LUKE 22 - Navajo Bible

Jesus diyoolyéełgo binahast'ą́

¹ Áko díík'ǫsh t'áágééd bááh ályaii hodílzingo áłah ná'ádleeh k'adę́ę baa hoolzhíísh, éí atis'adeesdzá bee bééhániihii yolyé.

² Áko aláahgo nááda'iiłniihii índa bee haz'áanii yínda'niłtinii haash yit'éego Jesus deidiyoołhéłígíí ch'ééh yíkadadilts'i', háálá diné yéédaaldzid.

³ Nít'éé' Júdas éí Iskáriyat joolyéhígíí Séítan hwiih yíyá, éí naakits'áadahígíí ła' jílį́,

⁴ áko éí dashdiiyáago aláahgo nááda'iiłniihii índa bisiláo bindanit'a'í baa hodizhdoo'ááł biniyé bich'į' hadzoodzíí'.

⁵ Áádóó bił dahóózhǫǫdgo béeso haa deidooniłgo há dahodeez'ą́.

⁶ Áko bee lą́ adzisłį́į'go diné yíl'áhígíí doo binááłgóó baa hozhdidoo'áałgo ha'át'éegoda há ashja doolíłígíí baa nitsídzízkééz.

Jesus éí atis'adeesdzá bee bééhániihii hódahooł'aahii bił dazhdooyį́į́ł

⁷ Áko díík'ǫsh t'áágééd bááh ályaii hodílzingo áłah ná'ádleeh bijį́ atis'adeesdzá bee bééhániihgo dibé yázhí nááhániihii baa hoolzhiizh.

⁸ Áko Jesus éí Peter índa John ayííł'a'go ííłní, Nihílááh, atis'adeesdzá bee bééhániihgo yidánígíí dadiidį́į́ł biniyé hasht'edoohłííł.

⁹ Áádóó ábizhdííniid, Háadishą' hasht'ezhdoolííł nihííní'ní?

¹⁰ Áko áháłní, Jó, kin haal'áá góne' oo'áazhgo, áadi diné ła' bidaa'í yee tó yoo'áałgo nihidááh doogááł; éí kin góne'é yah ííyáago bikéé' yah adooh'ash.

¹¹ Ákwe'é kin bee bóhólníihii ábididoohniił, Na'nitiní nilíinii áníłní, Diné nidahakáahgo bá nahaz'ánígíí daats'í łahgo t'áá shá haz'ą́? Ákwe'é shí áádóó shídahooł'aahii atis'adeesdzá bee bééhániihgo yidánígíí bił dadeeshį́į́ł.

¹² Áko kin ná'ádeídi hótsaago hasht'ehoolyaago nihich'į' íidoolííł, ákóne'é hasht'edidooh'nííł.

¹³ Áko dashdii'áázh, nít'éé' t'áá aaníí t'áá áhodííniidígi át'éego bik'ízhní'áázh, áko atis'adeesdzá bee bééhániihgo dadoodį́łígíí t'áá áłdįįłt'éego ájiilaa.

Bóhólníihii Bidiyingo Adą́ áyiilaa

¹⁴ Áádóó áajį' ahoolzhiizhgo daal'aadii bił bikáá' adání bich'į' dasdineezbin.

¹⁵ Áko Jesus áhodííniid, T'ah doo atíshi'dilnééhdą́ą́' díí atis'adeesdzá bee bééhániihgo yidánígíí t'áá íiyisí nihił dadeeshį́į́ł nisin,

¹⁶ háálá ánihidishní, Éí doo náádeeshdį́įł da, Diyin God bee bóhólníihgo bił haz'áanii bii'di ałtso bohoolyaago índa.

¹⁷ Áko doodlį́įłii néidiiką́ągo sodoolzingo yaa ahééh niizį́į'go ádííniid, Díí nídadoohkaah áádóó ałtah dohkaahgo daahdlą́,

¹⁸ háálá ánihidishní, Kodóó ch'il na'atł'o'ii bitoo' doo ła' náádeeshdlį́įł da, Diyin God bee bóhólníihgo bił haz'áanii baa hoolzhiizhgo índa.

