LUKE 18 - Navajo Bible

Asdzání bąąh áhásdįįdii índa ánihwii'aahii

¹ Áádóó diné t'áá áłahjį' sodadilzin dooleełgo, áádóó doo bąąh nidahwiikaad da doo biniyé, hane' bee ak'idi'dootį́įłii bee bił hojoolne'go

² ázhdííniid, Kin haal'áagi, ánihwii'aahii léi' Diyin God doo yidísinii índa diné doo bił nilíinii nilį́įgo kééhat'į́į́ lá,

³ áádóó éí kin haal'áhígi ałdó' asdzání léi' bąąh áhásdįįdgo kééhat'į́į́ lá, áko éí ánihwii'aahii yaa nádáahgo ání, Shik'i hodii'aahii shá baa nánít'į́.

⁴ Nidi doo bá baa níjít'į́į́góó hoolzhish, áádóó bik'ijį' t'áá hayi'ídi íiznízin, Azhą́ Diyin God doo díínísin da nidi, índa diné doo shił nilį́į da nidi,

⁵ díí asdzání bąąh áhásdįįdii doo shik'i dóya' át'éhígíí bąą bá baa nídéesht'įįł, áko shaa nádáhígíí doo bąąh nideesháał da.

⁶ Áádóó Bóhólníihii ádííniid, Ánihwii'aahii doo ákwii át'éhígíí áníinii baa nitsídaahkees.

⁷ Da' ákoósh Diyin God yitayiizláa'ii jį́įgo áádóó tł'ée'go nídabookąąhii ha'át'íhída doo yá yaa nídóot'įįłgo yíká adoolwoł da? T'óó daats'í bíni'dii nízingo nízaadgóó ahodoolzhish?

⁸ Nidi ánihidishní, Ts'ídá tsį́įłgo yá yaa nídóot'įįłgo yíká adoolwoł. Ákondi Diné Silį́į'ii níyáago, nahasdzáán bikáa'gi daats'í diné daboodlą́ągo yik'ídoogááł?

Férisii nilíinii índa tax nahalyéhígíí yiniyé sidáii

⁹ Ts'ídá t'áá ákogi ádaniit'é danízingo diné náánáła'ígíí deijoołáii, díí hane' bee ak'idi'dootį́įłii bee bił hojoolne':

¹⁰ Diné nidilt'éego kin bii' sohodizin bił haz'ą́ą́ góne' sodidoolzįįł biniyé yah íí'áázh, ła' éí Férisii nilį́, náánáła' éí tax nahalyéhígíí yiniyé sidáii nilį́.

¹¹ Nít'éé' Férisii sizį́įgo kót'éego t'áá bí ádee sodoolzin, Diyin God, nich'į' ahééh nisin, shí doo diné ła' ádaat'éhígi ánísht'ée da, aghada'ii'níiłii, doo t'áá ákogi ádaat'íinii, da'diléii, índa díí tax nahalyéhígíí yiniyé sidáii nidi doo ákónísht'ée da.

¹² Tsosts'id néílkáahjį' naakidi hodinisingo doo adą́ néiish'aah, t'áadoo le'é shaa hindéehii t'áá ałtso neeznáá daníjaa'ígíí éí t'ááłá'ígo shijaa' Diyin God baa hidish'aah.

¹³ Nidi tax nahalyéhígíí yiniyé sidáii nízaadę́ę́' sizį́įgo dego yá'ąąshgóó nidi doo t'áá k'ad déé'į́į́'góó biyid néineests'ingo ání, Diyin God, shí bąąhági ánísht'éhígíí, shaa jiiníbaah!

¹⁴ Ánihidishní, Díí diné doo bohodiit'i'góó bighangóó anáádzá, ła'ígíí éí dooda, háálá t'ááłá'í jinítínígo ayóó ájít'é ízh'dólzinígíí éí a'ohgo ájít'éego áhodi'doolnííł, nidi t'áá háiida a'ohgo ádaa nitsídzíkeesígíí éí ayóó át'éii jílį́įgo áhodi'doolnííł.

