh nílį́ bibąąhgóó dáda'ak'ehígi át'éego, Bóhólníihii éí álooz naazkaadii k'eiidííláigi át'éego, índa tábąąhgóó gad yíl'áhígi át'éego k'ee'ąą nídeel'á.

⁷ Bida'ásaa' bii'dóó tó wó'ą yííłį́į doo índa t'óó ahayóí tooh danílínígíí bibąąhgóó ba'áłchíní náás ahoolchíiłii kéédahat'į́į doo. Aláahgo binanit'a'í éí Éígag aláahgo naat'áanii nilíinii yiláahgo ayóó át'ée doo, índa bibee óhólníihgo bił haz'áanii ts'ídá ayóó át'éego haz'ą́ą doo.

⁸ Diyin God éí Ííjip kéyahdę́ę́' ch'ééhoní'eezh; jó, béégashii ałchinii bidee' báhádzidii há nahalin; ał'ąą dine'é hwe'ana'í danilíinii ałtso íidoołdįįł, índa dabits'in niidiyootih, áádóó bik'aa' yee yigházdiyoołt'oh.

⁹ Náshdóítsoh bitsiijį' ditł'ooígíí ayóó át'éegi át'éego sitį́, áádóó náshdóítsoh át'éhígi át'éego háishą' nábididoołt'eeł? T'áá háiida nik'ijidlíii bik'ihojidlíi doo, índa t'áá háiida hóyée'go ná haadzíi'ii hóyée'go bá ha'doodzih.

Béílam áhodooníiłii yaa hoolne'

¹⁰ Áko Béílak éí Béílam yich'į' báhóóchįįdgo bíla' yee ahíideezkadgo Béílam ííłní, Shi'ana'í bidíníídzįįł biniyé níká i'ííł'a'; shoo, díí táadi t'óó bik'ijiisínídliid.

¹¹ Éí bąą k'ad nílááh, náálwoł; jó, ayóó át'éego ił nílį́įgo ándeeshłííł nisin nít'éé', nidi ił ídlį́ bits'ą́ąjį' Bóhólníihii t'ą́ą́' ánóhsin nít'éé'.

¹² Ákohgo Béílam éí Béílak áyidííniid, Shą́ą́', ná hane' nidei'áhí shich'į' ííníł'a' yę́ę kóbidííniid ni'.

¹³ Azhą́ béésh łigaii áádóó óola éí Béílak bikin bii' hadeezbingo sheidee'aah nidi, Bóhólníihii yee haadzíi'ii bilááhgóó t'áá shí shíniik'eh yá'át'éehgi, doodaii' doo yá'át'éehgi ádeeshníłígíí doo bíneesh'ą́ą da; Bóhólníihii yee haadzí'ígíí t'éiyá bee hadeesdzih.

¹⁴ Jó, k'ad shidine'é bich'į' déyá; hágo, díí bee nił ch'íhonish'aah: beiníłką́ądi díí dine'é éí nidine'é kódeidoolííł.

¹⁵ Áádóó Béílam éí hane' bee ak'idi'dootį́įłii yaa áho'niilne'go ání, Bíyor biye' Béílam kódííniid; bił ééhózingo oo'íinii ání,

¹⁶ kóní, Diyin God bizaad yidiits'a'ii áádóó Aláahgo Ayóó'át'éii bits'ą́ą́dóó ił ééhózin bił bééhózinii índa Aláahgo Ayóó'ábóodziilii ił ádzaii yiníł'íinii ni'jį' íítłizh, nidi t'áá yiníł'į́:

¹⁷ Yiideestsééł, nidi k'ad éí dooda; dínéesh'įįł, nidi áyídíjį' éí dooda; Jéíkab dine'é bits'ą́ą́dóó Sǫ' hadoogááł índa Ízrel dine'é bits'ą́ą́dóó Naat'á Gish hahodooleeł; éí t'áá ałch'ishjí Mó'ab dine'é atíidoolííł áádóó Sheth dine'é t'áá ałtso iidoołdįįł.

¹⁸ Íídam dine'é áádóó bikéyah Síyer hoolyéegi hweda'ana'í bíí' dazhdooleeł, nidi Ízrel dine'é éí ts'ídá doo nídanilyées da doo.

¹⁹ Jéíkab dine'é bits'ą́ą́dóó bóhólníih dooleełii hahodooleeł; kin haal'áagi dadzidziihígíí áhodi'dooldįįł.

²⁰ Ákohgo Ámalek dine'é yich'į'go náádéét'į́į'go hane' bee ak'idi'dootį́įłii yaa nááhálne'go ání, Ał'ąą dine'é bitahdóó Ámalek dine'é dajílíinii hó alą́ąjį' ts'ídá bidziilgo dah jookah nít'éé', nidi nihoolzhíishdi hool'áágóó áhodi'dooldįįł.

²¹ Áádóó Kííni dine'é yich'į'go náádéét'į́į'go hane' bee ak'idi'dootį́įłii yaa nááhálne'go ání, Kééhót'į́įgi nihoníłdzil ni, índa tsétáht'ahgi nit'oh dah síní'ą́.

²² Ákót'ée nidi Ásher dine'é yisnááh ániilaago adanizlóozjį' Kííni dine'é éí t'áadoo nídoodleełí da.

²³ Áádóó Béílam éí hane' bee ak'idi'dootį́įłii yaa nááhalne'go ání, Yíiyáhą́ą Diyin God díí yaa nídiidzáago háísh hináa doo?

²⁴ Nidi Kítim tábąąhdę́ę́' tsinaa'eeł nihidoo'ołgo Ásher dine'é áádóó Ííber dine'é yich'į' nahodiyoołnaał, áko hó ałdó' hool'áágóó áhodi'dooldįįł.

²⁵ Ákohgo Béílam nídii'na'go t'áá bí bighangóó anáádzá; Béílak ałdó' dah nídiidzá.