MATTHEW 15 - Navajo Bible

Jew dine'é bizází yę́ę bi'é'él'į'

¹ Ákohgo Férisii danilíinii áádóó bee haz'áanii yínda'niłtinii kódaaníigo Jerúsalemdę́ę́' Jesus yaa yíkai,

² Ha'át'éegoshą' nídahooł'aahii nihizází yę́ę bi'é'él'į' doo yik'ehgóó ádaat'ée da? Háálá ada'niiyį́įhgo bíla' doo táádeigis da.

³ Áko ábizhdííniid, Ha'át'íishą' biniyé nihí ałdó' nihi'é'él'į' biniinaa Diyin God yee has'áanii bilááh nidahidołtaał?

⁴ Háálá Diyin God ání, Nizhé'é índa nimá nił nilį́įgo íínísin, áádóó, T'áá háiida bizhé'é, doodaii' bimáda yiyíídzí'ígíí, t'áá aaníí hodi'yoolyééł, níigo yee has'ą́.

⁵ Nidi nihí ádadohní, T'áá háiida bizhé'é, doodaii' bimáda, T'áá ha'át'íhída bee nihíká adeeshwoł yę́ę éí Diyin God baa deet'ą́, yiłnínígíí,

⁶ éí binahjį' bizhé'é [doodaii' bimáda] doo bił nilį́į da nidi éí t'áá áko, dadohní. Áko nihi'é'él'į' biniinaa Diyin God bibik'eh ó'oo'níiłii doo idééłníígóó ádaahłaa.

⁷ Nihí t'óó ádahodoł'íinii! Ts'ídá niheełt'éego Aizéíyah t'áá nihilą́ąjį' kóní igo nihaa hoolne':

⁸ Díí diné t'áá bizábąąhídóó t'éiyá yee shił danilį́, nidi dabijéí doo yee shit'áhíjį' ádaat'ée da;

⁹ Na'níle'dii shich'į' dahodísin, háálá diné yee nahas'áanii bina'nitin danilį́įgo yee nida'nitin.

Diné bidoołchxǫǫłii

¹⁰ Áádóó diné yíl'áhígíí hágo bizhdííniidgo ábijiní, Da'íísółts'ą́ą́' áádóó díí bik'ida'doohtįįh:

¹¹ ha'át'íhída diné bizahwiileehígíí éí doo nibiiłchxǫǫh da, nidi bizéé'dę́ę́' hahwiileehígíí éí nibiiłchxǫǫh.

¹² Ákohgo hódahooł'aahii yíkaigo ádahodííniid, Díí bee háínídzí'ígíí Férisii danilíinii deidiizts'ą́ą'go yik'ee doo bił dahóózhǫǫd daígíísh ni ł bééhózin?

¹³ Áko ábijiní, ShiTaa' yá'ąąshdi hólóonii ch'il doo k'iidííláhígíí t'áá ałtso hadahidoolts'ǫł.

¹⁴ Éí t'áadoo baa nídaaht'íní; doo da'oo'į́į́góó nida'a'eeshígíí ádaat'į́. Áko diné doo oo'íinii náánáła' diné doo oo'íinii yoolóosgo, t'áá áłah a'ą́dínóodah.

¹⁵ Nít'éé' Peter áhodííniid, Hane' bee ak'idi'dootį́įłii baa nánít'ínígíí ááhyiłníinii bee nihił hólne'.

¹⁶ Áko Jesus áhodííniid, Da' nihíísh ałdó' t'ah nidi doo ak'ida'doohtįįh da?

¹⁷ Da' díísh t'ah doo bik'ida'doohtįįh da? Ha'át'íhída azéé' góne' ahwiileehii éí abid yiih hwiileeh, áádóó agháhwiileeh.

¹⁸ Nidi azéé'dę́ę́' hahwiileehii éí ajéí bii'dę́ę́' hahwiileeh, áko éí diné nibiiłchxǫǫh.

¹⁹ Háálá ajéí bii'dę́ę́' nichxǫ́'ógo nitsáhákees hahwiileeh, diné naatseed, adilyé, na'ageh bee tsi'na'adá, ani'į́į́', wooch'íidgo hane', t'áá ádzaagóó aa hane'.

²⁰ Díidí diné nibiiłchxǫǫh, nidi yílá doo tánásgizgóó adą́ągo éí diné doo niyiiłchxǫǫh da.

Kéínan dine'é asdzání nilíinii bi'oodlą'

²¹ Áko Jesus áádóó dashdiiyáago Táir índa Sáídan kéyah bił haz'ą́ą́ góne' ajííyá.

