MATTHEW 22 - Navajo Bible

Iigehgo áda'azįįd binahjį' hane' bee ak'idi'dootį́įłii

¹ Nít'éé' Jesus kóníigo hane' bee ak'idi'dootį́įłii yee hach'į' hanáánáádzíí',

² Yá'ąąshii bee bóhólníihgo bił haz'áanii díí bił ahąąh naa'nilgo baa nitsáhákees, éí aláahgo naat'áanii léi' biye' iiyehgo yá áda'íísįįd,

³ áko iigehgo áda'azįįdjį' bida'asnii'ígíí hágo dabidi'doo'niił biniyé bá nidaal'a'í ayiis'a', nít'éé' áádę́ę́' doo dabíni' da.

⁴ Áko kóníigo náá'áłdó' nidaal'a'í náánáła' anááyiis'a', Bida'asnii'ígíí ádabidohní, Jó'akon, shiye' bá áda'niidą́'ígíí k'ad hasht'eeshłaa, shibéégashii índa shibéégashii yáázh daneesk'ahígíí nidaaztseed, áádóó ałtso hahodidzaa; hágo, iigehgo áda'azįįdjį' dadohkááh.

⁵ Nidi t'áadoo yaa nídaast'įįdí t'óó dah dahidiikai, ła' bidá'ák'ehgóó dah diiyá, ła' baa na'iiniihgóó dah diiyá,

⁶ náánáła' éí naat'áanii bá nidaal'a'ígíí deisiłgo t'áá na'níle'dii nideistseed.

⁷ Áko aláahgo naat'áanii báhóóchįįd, áádóó bisiláo ákǫ́ǫ́ yiyííł'aadgo nida'astseedígíí dayííghą́ą́', índa bikin haal'áhígíí yits'ą́ą́' deidííłid.

⁸ Ákohgo bá nidaal'a'ígíí áyidííniid, Iigehgi ałtso hahodidzaa, nít'éé' bida'asnii'ígíí éí doo yą́ą́h danilį́į́góó áda'diilyaa.

⁹ Éí bąą nihílááh, da'nítiingóó ch'íhóhkáahgo t'áá shódaozt'e'ígi iigehgo áda'azįįdjį' hágo dabidohní.

¹⁰ Áko éí nidaal'a'í da'nítiingóó aheeskaigo, diné doo yá'ádaashóonii índa diné yá'ádaat'éehii t'áá shódaozt'e'ígi t'áá ałtso áádę́ę́' áłah ádayiilaa, áko nidahaaskaígíí iigeh góne' hadéébįįd.

¹¹ Nidi aláahgo naat'áanii hágo dabidoo'niidígíí yidínóoł'įįł biniyé yah ííyá, nít'éé' ákwii diné ła' iigehjį' éé' bee na'adáii doo yee hadít'éégóó yiyiiłtsą́,

¹² áko áháłní, Kwá'ásiní, ha'át'éego lá iigehjį' éé' bee na'adáii t'áágééd yah ííníyá? Áko t'áadoo yee haodziihí da.

¹³ Ákohgo aláahgo naat'áanii bá nidaal'a'í áyidííniid, Bíla' índa bikee' be'ohtł'óogo, tł'óó'dóó nówehjį' chahałheełgóó ahołhan; áadi diné daachxa áádóó biwoo' ahídeidiłk'ash doo.

¹⁴ Háálá lą'í bíká ádahodoo'niid, nidi t'áá díkwíí nídahaasdláá', dííniid.

Síízar bich'į' tax nahalyéhígíí bína'ídéékid

¹⁵ Ákohgo Férisii danilíinii dah diikaigo, T'áá ha'át'éegoda hazaad bee hákadadi'yiilyił, daaníigo yaa nídaast'įįd.

¹⁶ Áko kódaaníigo bíjí bídahooł'aahii índa Hérad yich'ijí danilínígíí hach'į' adeis'a', Na'nitiní, nihił béédahózingo t'áá aaníígóó hólne', áádóó t'áá aaníígóó Diyin God k'ehgo honít'i' bína'níłtin, índa t'áadoo diné ła' bééníldzidí da, háálá diné doo nił ał'ąą át' ée da.

¹⁷ Éí bąą díí haash yit'éego baa nitsíníkeesgo bee nihił hólne'. Síízar bich'į' tax nahalyéegoósh bee haz'ą́, dooda daats'í?

¹⁸ Nidi hwe'áká naat'á éí Jesus bił bééhózingo ádííniid, Nihí t'óó ádahodoł'íinii, ha'át'íishą' biniyé shíkada'iyołhil?

¹⁹ Tax nahalyéii ła' nihá nísh'į́. Áko béeso denériyas wolyéhígíí ła' haa deiz'ą́.

²⁰ Nít'éé' ábijiní, Díishą' háí bitsiits'iin bik'i si'ą́, áádóó háísh bízhi' bikáá'?

²¹ Nít'éé' ádahałní, Síízar lą́ą. Áko ábijiní, Éí lá bąą, Síízar bíhígíí Síízar baa nídahoh'níił ni, áádóó Diyin God bíhígíí éí Diyin God baa nídahoh'nííł.

²² Áko éí saad deidiizts'ą́ą'go t'óó bił adahóóyóí, índa hats'ą́ąjį' dah dahidiikai.

