NUMBERS 22 - Navajo Bible

Béílak éí Béílam yíká i'ííł'a'

¹ Áádóó Ízrel dine'é dah náádii'náago Jériko kin haal'áii binaashiijí Jórdan tooh nílíní ha'a'aahjígo Mó'ab kéyah nidzisgaigi niníná.

² Áko Zípor biye' Béílak wolyéii Ízrel dine'é éí Ámor dine'é ádayííł'įįdígíí t'áá át'é bił bééhózin.

³ Ákohgo Mó'ab dine'é éí t'óó báhádzidgo bił yéé' dahazlį́į́', háálá Ízrel dine'é ayóó ánéelą́ą'go yinééł, áádóó Mó'ab dine'é éí Ízrel dine'é yik'ee yéé' bii' dahazlį́į'go niseekai.

⁴ Áko Mó'ab dine'é éí Mídiyan dine'é hastóí aląąjį' naazíinii ádeidííniid, K'ad díí diné t'óó ahayóí. Béégashii éí tł'oh ałtso yaa nahodikahígi át'éego yinéłígíí nihinaagóó kéédahat'ínígíí ałtso yił nidínóodah. Áko Zípor biye' Béílak wolyéii éí íídą́ą́' Mó'ab dine'é aláahgo yinanit'a'í nilį́į́ nít'éé';

⁵ éí bąą hane' nidei'áhí dah deidiyiił'a'go bidine'é ba'áłchíní dabikéyahgi tooh nílínígíí bíighahgi Pííthor hoolyéejį' Bíyor biye' Béílam wolyéii hágo deididooniił biniyé yíká i'ííł'a'go ání, Jó, Ííjip kéyahdę́ę́' dine'é léi' ch'ídahaazná; jó, kwe'é kéyahgóó t'áá át'é yíl'á, áko shinaashiidę́ę́' nidahaazná.

⁶ Éí bąą k'ad nánooshkąąh, shaa díínááł; díí dine'é shá bidíníídzįįł, háálá shilááh ádabóodziil; t'áá shį́į́ bik'eh dideeshdleełgo bik'idiyaa dadiidleeł, áádóó kéyahdóó ch'íhodínéeshkał; jó, t'áá háiida bik'idahojidliihígíí éí bik'idahojidliih, índa t'áá háiida hóyée'jį' bá handzihígíí éí hwíínídziih.

⁷ Áádóó Mó'ab dine'é índa Mídiyan dine'é hastóí aląąjį' naazíinii éí na'ídídóokił biniyé bee iidookąąłii dah deidiijaa'go Béílam yaa yíkaigo Béílak áníinii yee yił dahoolne'.

⁸ Áko Béílam áhodííniid, T'áá kǫ́ǫ́ danihiidoołkááł, áko Bóhólníihii shich'į' yee haadzí'ígíí éí bee nihił náhodeeshnih. Ákohgo Mó'ab dine'é aląąjį' naazíinii éí Béílam bighangi dabiiską́.

⁹ Áádóó Diyin God éí Béílam yaa honíle'go ííłní, Diné nił naháaztánígíí lá háí ádaat'į́?

¹⁰ Áko Béílam éí Diyin God ííłní, Zípor biye' Béílak éí Mó'ab dine'é aláahgo binanit'a'í nilį́įgo shaa'níł'a'go ání,

¹¹ Shoo, Ííjip kéyahdę́ę́' dine'é léi' ch'ídahaaznáago éí kwe'é kéyahgi t'áá át'é yíl'á, áko k'ad shaa nínáahgo shá bidiníídzįįł; t'áá daats'í bik'eh dideeshdleeł bíneesh'ą́ągo shaa ch'íhidoojah.

¹² Áádóó Diyin God éí Béílam ííłní, Doo bił nihidííkah da; díí dine'é doo bidíníídzįįł da, háálá éí bik'idahojisdli'.