²² Nít'éé' jó'akon, t'áá éí nahós'a'dóó Kéínan dine'é asdzání léi' níyáago hadoolghaazhgo ání, Bóhólníihii, David biYe' nílíinii, shaa jiiníbaah; níłch'i bi'iiníziinii t'áá íiyisí shich'é'é yi'niiłhį́.

²³ Nidi t'áadoo bich'į' hadzoodzíi' da. Áko hódahooł'aahii yíkaigo nídahookąąhgo ádaaní, Nówehjį' bidiní, háálá nihikéé' doolwosh.

²⁴ Nidi ábizhdííniid, Ízrel dine'é éí dibé nahalingo yóó'adahaaskaígíí t'éiyá bich'į' shi'dool'aad.

²⁵ Nidi asdzání haa níyáago hach'į' nitsidinígo'go ání, Bóhólníihii, shíká anilyeed.

²⁶ Áko ábizhdííniid, Áłchíní bich'iyą' łééchąą'í bich'į' ajiiłtł'iidgo doo aaníi da.

²⁷ Nidi asdzání ádííniid, T'áá aaníí ákót'é, Bóhólníihii, áko łééchąą'í nidi yíhółníihii bibikáá' adání bikáá'dę́ę́' łees'áán bizéí hadandéhígíí deiyą́.

²⁸ Áko Jesus ánáázhdoo'niid, Asdzání, dooládó' ne'oodlą' bee a'íínílíii ayóó át'éé lá! T'áá íinínízinígíí bik'ehgo ná ádoonííł. T'áá áko bich'é'é náábi'diilzá.

Lą'í náádabi'diiljéé'

²⁹ Áko áádóó Jesus dashdiiyáago Gálilii be'ek'id bąąhgóó jiníyá. Áádóó wók'ą́ąjį' hajiyá, ákwii dzineezdá.

³⁰ Nít'éé' diné t'óó ahayóí haa haaskai, ła' nida'niłhod, ła' doo da'oo'į́į da, ła' doo yádaałti' da, ła' bąąh dah nidahaz'ą́, áádóó náádaała' ka nidaakaígíí lą'í yił haa haaskaigo hayaajį' nidayiizhjaa', áko náádabizhdiyiisá,

³¹ áko diné áłah nilínígíí éí diné doo yádaałti'ii yádaałti'go, áádóó bąąh dah nidahaz'áanii doo ádaat'éhígóó, áádóó nida'niłhodii yá'át'éehgo nidaakaigo, índa doo da'oo'íinii da'oo'į́ áńdaalyaago, éí dayiiłtsą́ągo bik'ee t'óó bił adahóóyóí; áko Ízrel biDiyin God yaa dahaznih.

Diné dį́įdi mííl yilt'éego ba'íltsood

³² Ákohgo Jesus hódahooł'aahii hágo bizhdííniidgo ábijiní, Díí diné yíl'áhígíí baa a'ááh nisin, háálá t'áá shaa áłah nilį́įgo k'ad táá' yiską́, áko t'áadoo dayóyą́'í da, nidi t'áá dichin danilį́įgo doo t'áá k'ad béé'ayéłnii' da, háálá dabighan yi'oh dahidínóołnah.

³³ Áko hódahooł'aahii ádahałní, Díí honoojíigi háádę́ę'shą' bááh ła' shódeidiilt'eełgo díí diné áłah nilínígíí da'dooyį́įłgo hwiih dadooleeł?

³⁴ Nít'éé' Jesus áhodííniid, Łees'áánshą' díkwíí nidaahjaah? Áko ádaaní, Tsosts'id lą́ą, áádóó łóó' ádaałts'íísígíí ałdó' t'áá díkwíí yee'.

³⁵ Áko diné yíl'áhígíí, Ni'góó dinohbįįh, bizhdííniid,

³⁶ áko łees'áán tsosts'id índa łóó' nízhdiinilgo, Diyin God bich'į' sozdilzingo baa ahéésniizį́į́', áádóó nijiitíihgo hódahooł'aahii bitaa jiniih índa éí diné yíl'áhígíí yitaa deiznii'.

³⁷ Áko t'áá ałtso da'ííyą́ą'go hwiih daazlį́į́', áádóó bi'oh da'oodą́'ígíí náádadziisdláa'go ts'iizis tsosts'id hadazdeesbįįd.

³⁸ Áko asdzání áádóó áłchíní t'áadoo wólta'í dinéhígíí t'áá bízhánígo dį́įdi mííl da'ííyą́ą́' lá.

³⁹ Áko, Nídayínóhkááh, bizhdííniidgo tsinaa'eeł biih jííyá, áádóó Mágdala nahós'a'jį' tsé'naa nida'dzis'éél.