MATTHEW 9 - Navajo Bible

Jesus éí diné doo bitah nahwii'náanii néidiisá

¹ Áko Jesus tsinaa'eeł yiih yíyáago ha'naa niná'níł'éél, áádóó t'áá bí bikin haal'áajį' nádzá.

² Nít'éé' diné léi' doo bitah nahwii'náágóó bik'i antéhí yik'i sitį́įgo haa deistsooz, áko bida'oodlą' baa ákozniizį́į'go diné doo bitah nahwii'nánígíí ábizhdííniid, Shiye', nił hózhǫ́ǫ le'; ádił ni'iyínílzí'ígíí ná yóó'adoot'ą́.

³ Áádóó jó'akon, bee haz'áanii yínda'niłtinii ła' t'áá biyi'ídi ádadííniid, Díí diné éí Diyin God doo yidósingóó yáłti'.

⁴ Nidi nitsídadzikeesígíí Jesus bił bééhózingo áhodííniid, Ha'át'éegoshą' bąąhági át'éego nihijéí bii' nitsídaahkees?

⁵ Háidíígíishą' doo nantł'agóó bee ha'doodzih? Ádił ni'iyínílzí'ígíí ná yóó'adoot'ą́, ha'nííjí daats'í, éí doodago, Nídii'néehgo dah diinááh, ha'nííjí daats'í?

⁶ Nidi nahasdzáán bikáa'gi Diné Silį́į'ii ádił ni'iidzííh á yóó'iidii'aah yee bóhólníhígíí nihił béédahózin doo nisin. Áko bitah doo nahwii'nánígíí áyidííniid, Nídii'nééh, áádóó bik'i nítéhí nídiiníiłgo nighangóó nídídááh.

⁷ Áko nízhdii'na'go haghangóó dah nízhdiidzá.

⁸ Nít'éé' diné yíl'áhígíí éí dayiiłtsą́ągo nídaasdzííd, áádóó Diyin God éí bee óhólnííh ákót'éii nihokáá' dine'é yeidiní'ánígíí bąą Diyin God yaa dahaznih.

Matthew, Shikéé' yínááł, bi'doo'niid

⁹ Áádóó Jesus dashdiiyáago joogááł, nít'éé' diné léi' Matthew wolyéego, tax nahalyéhígi sidáago jiiłtsą́, áko ábizhdííniid, Shikéé' yínááł. Áko nídii'na'go hakéé' dah diiyá.

¹⁰ Matthew bighan góne' Jesus áádóó bídahooł'aahígíí bił da'jiyą́ą́ nít'éé', jó'akon, tax nahalyéhígíí yiniyé naazdáii índa bąąhági ádaaníiłii t'óó ahayóí neheeskaigo hoł ida'niiyą́ą́'.

¹¹ Áko Férisii danilíinii éí dayiiłtsą́ągo hódahooł'aahii ádeidííniid, Ha'át'éegoshą' nanihizhnitinígíí tax nahalyéhígíí yiniyé naazdáii índa bąąhági ádaaníiłii bił da'jiyą́?

¹² Nidi Jesus éí yidiizts'ą́ą'go ádííniid, Diné doo bąąh dah nidahaz'ánígíí azee' ííł'íní doo yich'į' dadikáah da, nidi bąąh dah nidahaz'ánígíí t'éiyá.

¹³ Nidi nihílááh, díí ááhyiłníinii nihił béédahoozįįh, Aa a'ááh hasin éí nisin, nááhániihii éí dooda. Háálá ts'ídá t'áá ákogi ádaat'éii doo bíká ádideeshniił biniyé níyáa da, nidi bąąhági ádaaníiłii, Łahgo át'éego Diyin God bich'į' tsíńdadohkeesgo nihibąąhági át'éii bits'áhóhkááh, bidideeshniił biniyé níyá.

Hodílzingo doo adą́ągi bína'ídíkid

¹⁴ John bídahoo ł'aahii kódaaníigo Jesus yaa yíkai, Ha'át'éegoshą' nihí áádóó Férisii danilíinii t'áá ahą́ą́h hodílzingo doo adánígíí bee ádá nídahwiil'aah, ákondi ni nídahooł'aahii doo ákódaat'į́į da?

¹⁵ Áádóó Jesus áhodííniid, Iiyehii t'ah hoł naakaigo iigehgi nidahaaskaígíísh yínííł danilį́į doo? Nidi beidoołkááł, iiyehii hats'ą́ą́' nídidooltéełgo índa dahodísingo doo da'ayą́ą da doo.

¹⁶ Diné ła'da ha'éé' haastihgo adańdadit'a'í ániidíígíí doo bidańdazhdidoo'áał da, háálá bidazhdiní'ánígíí bits'ádoodlałgo ha'éé' íídládígíí t'óó yówehda adoodlał.

¹⁷ Índa wáin ániidíii tó abid hadaastihii doo biih yikaah da; ákódziidzaago tó abid dadooldoh, áádóó wáin yóó'íína' doo, áádóó tó abid t'áá ádzaaí dadooleeł, nidi wáin ániidíii tó abid ádaaniidíii biih yikááh, áko t'áá áłah nízaadgóó choo'į́.