¹⁹ Áádóó bááh néidii'ą́, áádóó sodoolzingo yaa ahééh niizį́į'go niyiizti'go hatainiihgo ání, Díí shits'íís [nihá ninádiní'ánígíí át'é. Nídaahdį́įhgo bee shéédaałniih dooleeł.

²⁰ T'áá ákót'éego da'jííyą́ą́'dóó bik'ijį' doodlį́įłii ałdó' néidiiką́ągo ádííniid, Díí doodlį́įłii shidił bee aha'deet'áanii ániidíii át'é, éí nihá deezna'ígíí át'é.]

²¹ Jó'akon, nináshidee'aahígíí k'ad kwe'é shił hólǫ́ǫgo bikáá' adání yik'i dah déesnii'.

²² Háálá Diné Silį́į'ii t'áá bá ha'oodzí'ígi át'éego dah diighááh, nidi diné nináhodiní'ánígíí éí doo hojooba' ájíníi da!

²³ Áko nida'ahízhdílkidgo áda'ahizhdi'ní, Nihí háidashą' ákódii'nííł?

Aláahgo é'ét'é dooleełgi baa saad hólǫ́

²⁴ Áádóó ałghadazh'dit'áahgo baa nízhdiikaigo áda'ahizhdi'ní, Nihí háidashą' aláahdi ániit'éego baa nitsáhákees?

²⁵ Áko Jesus áhodííniid, Aláahgo naat'áanii danilíinii ał'ąą dine'é yindant'áii éí ayóogo ádídahólníihgo yindant'áa łeh, áádóó ákwe'é bídahólníihii éí yá'át'éehgo ádaaníiłii dabidi'níi łeh.

²⁶ Nidi nihí doo ákódanoht'ée da; nihitahgóó aláahgo ayóó át'éhígíí bíni'dii éí akéédę́ę́' naagháhígíí nahalin dooleeł, áádóó naat'áanii nilíinii bíni'dii naal'a'í nahalin dooleeł.

²⁷ Jó, háájígoshą' aláahgo át'é, biyaa ni'iikaahígíí daats'í, éí doodago naal'a'í nilį́įgo ayaa ni'iikaahígíí daats'í? Da' doósh biyaa ni'iikaahígíí da? Nidi shí t'éí naal'a'ígi át'éego nihitahgi naashá.

²⁸ Nidi nihí t'éiyá nashíhodi'ntaahgi t'áá áłahjį' shił dahólóonii danohłį́,

²⁹ áko t'áá shiTaa' éí bee shóhólníihgo bił haz'áanii sheidiní'ánígi át'éego shí ałdó'

³⁰ bee shóhólníihgo bił haz'ą́ągi shits'ą́ą́' da'doohsį́į́ł áádóó da'doohdlį́į́ł, índa bikáá'dóó nidahat'áii bikáá' dah nisoodáago Ízrel naakits'áadahgo dine'é bindanoht'áa doogo nihaa dinish'aah.

Peter éí Jesus doo bééhasin da bidizhdooniiłígíí t'áá bítséedi baa hane'

³¹ Áko Bóhólníihii ádííniid, Sáíman, Sáíman, jó'akon, tł'oh naadą́ą́' bigházhníłdééh nahalinígi át'éego ándoolííł biniyé Séítan nííkeed.

³² Nidi ná sodeeszin, áko ne'oodlą' bee aa dzódlí doo bígééd dííleeł da, áko adíísihígíí bits'ą́ąjį' dah nídinidzáago, nik'isóó dabidziilgo áńdadíídlííł.

³³ Áko ábizhdííniid, Bóhólníihii, nił awáalyaaí deeshłeełgi, doodaii' t'áá nił shidi'yoolyéełgi nidi bich'į' niná'ádinisht'ą́ągo shił t'áá áko.

³⁴ Áko ábizhdííniid, Peter, ándishní, díí tł'éé' naa'ahóóhai biką'í t'áadoo ániihí táadi doo hwééhasin da shididííniił.

Dah na'ayizii áádóó azis bee na'aljidí índa diltłish

³⁵ Áádóó ábizhdííniid, Dah na'ayizii áádóó azis bee na'aljidí índa ké ba'aaníii t'áágééd danihííł'aad yę́ędą́ą́', da' íídą́ą́'ásh t'áadoo le'é bídin danohłį́į́ nít'éé'? Áko ádadííniid, Dooda lą́ą.

