MATTHEW 2 - Navajo Bible

Hastóí dahóyáanii yíkai

¹ Hérad aláahgo naat'áanii nilį́įgo yoołkááł yę́ędą́ą́' Judíya kéyah biyi' Béthlehemgi Jesus yizhchį́, nít'éé' jó'akon, ha'a'aahdę́ę́' Jerúsalemjį' hastóí dahóyáanii yíkaigo kódaaní,

² Háadiyee' Jew dine'é Aláahgo biNanit'a'í yizhchį́? Jó, ha'a'aahdi bisǫ' deiiltsą́, áko bich'į' nidahodiidlaał biniyé niikai.

³ Hérad aláahgo naat'áanii nilíinii díidí yidiizts'ą́ą'go niseeltłah, áádóó Jerúsalemgi kéédahat'íinii ałdó' t'áá ałtso ákódaadzaa,

⁴ áko aláahgo nááda'iiłniihii índa bee haz'áanii yínda'niłtinii t'áá ałtso áłah áyiilaago háadi Christ doochíłígíí yína'ídééłkid.

⁵ Nít'éé' ádahodííniid, Judíya kéyah hoolyéii biyi' Béthlehemgi lą́ą, háálá kót'éego Diyin God yá halne'ii yee ak'e'ashchį́:

⁶ Júdah bikéyahgi Béthlehem nílíinii, Júdahgi naat'áanii danilíinii bitahdóó doo akéédę́ę́' ánít'ée da, háálá nits'ą́ą́dóó naat'áanii shidine'é Ízrel yoo'ish dooleełii ch'ídoogááł.

⁷ Nít'éé' Hérad éí hastóí dahóyáanii yíkaígíí t'áá nant'inee hágo yidííniidgo, ts'ídá haa'í hoolzhishgo sǫ' dajiiłtsánígíí hats'ą́ą́dóó bił bééhoozin.

⁸ Áko Béthlehemgóó ho'níłnii'go áhodííniid, Nihílááh, ts'ídá haleebee awéé' hadanohtá, áko bik'ínohkaigo hane' shaa nídadooh'ááł, áko shí ałdó' ákǫ́ǫ́ deesháałgo bich'į' nahodeeshłaał.

⁹ Aláahgo naat'áanii áhodííniidígíí dazdiizts'ą́ą'go dah náázhdiikai, nít'éé' jó'akon, ha'a'aahdi sǫ' dajiiłtsánígíí halą́ąjį' nihináánádzáago ashkii áłts'íísí sitínígíí bikáa'gi niiltłah.

¹⁰ Sǫ' dajiiłtsą́ągo t'áá íiyisí bąą hoł dahóózhǫǫd,

¹¹ áko kin góne' yah ajookai nít'éé' ashkii áłts'íísígíí bimá Mary t'áá bił dajiiłtsą́, áko Jesus bich'į' nitsidazdeezgo'go bich'į' nidahodzisá, índa hanaalye'é da'ílíinii ąą ádajiilaago, óola áádóó tsin bijeeh łikání halchinii fránkinsens índa mir wolyéii baa dajiiznil.

¹² Áádóó na'iigeełgo Hérad baa nínáánóhkááh lágo ho'doo'niidgo, nák'ee'ąągo hakéyahgóó aníjookai.

Ííjipgóó choda'dzoos'įįd

¹³ Áko dah nízhdiikaigo, jó'akon, Jóseph nayiiyeełgo Bóhólníihii bidiyingo naal'a'í bich'į' yit'íní í'diilyaago ábidííniid, Nídiidááh, áádóó ashkii áłts'íísígíí bimá bił ts'ídá tsxį́įłgo Ííjipgóó dohkááh. Nił náhweesh'ne'jį' áadi nihighan doo, háálá Hérad éí ashkii yidiyoołhééł biniyé háidínéeztą́ą́'.

¹⁴ Áko nízhdii'na'go ashkii áłts'íísígíí áádóó bimá ałdó' bił t'áá tł'éé' Ííjipgóó ajookai.

¹⁵ Áadi kééhojit'į́įgo Hérad yę́ę daaztsą́. Áko, ShiYe' Ííjipdę́ę́' wóshdę́ę́' ch'ínínááh bidííniid, níigo Bóhólníihii éí Diyin God yá halne'ii biniit'aa yee haadzíi'ii bohoolyaa.

Áłchíní yázhí naaztseed

¹⁶ Nít'éé' Hérad éí hastóí dahóyáanii binda'azlo'go nák'ee'ąągo anáákaígíí bił bééhoozingo t'áá íiyisí yik'ee ádá hoolchįįd. Áko Béthlehemgi índa binaagóó ashiiké naaki béédááhaidóó yaagoígíí yich'į' i'iis'a'go ałtso nidabi'diztseed, éí hastóí dahóyáanii sǫ' yaa ch'ídahaz'ánígíí bik'ehgo ákóhóót'įįd.

¹⁷ Éí Diyin God yá halne'ii Jeremáíyah kóníigo yee haadzíí' yę́ę bohoolyaa:

¹⁸ Réímahgi iinéé' diists'ą́ą́', yínííł yee chanahałe'go áádóó yichago índa ayóó át'éego atíńdindleeh, Réíchel ba'áłchíní náás ahoolchíiłii yaa yicha, ha'íídóolniiłígíí doo yinízin da, háálá áłchíní yę́ę ábi'disdįįd.

Ííjipdę́ę́' ná'íldee'

¹⁹ Nidi Hérad daaztsą́ą́dóó bik'ijį', jó'akon, Ííjipgi Jóseph nayiiyeełgo Bóhólníhii bidiyingo naal'a'í bich'į' yit'íní í'diilyaago

²⁰ ábíłní, Nídiidááh, ashkii áádóó bimá ałdó' bił Ízrel bikéyahgóó nihéénóhkááh, háálá ashkii yida'niiłhį́ yę́ę daneezná.

²¹ Áko nízhdii'na'go t'áá áko ashkii índa bimá ałdó' bił dashdiikaigo Ízrel bikéyahgóó níjíkai.

²² Nít'éé' Judíyagi Arkiléíyas éí bizhé'é Hérad yę́ę bitsásk'ehgi naat'áanii nilį́įgo jíínii'go biniinaa ákǫ́ǫ́ nízhdoo'néłígíí béédzísdzííd, áko baa nináájiisgeelgo honáá'ílnii'go Gálilii kéyahgóó jiníná.

²³ Diyin God yá dahalne'ii, Názariin deiłníi dooleeł, daaní yę́ę bohodoolnííł biniyé Názareth kin haal'áagi jinínáago ákwii kééhojit'į́.