MATTHEW 19 - Navajo Bible

Jesus ałts'á'iildééh yeinít'į́

¹ Jesus díí saad ałtso bee hadziisdzíi'go, Gálilii kéyahdóó dashdiiyáago Jórdan tooh wónaanídi Judíya nahós'a'di jiníyá;

² áadi diné t'óó ahayóí hakéé' nánísą́ągo, ákwe'é nááhizdiisá.

³ Nít'éé' Férisii danilíinii ła' haa yíkaigo hákada'iiłhilgo nidahódééłkidgo ádaaní, Da' dinéésh t'áá azlį́'ígíí biniinaa be'asdzą́ą́ yóó'iidoołt'eełgo t'áá bee haz'ą́?

⁴ Áko bich'į' hadzoodzíi'go ábijiní, Da' díísh t'ah doo dayínółta' da? Hodeeyáádą́ą́' diné áyiilaii éí biką'ii índa bi'áadii áyiilaago

⁵ ádííniid, Éí bąą diné jílíinii éí hazhé'é índa hamá bits'ą́ą́' dashdidoogáałgo, hwe'asdzą́ą́ t'éiyá bił jiináa doo, áko nizhdilt'éhígíí ats'íís t'ááłá'í jidooleeł.

⁶ Áko éí áádóó doo t'áá ał'ąą da, nidi ats'íís t'ááłá'í jileeh. Éí bąą Diyin God ahiidiinilii éí diné doo ałts'áidoonił da.

⁷ Nít'éé' ádahałní, Ákoshą' ha'át'íí biniyé Mózes éí naaltsoos bik'ehgo ałts'á'doot'ashígíí hadilyaago, índa ła'da hwe'asdzą́ą́ yóó'azhdidoo'ááł níigo yee has'ą́ą́ nít'éé'?

⁸ Áko ábijiní, Nihijéí doo binídahaz'áhígíí biniinaa niheda'asdzą́ą́ yóó'adahidoh'aahgo Mózes t'áá yee nihá has'ą́ą́ nít'éé', nidi hodeeyáádę́ę́' éí doo ákót'ée da nít'éé'.

⁹ Áádóó ánihidishní, T'áá háiida hwe'asdzą́ą́ doo adiléégóó yóó'azhdíí'ą́ągo, áádóó náánáła' asdzání bá náá'dzísgehgo, éí azhdííláago át'é [índa t'áá háiida asdzání yóó'abi'doot'ánígíí bá'dzízyehii, éí ałdó' azhdíílá].

¹⁰ Áko hódahooł'aahii ádahałní, Diné áádóó be'asdzą́ą́ yił ałch'į' ákót'éego t'áadoo asgehjígo la' yá'át'ééh lá.

¹¹ Nidi ábizhdííniid, Diné t'áá ałtso díí kóhá'nínígíí doo deidoots'ą́ą́' át'ée da, nidi t'áá baa dadeest'ánígíí t'éiyá.

¹² Háálá diné ła' doo da'dooyehgóó nidabi'diizhchį́, áádóó ła' doo da'dooyehgóó diné ádabiilaa, índa ła' yá'ąąshii bee bóhólníihgo bił haz'áanii biniyé doo da'dooyeh da. T'áá háiida ákójínéehgo bízhneel'ánígíí, háni'dii éí ákójínééh.

Jesus éí áłchíní yázhí yik'ijidlí

¹³ Nít'éé' áłchíní yázhí ła' bik'i dah dahizhdidoolnih áádóó bá sozdidoolzįįł biniyé haa dayii'éésh. Nít'éé' hódahooł'aahii éí deideezteh.

¹⁴ Nidi Jesus ázhdííniid, Bíni'dii áłchíní shaa hakááh, t'áadoo shich'į' nidanoh'iní, háálá ákódaat'éhígíí yá'ąąshii bee bóhólníihgo bił haz'áanii bíí' ádaat'é.

¹⁵ Áko bik'i dah dahizdeesnii'go, índa dashdiiyá.

Dinééh at'íinii

¹⁶ Nít'éé' jó'akon, dinééh ła' haa níyáago áhodííniid, Na'nitiní, ha'át'íí yá'át'éehii shį́įshą' baa niséyáago iiná doo ninít'i'ii shee hodooleeł?