¹³ Abínígo Béílam nídii'na'go Béílak bits'ą́ą́dę́ę́' naat'áanii yíkaígíí ííłní, Nihílááh, nihikéyahgóó nídóhkááh; jó, nihił nihéédeeshkahgi t'áadoo Bóhólníihii shadi'ní'ą́ą da.

¹⁴ Ákót'éego Mó'ab dine'é binanit'a'í danilíinii dah nídiikaigo Béílak yaa nákaigo ádaaní, Béílam éí doo nihił nihideeshkah da, nihiłní.

¹⁵ Nít'éé' Béílak éí naat'áanii átséhígíí bilááh ánéelą́ą'go t'áá íiyisí aláahgo ił danilíinii anááyííł'a'.

¹⁶ Áko éí Béílam yaa yíkaigo ádeidííniid, Zípor biye' Béílak kóní, Baa nánooshkąąh, bíni' t'áadoo naniníłtł'aaígóó shaa nínááh,

¹⁷ háálá t'áá íiyisí ayóó át'éego ił ídlį́ bee náás nideesht'eeł, áádóó t'áá áshidinínígi ádeeshnííł, áko t'áá shǫǫdí, shaa nínáahgo díí dine'é shá bidíníídzįįł.

¹⁸ Áádóó Béílam éí Béílak yá nidaal'a'ígíí áyidííniid, Azhą́ béésh łigaii áádóó óola Béílak bikin bii' hadeezbingo sheidee'aah nidi, Bóhólníihii shiDiyin God áníinii doo bi'oh, doodaii' doo bilááh ádeeshłíił da.

¹⁹ Éí bąą k'ad t'áá shǫǫdí, t'áá kǫ́ǫ́ danihiyółkááł, áko átsé shił bééhodoozįįł: Bóhólníihii ha'át'íí nááshididoo'niił.

²⁰ Áko Diyin God éí tł'ée'go Béílam yaa honíle'go ííłní, Diné naa yíkaigo tį' dandííniidgo nídidíí'nahgo bił dah nídidííkah, nidi saad bee nich'į' hahasdziihígíí t'éiyá bi'íínísin doo.

Diyingo naal'a'í áádóó Béílam bitélii

²¹ Áádóó abínígo Béílam nídii'na'go bitélii yik'i dah aznil áádóó Mó'ab dine'é bindanit'a'í yił dah diikai.

²² Nidi dashdiiyáhígíí biniinaa Diyin God báhóóchįįd, áko Bóhólníihii bidiyingo naal'a'í hak'ijį' nilį́įgo hadáahgi yiizį'. Áko télii hoł yildlosh áádóó há naal'a'í nidilt'éego hoł yikah.

²³ Áko télii éí Bóhólníihii bidiyingo naal'a'í diltłish dah yootį́įłgo atiingi sizį́įgo yiyiiłtsą́, áko télii éí atiin k'ee'ąą haaldloozhgo t'áá áhoodzaajigo hoł niheeldloozh, nít'éé' Béílam éí atiinjį' télii bił anídooldloosh biniyé télii yijaat'ah adziisxaal.

²⁴ Nidi ch'il na'atł'o'ii yíl'áhígíí bita'gi tsé ałts'ą́ą́hjí yítł'ingo atiinígi Bóhólníihii bidiyingo naal'a'í yiizį'.

²⁵ Áko télii éí Bóhólníihii bidiyingo naal'a'í yiyiiłtsą́ągo tsé yítł'inígíí hoł yídeezgohgo tsé bik'ijį' Béílam bikee' yishjizh, áko Béílam éí télii yijaat'ah anáádziisxaal.

²⁶ Áádóó Bóhólníihii bidiyingo naal'a'í náás náádeesdzáago t'áá íiyisí áhoołts'óózígo ahóót'i' léi' góne' yiizį'go nish'náajigo índa nishtł' ajigo doo dashdooya' át'éégóó dáádinízį́.

²⁷ Áko télii éí Bóhólníihii bidiyingo naal'a'í yiyiiłtsą́ągo Béílam yił neeztį́įgo Béílam báhóóchįįdgo bigish yee télii néineesxaal.

