NUMBERS 14 - Navajo Bible

Ízrel dine'é éí Bóhólníihii yich'į' nidaalteeh

¹ Áko Ízrel dine'é dah yinéłígíí t'áá ałtso yéego hahodííłdláád áádóó tł'éé' bíighah daachago yiską́.

² Áádóó Ízrel dine'é t'áá dah yinééł nít'éé' Mózes áádóó Éran yich'į' saad dahasłį́į'go ádahodííniid, T'áá Ííjip kéyahdi danee'náago nihá yá'át'éeh doo nít'éé', doodaii', Díí honoojíigi danee'náago nihá yá'át'éeh doo nít'éé'!

³ Ha'át'íí lá biniyé Bóhólníihii díí kéyahjį' ch'ínihiní'eezh? Da' dilt łishísh bee naa'adanihízdiyoolghałgo nihida'asdzą́ą́ índa nihada'áłchíní yisnááh dadooleeł? T'óó Ííjip kéyahgóó nihéédahaakaigo nihá yá'át'éeh doo nít'éé'.

⁴ Ákohgo t'áá bí áda'ahidoo'niid, Haa'íshą' nihinanit'a'í ła' nidadiiltéełgo Ííjip kéyahgóó háni'dii nihéénihidoo'ish.

⁵ Nít'éé' Mózes áádóó Éran éí Ízrel dine'é dah yinéłígíí t'áá ałtso binááł tsé'yaa jineeshjool.

⁶ Áko Nan biye' Jáshowa áádóó Jiifáneh biye' Kéíleb éí atah kéyah hajíísidígíí ha'éé' ák'i nijooldláadgo

⁷ Ízrel dine'é dah yinéłígíí t'áá ałtso bich'į' hadzoodzíi'go ájíní, Kéyah hadadiilził biniyé biyi'góó hadiikaígíí kéyah t'áá íiyisí ayóó áhonóolnin.

⁸ Bóhólníihii nihaa bił hózhǫ́ǫgo díí kéyah nihaididoo'áałgo yiih nihidoo'ish; éí kéyah yá'áhoot'éehgi abe' índa tsés'ná bitł'izh bee áda'azįįdgo haz'ą́.

⁹ Áko t'áadoo Bóhólníihii bich'į' nidaałteehí, doodaii' díí kéyah yii' kéédahat'íinii t'áadoo bik'ee nihił daayé'í, háálá éí nihibááh dajílį́; ádích'ą́ą́h nideilyéé nít'éé' yę́ę bits'ą́ąjį' kódzaa; nihí éí Bóhólníihii nihił hólǫ́; t'áadoo nihi'ana'í bik'ee nihił daayé'í.

¹⁰ Nidi t'áá dah yinééł nít'éé' ádadííniid, Tsé bee bił nidaznołne'. Ákohgo níbaal bii' dahozdísinii bii'jį' Ízrel dine'é t'áá ałtso binááł Bóhólníihii yee ayóó át'éii yit'íní silį́į́'.

¹¹ Áko Bóhólníihii éí Mózes ííłní, Haa nízáagishą' díí diné shił nida'í'įįh doo? Haa nízáadishą' índa dashiizhdoodląął? Jó, bee éédahózinii t'áá át'é dahatahgi hoł ííshjání ádaashłaa.

¹² Naałniih bee ádahodeeshdįįłgo, doo shidine'é dajílį́į da doo, áko ni éí dahaláahgo nits'ą́ą́dóó náás ahoolchíiłii ayóó át'éego bidziilgo ádeeshłííł.

¹³ Áádóó Mózes éí Bóhólníihii ííłní, Áko haniih ákwíinilaago Ííjip dine'é yaa dahodidoots'į́į́ł; (jó, nibee adziilii bee éí hatahdóó díí dine'é ch'ííní'eezh,)

¹⁴ áko díí kéyahgi kéédahat'ínígíí yił dahodoolnih; Bóhólníihii nílíinii, díí dine'é bitahgi honílǫ́ǫgo naa dahodiizts'ą́ą́'; Bóhólníihii nílíinii, ni'doot'į́įgo nits'ą́ą́dóó k'osígíí bik'i dah yildohgo índa bilą́ąjį' jį́įgo k'os níyizgo áádóó tł'ée'go kǫ' níyizgo bee hóóleełgo naa dahodiizts'ą́ą́'.