³⁶ Áko ánááhodoo'niid, Nidi k'ad dah na'ayizii índa azis bee na'aljidí bee hólónígíí, bíni'dii neijaah. Índa diltłish bee ádinígíí bíni'dii bibeeldléí baa nahóniihgo ła' neidiyoołnih.

³⁷ Háálá ánihidishní, Bee haz'áanii yitis nidahideestáalii bił bi'déélta', níigo bee ak'e'ashchínígíí shí shee bohodoolnííł, háálá sheinít'į́įgo bee ak'eda'ashchínígíí éí bidahodoolnííł.

³⁸ Áko ádadííniid, Shoo, Bóhólníihii, kóoní diltłish naaki nihee hólǫ́. Áko ábizhdííniid, T'áá éí t'éiyá bíighah.

Jesus sodilzin

³⁹ Áádóó ch'ízhníyáago, t'áá ájít'ínígíí bik'ehgo Dził Álivz hoolyéhígóó dashdiiyá, áko hódahooł'aahii ałdó' hakéé' dah diikai.

⁴⁰ Áadi jiníyáago ábizhdííniid, Sodadołzin, doo nihídahodínóotah da biniyé.

⁴¹ Áádóó tsé bee adzoolne' ánízahjį' bits'ázhníyáago, áadi nitsizhdinígo'go sozdoolzingo ájíní,

⁴² ShiTaa', íinínízingo díí doodlį́įłii shits'ą́ąjį' kónílééh, ákondi shí íinisinígíí éí dooda, nidi ni íinínízinígíí ádoonííł.

⁴³ Áko yá'ąąshdę́ę́' diyingo naal'a'í hach'į' niníyá, hadziil áhodoolííł biniyé.

⁴⁴ Áko t'áá íiyisí ti'hojooníihgo t'ah nááyówehígo haleebee sozdoolzin, áko hatásiil diłgi át'éego ni'jį' nidahidilch'ą́ą́ł.

⁴⁵ Áádóó sozdoolzindę́ę́' nízhdii'na'go hódahooł'aahii baa nídzídzá, nít'éé' yíní danilį́įgo da'ałhosh lá,

⁴⁶ áko ábizhdííniid, Ha'át'éegoshą' da'ołhosh? Doo nihídahodínóotah da biniyé nídoohjeehgo sodadołzin.

Jesus ninádeet'ą́ áádóó bi'diiltsood

⁴⁷ T'ah yájíłti'go, diné t'óó ahayóí haa nánízą́, áko diné Júdas yolyéhígíí, éí naakits'áadahígíí ła' nilíinii aní'eezh. Áko Jesus yidoots'ǫs biniyé yich'į' dah diiyá,

⁴⁸ nidi Jesus ábidííniid, Júdas, da' Diné Silį́į'iísh yiits'ǫsgo ninádiní'aah?

⁴⁹ Áko hanaagóó naazínígíí áhodi'doolníłígíí yaa ákodaniizį́į'go ádadííniid, Bóhólníihii, da' diltłishísh bee bitaa da'iilghaał?

⁵⁰ Áko ła' aláahgo náá'iiłniihii binaalte' néidííłhaalgo bijaa' nish'náájíígíí na'iidiiłhaal.

⁵¹ Nidi Jesus ádííniid, Háni'dii t'áá díí t'éiyá ádoonííł! Áko bijaa' bizhdeelchidgo doo át'éhí da áńjiidlaa.

⁵² Nít'éé' Jesus éí aláahgo nááda'iiłniihii áádóó kin bii' sohodizin bił haz'ą́ągi siláo bindanit'a'í índa diné yá aląąjį' naazíinii dahwiidoołtsoł biniyé haa yíkaígíí ábizhdííniid, Da' diltłish índa tsihał dayínóhjáahgo agha'ii'níiłii bich'į' oonééł nahalingoósh shich'į' ch'ínooná?