²⁸ Áádóó Bóhólníihii éí télii hayiyííłdzíi'go Béílam ííłní, Haash niishłaago díí táadi náshiníníłhaal?

²⁹ Áko Béílam éí télii ííłní, Jó, t'óó shá nahółt'i', éí bąą; diltłish ła' dah naashtingo éí k'ad nidiyeeshxééł nít'éé'.

³⁰ Áádóó télii éí Béílam ííłní, Da' doósh nitélii nishłį́įgo níí' sélį́į́' bijį́į́dóó wóshdę́ę́' díí jį́įjį' tándííyį́į da? Łahdaásh kóniishłaa? Ákohgo, Nidaga', jidííniid.

³¹ Nít'éé' Bóhólníihii éí Béílam bináá' yee iidoołtséełgo áyiilaa índa Bóhólníihii bidiyingo naal'a'í diltłish dah yootį́įłgo atiingi dáádinízį́įgo jiiłtsą́, áko ni'jį' tsé'yaa jineeshjool.

³² Áádóó Bóhólníihii bidiyingo naal'a'í áhodííniid, Ha'át'éegoshą' táadi nitélii náníníłhaal? Jó, nich'ą́ą́h nideeshááł biniyé naa honíle', háálá doo ts'ííd ánít'éégóó ninísh'į́.

³³ Áko díí télii náshiiltséehgo táadi shik'ee'ąą hááyá; éí t'áadoo ákódzaagóó niyéłhį́į́ shį́į́ doo nít'éé'; bí éí t'áá hináa doo.

³⁴ Áádóó Béílam éí Bóhólníihii bidiyingo naal'a'í ííłní, Ádił asésiih; jó, shidáádíínízínígíí doo shił bééhózin da lá, nidi k'ad yisháłígíí doo nił yá'át'ééhgóogo t'óó t'ą́ą́' nihéédeeshdááł.

³⁵ Bóhólníihii bidiyingo naal'a'í Béílam ííłní, Nílááh, diné bił yíkah, nidi saad bee nił hashne' dooígíí t'éiyá bee hahídziih doo. Kót'éego Béílam éí Béílak yił naat'áanii danilíinii bił dah náázhdiikai.

Béílam áádóó Béílak

³⁶ Áko Béílak éí aadę́ę́' Béílam yigáałgo yaa hodiizts'ą́ą́', áko Mó' ab kéyah biyi' kin haal'áhídi Árnan tooh nílíní bee hoodzooígi yidááh doogáałgo ákǫ́ǫ́ dah diiyá.

³⁷ Béílak éí Béílam ííłní, Da' doósh t'áá íiyisí shaa díínááł nidideeshniił biniyé nich'į' i'ííł'a' da? Ha'át'éegoshą' t'áadoo shéíníyáa da? Ił ídlíinii bee náás nideesht'eełígíísh doo bíneesh'ą́ą da?

³⁸ Áádóó Béílam éí Béílak ííłní, Jó, k'ad kǫ́ǫ́ naa níyá; k'adísh shí bee óhólnííh shee hólǫ́ǫgo bee hadeesdzih? Jó, Diyin God éí saadígíí shizeidooléełgo bee yáshti' doo.

³⁹ Áko Béílam éí Béílak bił dashdii'áazhgo Kírjath-házath kin shijaa'jį' jiní'áázh.

⁴⁰ Áádóó Béílak éí béégashii áádóó dibé nááyiisnii', áádóó Béílam índa naat'áanii hoł naakaígíí ałdó' ła' ya'níłtsood.

⁴¹ Áko biiskání Béílak éí Béílam yił dah dii'áazhgo Béíyal e'elyaii yich'į' ninádahałaah doo biniyé wódah nahaz'ą́ągo ádayiilaadóó Ízrel dine'é t'áá dah yinééł nít'éé' yizdoołtsééł biniyé ákóde hoł haazh'áázh, ndi t'áadoo ałtso jiiłtsą́ą da.