¹⁵ K'ad diné t'áá łá'í dziisxínígi át'éego díí dine'é t'áá ałtso nisíníłtseedgo ał'ąą dine'é naa dahodidoots'į́įłgo ádadidooniił,

¹⁶ Bóhólníihii éí díí dine'é kéyah biih nihideesh'ish yiłníigo, yich'į' ádee hadoodzíi'ii doo yínéés'ąądgóó, éí bąą honoojíigi neistseed.

¹⁷ Ákohgo k'ad, baa nánooshkąąh, bíni'dii shiBóhólníihii nílíinii, bee nidziilii ayóó át'ée le'; jó, adííníniidígíí bik'ehgo háínídzíí'.

¹⁸ Bóhólníihii éí nízaadgóó ha'ólní áádóó ayóó át'éego aa a'ááh nízin, índa doo ákwii áhát'íinii áádóó bee haz'áanii hetíihii á yóó'ahizhdi'aahii jílį́, nidi diné ła' ha'át'e'ígíí ts'ídá doo hąąh ádin áhóle' át'ée da; da'azhé'é doo ákwii ádáát'įįdígíí ba'áłchíní náás ahoolchíiłii táadi índa dį́įdi ałk'i ná'azhchį́įjį' bik'i hwiileehgo yá nináhwii'nííł.

¹⁹ Bá yóó'anídí'aah, baa nánooshkąąh; díí diné doo ákwii ádáát'įįdígíí bee aa a'ááh nínízinii ayóó át'éii bik'ehgo bá yóó'anídí'aah, áádóó Ííjip kéyahdóó ch'ínínáádóó díí jį́įjį' ákódaat'íinii bá yóó'anídiyí'aahígi át'éego yóó'anídí'aah.

Diyin God éí Ízrel dine'é atíyiilaa

²⁰ Ákohgo Bóhólníihii ání, Nizaad k'ehgo bá yóó'anídíí'ą́,

²¹ nidi t'áá aaníí hinishnánígi át'éego nahasdzáán t'áá át'éé nít'éé' bii' Bóhólníihii yee ayóó át'éii hadeezbin doo.

²² Díí dine'é t'áá ádzíłtso Ííjip kéyahdi áádóó honoojíigi bee ayóó ánísht'éii índa álíleego í'iishłaaígíí dajiiłtsą́ą nidi, díí k'ad neeznáadi shínídaneeztą́ą'go ádíshnínígíí doo dayíísts'ą́ą́'góó naaldeeh.

²³ Dabizhé'é yę́ę kéyah baa dideesh'áałgo bee bich'į' ádee hadeesdzí'ígíí ts'ídá doo deizdoołtséeł da índa éí shá nídahojiłchįįh yę́ę doo ła' kéyahgi hwiizdoołtséeł da,

²⁴ nidi shá naal'a'í, Kéíleb, éí t'áá sahdii át'éego biyi' honít'i'ígíí áádóó t'áá aaníí shikéé' yigáłígíí bąą kéyah yii'góó tádííyáhígíí bił biih deesh'ash, índa ba'áłchíní náás ahoolchíiłii daabí doo.

²⁵ (Íídą́ą́' Ámalek dine'é áádóó Kéínan dine'é deíldzis góyaa kéédahat'į́.) Yiską́ągo Tónteel Łichíí' bich'į' bíhodíłgizgo honoojíí góne' aní'doohnééł.

²⁶ Áádóó Bóhólníihii éí Mózes áádóó Éran yich'į' haadzíi'go ání,

²⁷ Haa nízáagishą' díí doo yá'áshónígi ádaat'į́įgo dah yinéłígíí shik'ijį' danilį́įgo saad dahółǫ́ǫ doo? Ízrel dine'é shik'ijį' danilį́įgo saad dahółǫ́ǫgo shik'ijį' yádaałti'go diséts'ą́ą́'.

²⁸ Kóbidohní, T'áá aaníí hinishnánígi át'éego, ní Bóhólníihii, ákót'éego yádaałti'go nihidiséts'ą́'ígi át'éego t'áá ádadohnínígi ánihideeshłííł.

²⁹ Díí honoojítahgi danihits'íís dadínóonééł; jó, danihi'déélta'ígíí t'áá ánółtso naadiindóó yówehgo nihéédááhaii shich'į' saad dahonohłǫ́ǫ́ nít'e'ígíí nanihídoodįįł.