Aninéédę́ę́' náádi'doojahgi bína'ídíkid

²³ Nít'éé' t'áá éí bijį́ Sádjusii danilíinii haa yíkai, éí aninéédę́ę́' doo náá'di'yiijeeh da daaní, áko nidahódééłkidgo

²⁴ kódaaní, Na'nitiní, Mózes áníí nít'éé', Diné ła'da ha'áłchíní t'áadoo haleehí dadziztsą́ągo bił hajíí'áázh éí hwe'asdzą́ą́ nít'éé' yę́ę ts'ídá yá náá'doogeh, áko éí bínaaí yę́ę bá áł chíní hwee hodooleeł.

²⁵ Áko nihitahgi ashiiké tsosts'id yilt'éego t'áá ła' háájéé' lá; alą́ąjį'ígíí azyeh, nidi t'áadoo ba'áłchíní haleehí daaztsą́, áko hatsilí éí hwe'asdzą́ą́ nít'é'ígíí yaa náánádzá.

²⁶ T'áá ákót'éego akéé' góne' índa táá' góne' naagháhígíí ałdó' índa wónáásdóó t'áá tsosts'id yilt'éego ákódáát'įįd.

²⁷ Akéédę́ę́' índa éí asdzání daaztsą́.

²⁸ Áko aninéédę́ę́' náá'di'yiijeeh bijį́įdishą' díí tsosts'id yilt'é yę́ę éí háidíígíí be'asdzą́ą́ jílį́į doo? Háálá t'áá ałtso be'asdzą́ą́ jílį́į́ nít'éé'.

²⁹ Nidi Jesus hach'į' hanáánáádzíi'go áhodííniid, Nida'ayohsííh, háálá Diyin God bizaad bee ak'eda'ashchínígíí índa Diyin God bibee adziilii doo nihił béédahózin da.

³⁰ Jó, aninéédę́ę́' náá'di'yiijeeh baa hoolzhiizhdi, diné doo nááda'dooyeh da, doo nidi ahaa dabi'dii'níił da doo, nidi yá'ąąshdi Diyin God bidiyingo nidaal'a'ígíigi ádajít'ée doo.

³¹ Nidi aninéédę́ę́' náá'di'yiijeeh bídéét'i'gi, Diyin God kóníigo yee nihich'į' haadzíi'iísh t'ah doo dayínółta' da?

³² Shí Éíbraham biDiyin God áádóó Áízak biDiyin God índa Jéíkab biDiyin God nishłį́. Diyin God éí daneeznáanii doo biDiyin God jílį́į da, nidi dahináanii biDiyin God jílį́.

³³ Áko áłah ílínígíí éí deidiizts'ą́ą'go, hana'nitin yik'ee t'óó bił adahóóyóí.

Bik'eh ó'oo'níiłii ts'ídá aláahdi át'éii

³⁴ Nidi hó éí Sádjusii danilíinii t'áadoo yee hanáádaodziihígóó ádajiilaaígíí Férisii danilíinii yaa dahodiizts'ą́ą'go haa áłah silį́į́'.

³⁵ Áko ła', bee haz'áanii yik'eh hoo'į́įgo yína'niłtiní nilį́į́ léi' háka'iiłhilgo nahódééłkid,

³⁶ Na'nitiní, bee haz'áanii biyi'dóoshą' bik'eh ó'oo'níiłii háidíígíí ts'ídá aláahgo bee haz'ą́?

³⁷ Jesus áhodííniid, Nijéí t'áá át'é bee, áádóó nii' sizíinii t'áá át'é bee, índa níni' t'áá át'é bee Bóhólníihii niDiyin God ayóó'ííní'ní.

³⁸ Éí ts'ídá aláahgo áádóó alą́ąjį' bik' eh ó'oo'níiłii át'é.

³⁹ Áádóó naaki góne'ígíí t'áá éigi ánáánát'é, T'áá ni ádíí'ní'nínígi át'éego bił kééhót'íinii ayóó'ííní'ní.

⁴⁰ Áko díí naakigo bik'eh ó'oo'níiłii éí bee haz'áanii t'áá ałtso índa Diyin God yá dahalne'ii bina'nitin t'áá ałtso bitsé siláii át'é.

David biye' bína'ídíkid

⁴¹ Áádóó Férisii danilíinii áłah nilį́įgo łahgo Jesus nahódééłkid,

⁴² kóníigo, Christshą' haa yit'éego baa nitsídaahkees? Éíshą' háí biye'? Áko ádahodííniid, David lá biye' ni.

⁴³ Áko Jesus áháłní, Ákoshą' haa yit'éego David, Níłch'i Diyinii yee Bóhólníihii yiłníigo kóní:

⁴⁴ Bóhólníihii éí shiBóhólníihii áyidííniid, Nida'ana'í bik'i dííníl'eezgo ániishłaajį' shinish'náájí dah sínídá.

⁴⁵ Áko David, shiBóhólníihii hałníigo, ha'át' éegoshą' biye' jílį́?

⁴⁶ Áko diné ła'da saad t'ááłá'í nidi doo yee hach'į' hanáánáodziih át'ée da, índa éí bijį́į́dóó diné t'áá ałtso t'ááłáhígo ninááhódídóołkiłgi nidi hats'ąą dáátiid.