Naat'áanii bitsi' áádóó asdzání Jesus bi'éé' yideelchidii

¹⁸ Ákót'éego bich'į' yájíłti', nít'éé' naat'áanii léi' haa níyáago hach'į' nitsidinígo'go ání, Áníídí yee' shitsi' daaztsą́, nidi tį' ákǫ́ǫ́ diit'ashgo bik'i dah didíílnih, áko hinááh nídoodleeł.

¹⁹ Áko Jesus nízhdii'na'go hódahooł'aahii bił bikéé' dashdiikai.

²⁰ Nít'éé' asdzání léi' dił bighá nídiniiltałgo naakits'áadah nááhai lá, éí hane'dę́ę́' niníyáago ha'éé' bijánil yideelchid,

²¹ háálá t'áá biyi'ídi ádííniid, Bi'éé' t'éiyá bidinishchid nidi, hadaałt'é ánáshidoodlííł.

²² Nidi Jesus názyizgo honíł'į́įgo áháłní, Shitsi', nił hózhǫ́ǫ le'; ne'oodlą' bee doo ánít'éhí da násínídlį́į́'. T'áá áko éí asdzání doo át'éhí da ánábi'diilyaa.

²³ Áádóó Jesus éí naat'áanii bighandi jiníyáago dilní bee í'dílzoołí yee nidaanéhígíí áádóó diné áłah silį́'ígíí hahóół'áago jiiłtsą́,

²⁴ áko ábizhdííniid, Ch'ínóhkááh; jó, at'ééd doo daaztsą́ą da, t'óó ałhosh. Nidi t'óó haa daadloh.

²⁵ Áko diné áłah silį́'ígíí ch'íneelkaadgo yah ajííyáago, at'ééd yę́ę bíla' jiiłtsoodgo nídii'na'.

²⁶ Áko éí kéyah t'áá níłtéél nít'éé' bee baa hane'go nidadeezdláád.

Diné doo oo'íinii nidilt'éego oo'į́ ánábi'diilyaa

²⁷ Áádóó Jesus joogááł, nít'éé' diné naaki doo oo'į́į́góó hakéé' yi'ashgo, dilwoshgo kóní, David biYe' nílíinii, nihaa jiiníbaah.

²⁸ Áádóó hooghan góne' yah ajííyáago, diné doo oo'íinii haa ní'áázh, áko Jesus áháłní, Díí baa nideeshaałígíísh bíneesh'ą́ągo yinohdlą́? Nít'éé' áháłní, Aoo', Bóhólníihii.

²⁹ Áko kójíníigo bináá' bizhdeelchid, Iinohdlánígíí bik'ehgo nihá ádoonííł.

³⁰ Áko ajoo'į́ ánáhoodlaago Jesus hach'į' haadzíi'go áháłní, T'ááká diné ła' bił bééhoozį́į́' yíila'.

³¹ Nidi dah dii'áazhgo éí kéyah t'áá níłtéél nít'éé' bee haa ha'niihgo haa nahasne'.

Diné doo yáłti'ii yáłti' ánábi'diilyaa

³² Áádóó dashdiikai, nít'éé' diné ła' níłch'i bi'iiníziinii bii' hólǫ́ǫgo doo yáłti' da léi' yił haa daaskai.

³³ Áko níłch'i bi'iiníziinii hanoolchą́ą'go, diné doo yáłti' da yę́ę yáłti' silį́į́', áko diné áłah nilínígíí kódaaníigo t'óó bił adahayóí, Ízrel dine'é bitahgi t'ah doo ákóhánéehgo yiiltséeh da.

³⁴ Nidi Férisii danilíinii ádadííniid, Níłch'i bida'iiníziinii binanit'a'í bibee adziil bee níłch'i bida'iiníziinii hahizhniłkaad lá.

Jesus éí diné baa a'ááh jiniizį́į́'

³⁵ Áko nít'éé' kin hadaas'áágóó índa kin naazhjaa'góó t'áá ałtso kéédahat'ínígíí kin yii' áłah nídaadleehí naaznilgóó Jesus nazh'nitingo, áádóó yá'ąąshii bee bóhólníihgo bił haz'áanii baa hane' yá'át'éehii baa hojilne'go, índa diné bitahgóó naałniih bąąh dahólóonii t'áá ałtso, áádóó ka nidaakaígíí t'áá ałtso hadaałt' é áńdajidle'go tázhdííyá.

³⁶ Nidi diné yíl'áhígíí jiiłtsą́ągo baa a'ááh jiniizį́į́', háálá dibé yaa áhályáanii ádin nahalingo bich'į' nidahwii'ná áádóó t'áadoo bíká oolyeedí da.

³⁷ Áko hódahooł'aahii ábijiní, T'áá íiyisí da'neest'ą́, nidi da'dooyishii t'áá díkwíí.

³⁸ Éí bąą agizh bee Bóhólníihii bá da'dooyishígíí bidá'ák'ehgóó iidiyooł'aałgi bíká sodadołzin.