¹⁷ Áko ábizhdííniid, Ha'át'íishą' biniyé ha'át'íida yá'át'éehii bínashídíłkid? T'áadoo yá'át'éhí da. Diyin God t'éiyá yá'át'éehii nilį́. Iiná biih deeshááł nínízingo, Diyin God yee has'áanii bik'eh honíł'į́.

¹⁸ Áko dinééh áhodííniid, Háidíígíishą' ááhdiní? Áko Jesus ánááhodoo'niid, Diné ts'ídá doo diyííłhéeł da, Ts'ídá doo adidííléeł da, Ts'ídá doo adíníí'į́įł da, Doo t'áá ádzaagóó hólne'í da,

¹⁹ Nizhé'é índa nimá nił nilį́įgo íínísin, áádóó, T'áá ni ádíí'ní'nínígi át'éego bił kééhót'íinii ayóó'ííní'ní.

²⁰ Nít'éé' dinééh áháłní, Eiidí lá t'áá ałtso bik'eh honish'į́įgo hoolzhiizh; ha'át'éegishą' t'ahdii shich'į' anáhóót'i'?

²¹ Jesus ábidííniid, Ts'ídá t'áá ákogi ánísht'ée doo nínízingo, nílááh nídídáahgo nee hólónígíí t'áá ałtso naa nahóniihgo, bee shóisíníłt'e'ígíí badahojoobá'íígíí bitaa díínih, áko yá'ąąshdi naalye'é ílíinii nee hólǫ́ǫ dooleeł, ákohgo índa dah diináahgo shikéé' yínááł.

²² Nidi dinééh éidíígíí yidiizts'ą́ą'go, t'áá íiyisí yąąh bíni'go dah diiyá, háálá t'áá íiyisí at'į́.

²³ Áko Jesus éí hódahooł'aahii ábizhdííniid, T'áá aaníígóó ánihidishní, Diné at'íinii yá'ąąshii bee bóhólníihgo bił haz'áanii yiih doogáłígíí bá niłdzil.

²⁴ Áádóó ánáánihidish'ní, Ghą́ą́'ask'idii tsah bighá'ált'ih góne' ch'ídoogáałgo doo bá bohónéedzą́ą da, nidi diné ajit'íinii Diyin God bee bóhólníihgo bił haz'áanii biishdoogáłígi agháago doo há bohónéedzą́ą da.

²⁵ Áko hódahooł'aahii éidíígíí deidiizts'ą́ą'go t'áá íiyisí t'óó bił adahayóigo ádaaní, Ákoshą' háí yisdádooltééł?

²⁶ Nidi Jesus honíł'į́įgo áháłní, Éí diné ts'ídá t'áadoo bee bá bohónéedzą́ą da, nidi Diyin God t'áá ałtsoní bee bá bohónéedzą́.

²⁷ Nít'éé' Peter hanáánáádzíi'go áhodííniid, Jó, nihí nihee dahólǫ́ǫ́ nít'é'ígíí ałtso bits'ą́ą́' dah dahidiikaigo, nikéé' dayíníikááh. Ákoshą' ha'át'íí nihíí' dadooleeł?

²⁸ Jesus áhodííniid, T'áá aaníígóó ánihidishní, Nihí shikéé' dah dahidoohkaígíí, łahgo náhodeesdzáadi Diné Silį́į'ii bibikáá'dóó nahat'áii bits'ádi'nílíidii yikáá'dóó dah neezdáago, nihí ałdó' bikáá'dóó nidahat'áii naakits'áadahgo bikáá'dóó dah nisoodáago, Ízrel dine'é naakits'áadahgo bindanoht'áa doo.

²⁹ Áko t'ááłá'í jinítínígo dahakin nít'ée'ii, doodaii' hak'isóó, doodaii' halahkéí, doodaii' hazhé'é, doodaii' hamá, [doodaii' hwe'asdzą́ą́,] doodaii' ha'áłchíní, doodaii' dahakéyahda shízhi' biniinaa bits'ą́ą́' dah dahizhdiikaii, éí hwee dahólǫ́ǫ́ nít'é'ígíí neeznádiindi ahą́ą́h nániiláago haa nídoolyééł, índa iiná doo ninít'i'ii hwee hodooleeł.

³⁰ Nidi lą'í da'alą́ąjį'ígíí éí da'akéédę́ę' doo, índa da'akéédę́'ígíí da'alą́ąjį' doo.