³⁰ T'áá aaníí doo ła' kéyah biih doohkah da. Díí kéyah bii' kéédahoht'į́į doo, dishníigo bee ádee haasdzíí' nít'éé'; t'áá hazhó'ó Jiifáneh biye' Kéíleb áádóó Nan biye' Jáshowa t'éiyá yah adoo'ash.

³¹ Nidi nihada'áłchíní t'éiyá, éí azadoohkah dabidohníí nít'é'ígíí, éí ákóne' yah adeesh'ish; éí kéyah doo danoozį́į'ii yéédahodoosįįł.

³² Nidi nihí t'éiyá t'áá kǫ́ǫ́ honoojíigi nihits'íís dadínóonééł.

³³ Áádóó nihada'áłchíní t'éiyá honoojíigi naanáá'néełgo dízdiin nídoohah áádóó doo nihada'ahóodlíí át'éégóó biniinaa honoojíigi danihits'íís dadííyahjį' ti'dahwiidoohnih.

³⁴ Kéyah hadaasíidgo dízdiin yiskánígíí bik'ehgo ła'a jínígíí ła' nááhai bik'eh ní'ą́ągo dízdiin nááhaijį' doo ákwii ádaot'įįdígíí biniinaa nihidahodiit'i'go nídeínóhkáah doo; jó, shí nihá bee nihoní'áanii k'íníti'go nihił béédahodoozįįł.

³⁵ Shí Bóhólníihii nishłíinii haasdzíí', T'áá aaníí, díí doo yá'áshónígi ádaat'ínígíí t'áá ałtso ahíikaigo shik'ijį' danilíinii kóhodeeshłííł; díí honoojíigi ázhdoodįįł; dazhdínóonééł.

Naalchí'í neeznált'éego doo yá'ádaashóonii neezná

³⁶ Áko Mózes éí kéyah hadoolził biniyé ákǫ́ǫ́ diné ajiis'a' nít'é'ígíí áádę́ę́' nákaigo doo yá'át'ééhgóó kéyah yaa dahoolne'ígíí biniinaa t'áá dah oonééł nít'éé' hach'į' saad dahasłį́į́';

³⁷ éí diné t'áá hó doo yá'át'ééhgóó kéyah baa ch'ídahodziiz'ánígíí Bóhólníihii binááł naałniih bik'ee dazneezná.

³⁸ Nidi díí kéyah hadayíísidígíí bitahdóó Nan biye' Jáshowa índa Jiifáneh biye' Kéíleb t'éí t'áá hiná.

Hórmahgi Ízrel dine'é bik'eh hodeesdlį́į́'

³⁹ Áko Mózes éí Ízrel dine'é t'áá ałtso díí ha'iisdzí'ígíí bee bił hojoolne', áko ayóó át'éego chaał hahóół'á.

⁴⁰ Áádóó t'ah abínídą́ą́' nídiijée'go dziłghą́ą́' góde haaskaigo ádaaní, Jó, kǫ́ǫ́ neiikai; Bóhólníihii nihaa hodiní'ání góde hadiikah daniidzin, háálá ádił da'siilziih.

⁴¹ Ákohgo Mózes ání, K'ad ha'át'éegoshą' Bóhólníihii bibik'eh ó'oo'níiłii ts'ídá dahohtííh? Ákondi yá'át'éehgo doo nihá áhodooníił da.

⁴² T'ááká ákǫ́ǫ́ hasohkááh lágo, háálá Bóhólníihii doo nihitah hólǫ́ǫ da, ákondi ak'eh dahonoł'į́įgo nihi'ana'í binááł doo ánihidi'dooldįįł da.

⁴³ Háálá Ámalek dine'é áádóó Kéínan dine'é nihidáahdi nidaakai áádóó diltłish yee nihił nidazdiyoołhał; jó, Bóhólníihii bits'ą́ąjį' noojé'ígíí biniinaa Bóhólníihii doo nihił hólǫ́ǫ da.

⁴⁴ Nidi t'áá ákóde hadiikahí daniizį́į'go wók'ą́ąjį' haaskai; ákondi dah oonéłídóó Bóhólníihii bitsits'aa' dílzinii bee aha'deet'áanii bii' sinilii t'áadoo dah deidii'ą́ą da áádóó Mózes ałdó' t'áadoo ch'íníyáa da.

⁴⁵ Nít'éé' Ámalek dine'é áádóó Kéínan dine'é éí wók'ą́ądi kéédahat'ínígíí Ízrel dine'é yich'į' hadáájée'go nideistseed, índa t'áá níléí Hórmahjį' t'ą́ą́' anídeineeskaad.