MATTHEW 1 - Navajo Bible

Jesus Christ dabizází yę́ę

¹ Jesus Christ éí David bits'ą́ą́dóó oochíiłii nilį́, áádóó David éí Éíbraham bits'ą́ą́dóó oochíiłii nilį́. Kót'éego Jesus Christ bizází yę́ę náás da'ahílchį́.

² Éíbraham éí Áízak há yizhchį́, áádóó Áízak éí Jéíkab há yizhchį́, áádóó bik'ijį' Jéíkab éí Júdah áádóó bik'isóó há niheezhchį́,

³ áádóó ákóne' Téímar éí Píírez índa Zíírah, Júdah bá jishchį́, áádóó bik'ijį' Píírez éí Hézran há yizhchį́, áádóó bik'ijį' Hézran éí Ram há yizhchį́,

⁴ áádóó áadi Ram éí Amínadab há yizhchį́, áádóó bik'ijį' Amínadab éí Náshan há yizhchį́, ákóne' Náshan éí Sálman há yizhchį́,

⁵ náá'ákóne' Réíhab éí Bó'az, Sálman bá jishchį́, áádóó bik'ijį' Ruth éí Óbed, Bó'az bá jishchį́, áádóó áadi Óbed éí Jésii há yizhchį́,

⁶ áadi índa Jésii éí David aláahgo naat'áanii há yizhchį́. Áádóó bik'ijį' Yoráíyah be'asdzą́ą́ nít'é'ígíí éí Sálaman, David bá jishchį́,

⁷ áádóó bik'ijį' Sálaman éí Riihobówam há yizhchį́, ákóne' Riihobówam éí Abáíjah há yizhchį́, áádóó áadi Abáíjah éí Éísa há yizhchį́,

⁸ áádóó bik'ijį' Éísa éí Jiiháshafat há yizhchį́, ákóne' Jiiháshafat éí Jiihóram há yizhchį́, áádóó náá'ákóne' Jiihóram éí Azáíyah há yizhchį́,

⁹ áádóó áadi Azáíyah éí Jótham há yizhchį́, áádóó bik'ijį' Jótham éí Éíhaz há yizhchį́, áádóó náá'ákóne' Éíhaz éí Heziikáíyah há yizhchį́,

¹⁰ áádóó áadi Heziikáíyah éí Manáseh há yizhchį́, áádóó bik'ijį' Manáseh éí Éíman há yizhchį́, áádóó náá'ákóne' Éíman éí Josáíyah há yizhchį́,

¹¹ áadi índa Bábilangóó ho'disnááh yę́ędą́ą́' Josáíyah éí Jekonáíyah índa bik'isóó há niheezhchį́.

¹² Áádóó índa Bábilangóó ho'disnááhdóó bik'ijį' Jekonáíyah éí Shiyáltiyel há yizhchį́, áadi índa Shiyáltiyel éí Zerábabel há yizhchį́,

¹³ áádóó ákóne' Zerábabel éí Abáíyad há yizhchį́, náá'ákóne' Abáíyad éí Iiláíyakim há yizhchį́, áádóó bik'ijį' Iiláíyakim éí Éízor há yizhchį́,

¹⁴ náá'ákóne' Éízor éí Zéídak há yizhchį́, áádóó índa Zéídak éí Éíkim há yizhchį́, áádóó bik'ijį' Éíkim éí Iiláíyad há yizhchį́,

¹⁵ náá'ákóne' Iiláíyad éí Eliyéízer há yizhchį́, áádóó bik'ijį' Eliyéízer éí Máthan há yizhchį́, índa Máthan éí Jéíkab há náánázhchį́,

¹⁶ Jéíkab éí Jóseph há yizhchį́, áko Jóseph éí Mary bahastiin silį́į́'. Mary éí Jesus, Christ wolyéhígíí, jishchį́.

¹⁷ Áko Éíbraham hiná yę́ędóó David hiná yę́ęjį' dį́į́'ts'áadahdi ałk'i ná'ázhchį́, áádóó David hiná yę́ędóó Bábilangóó ho'disnááh yę́ęjį' dį́į́'ts'áadahdi ałk'i ná'ázhchį́, ákóne' Bábilangóó ho'disnááh yę́ędóó Christ yizhchį́įjį' dį́į́'ts'áadahdi ałk'i ná'ázhchį́.

Jesus Christ bi'dizhchį́

¹⁸ Jó, kót'éego Jesus Christ ho'dizhchį́. Hamá Mary éí Jóseph yił ahaa doot'ashgo yił aha'deet'ą́, nidi t'ah doo yił ahaít'aashgóó, Níłch'i Diyinii bibee adziilii bee iz'niiltsąądgo bééhoozin.

¹⁹ Áko Jóseph, hahastiin dooleełígíí, diné t'áá ákogi át'éii nilį́įgo, t'áá nahonit'inee nahjį' nihodideesh'áałgo doo haa yáhodoosįįł da niizį́į́'.

²⁰ Nidi díí yaa nitsíkees nít'éé' nayiiyeełgo Bóhólníihii bidiyingo naal'a'í bich'į' yit'íní í'diilyaago ábíłní, Jóseph, David biye' nílíinii, Mary ne'asdzą́ą́ yileehígíí t'áadoo bik'ee nił yé'í, háálá Níłch'i Diyinii bibee adziilii bee iz'niiltsąąd.

²¹ Áko ashkii yidoołchííł, áádóó Jesus bee yídíízhiił, háálá bidine'é bibąąhági ádaat'éii yits'ą́ąjį' yisdéidiyoonił.

²² Diyin God yá halne'ii binahjį' Bóhólníihii hahaasdzíi'ii ałtso bohodoolnííł biniyé ádzaa:

²³ Jó'akon, ch'ikę́ę́h t'ah doo diné bee haleehii awéé' bee hodooleełgo ashkii yidoołchííł, Éí Imányowel bee yídóojiił, (éí Diyin God nihił hólǫ́ jiníigo óolyé).

²⁴ Nít'éé' Jóseph ts'éédzídzidgo nízhdii'na', áko Bóhólníihii bidiyingo naal'a'í áhodííniidii bi'jiilaago, Mary bił ahaa jít'áázh,

²⁵ nidi t'áadoo baa níjít'įįhí biyáázh yishchį́, áádóó Jesus bee jíízhi'.