⁵³ Shą́ą́', t'áá ákwíí jį́ kin bii' sohodizin bił haz'ą́ą́ góne' nihitaasháá nít'éé', nidi t'áadoo dashoołtsood da. Nidi nihí k'ad óhólnííh nihá baa hoolzhiizh, índa chahałheeł bibee óhólnííh ałdó' baa hoolzhiizh.

Peter éí, Jesus doo bééhasin da, jiní

⁵⁴ Ákohgo siláo dahoołtsoodgo dah dahodiilóóz, áádóó aláahgo náá'iiłniihii bikin góne' yah adahazlóóz. Peter éí t'áá nízaadę́ę́' akéé' yigááł,

⁵⁵ áko siláo éí kin binaagi haz'ą́ągo biná'ástł'in ałníi'di dideideeshjée'go ákwii dineezbingo naháaztą́, ákwii Peter atah dzineezdá.

⁵⁶ Nít'éé' honibąąhgi dzizdáago asdzání naal'a'í léi' hazhó'ó honééł'į́į'go áháłní, Díí diné ałdó' Jesus yił naakai ni'.

⁵⁷ Nidi dooda jidííniid, kójíníigo, Asdzání, shíga' éí doo hwééhasin da.

⁵⁸ Nít'éé' t'óó nááhodoo'na'ígo náánáła' nááhoołtsą́ągo ánááhodoo'niid, Ni ałdó' éí ła' ánít'į́. Nidi Peter ázhdííniid, Dooda, kwá'ásiní, shí dooda.

⁵⁹ T'ááłáhídi daats'í ahéé'ílkidóó bik'ijį' ła' ánáázhdí'ní, T'áá aaníí díí diné ałdó' Jesus yił naakaígíí ła' át'į́į́ lá, háálá Gálilii dine'é jílį́, níigo yee niiltee'.

⁶⁰ Nidi Peter ádííniid, Kwá'ásiní, baa nánít'ínígíí ts'ídá doo shił bééhózin da. T'áá áko, t'ah yájíłti'go, naa'ahóóhai biką'í ádííniid.

⁶¹ Áko Bóhólníihii nídzízyizgo Peter jinééł'į́į́'. Áko Peter éí Jesus, Díí tł'éé' naa'ahóóhai biką'í t'áadoo ániihí táadi doo hwééhasin da shididííniił, hodííniidii bééjoolnii'.

⁶² Áko ch'ízhníyáago aníjíchago jíícha.

Jesus bá nahast'i' áádóó nibí'íltsxas

⁶³ Nít'éé' diné éí Jesus yaa ádahalyánígíí Jesus yá nidahast'i' áádóó niyí'da'astsxas,

⁶⁴ áádóó hanák'ee nináda'ałbałgo nidahódíłkidgo ádaaní, Diyin God yá halne'ii nílį́įgo, háishą' nándííłts'in bee nihił hólne'.

⁶⁵ Áádóó saad doo adaaníinii lą'í yee há hadahaasdzíi'go dahwéédzíí'.

Jesus éí diné ándaha'áii bidááhdę́ę́' niho'deedlóóz

⁶⁶ Hoos'įįdgo, diné yá aląąjį' naazíinii, éí aláahgo nááda'iiłniihii índa bee haz'áanii yínda'niłtinii yił áłah silį́į́', áko éí aa hwiinít'į́įjį' adahazlóozgo ádahałní,

⁶⁷ Christ nílį́įgo, haa'íshą' bee nihił hólne'. Nidi Jesus áhodííniid, Bee nihił hweeshne'go, doo deidoohdląął da,

⁶⁸ áádóó nanihídééłkidgo, ałdó' doo shił dahodoołnih da, [doo nidi shéédadidoohchił da].

⁶⁹ Nidi kodóó Diné Silį́į'ii éí Diyin God aláahgo bidziilii binish'náájí dah bidí'nóoldaał.

⁷⁰ Áko t'áá ałtso ádadííniid, Da' ákoósh Diyin God biYe' nílį́? Áádóó ábizhdííniid, Jó, t'áá nihí éí hó ájít'į́ dashidohní.

⁷¹ Áko ádadííniid, Ha'át'íísh ałdó' biniyé ła' ch'ínáádahót'aah doo? Háálá t'áá nihí t'áá hó ázhdííniidígíí dasidiits'ą́ą́'.