Jesus éí áłchíní yázhí yik'ijisdli'

¹⁵ Nít'éé' diné ła' bida'awéé' nidi bidazhdidoolchił biniyé haa dayiizhjaa', nidi hódahooł'aahii éí dayiiłtsą́ągo deideezteh.

¹⁶ Nidi Jesus éí áłchíní hágo yidííniidgo ání, Bíni'dii áłchíní shaa hakááh, t'áadoo shich'į' nidanoh'iní, háálá ákódaat'éhígíí éí Diyin God bee bóhólníihgo bił haz'áanii bíí' ádaat'é.

¹⁷ T'áá aaníígóó ánihidishní, T'áá háiida doo áłchíní yázhí nahalingo Diyin God bee bóhólníihgo bił haz'áanii ádaazhdeet'ánígíí ts'ídá doo biishdoogáał da.

Dinééh at'į́įgo naat'áanii nilíinii

¹⁸ Nít'éé' naat'áanii léi' kóníigo nahódééłkid, Na'nitiní yá'át'éehii nílíinii, haash deeshníiłgo iiná doo ninít'i'ii shee hodooleeł?

¹⁹ Áko Jesus áhodííniid, Ha'át'íishą' biniyé yá'át'éehii shidiní? T'ááłá'í nidi doo ła' yá'ájít'éhí da, nidi Diyin God t'éiyá yá'át'éehii nilį́.

²⁰ Bee haz'áanii nił bééhózingo ání: Ts'ídá doo adidííléeł da, Diné ts'ídá doo diyííłhéeł da, Ts'ídá doo adíníí'į́įł da, Ts'ídá doo t'áá ádzaagóó hojilne' da, Nizhé'é índa nimá nił nilį́įgo íínísin.

²¹ Áko ázhdííniid, Eii t'áá ałtso t'áá áłchíní nishłį́į́dą́ą́' bik'eh honish'į́įgo hoolzhiizh.

²² Áko Jesus hodiizts'ą́ą'go áhodííniid, T'ááłáhígo haz'ą́ t'ahdii bee nich'į' anáhóót'i'. Nee hólónígíí t'áá ałtso naa nahóniihgo bee shóisíníłt'e'ígíí badahojoobá'íígíí bitaa díínih, áko yá'ąąshdi naalye'é ílíinii nee hólǫ́ǫ dooleeł, ákohgo índa dah diináahgo, shikéé' yínááł.

²³ Nidi éidíígíí jidiizts'ą́ą'go t'áá íiyisí bąąh háni', háálá t'áá íiyisí ajit'į́.

²⁴ Éí diné [t'áá íiyisí yąąh bíni'go] Jesus honééł'į́į'go ádííniid, Dooládó' da'jit'ínígíí Diyin God bee bóhólníihgo bił haz'áanii biih dazhdookahígi há daniłdzil da!

²⁵ Jó, ghą́ą́'ask'idii tsah bighá'ált'ih góne' ch'ídoogáałgo doo bá bohónéedzą́ą da, nidi diné ajit'íinii Diyin God bee bóhólníihgo bił haz'áanii biishdoogáłígi éí agháago doo há bohónéedzą́ą da.

²⁶ Áko deidiizts'ą́'ígíí ádadííniid, Ákoshą' háí yisdádooltééł?

²⁷ Nidi Jesus ádííniid, Diné doo ła'yóle' át'éii Diyin God ła'yoolííł.

²⁸ Áko Peter ádííniid, Jó'akon, danihighan bits'ą́ą́' dah dahidiikaigo nikéé' dayíníikááh.

²⁹ Áko áhodííniid, T'áá aaníígóó ánihidishní, Diné t'ááłá'í nítínígo bikin, doodaii' bishchíinii, doodaii' bik'isóó, doodaii' be'asdzą́ą́, doodaii' ba'áłchíní éí Diyin God bee bóhólníihgo bił haz'áanii biniinaa yits'ą́ą́' dah diiyáii,

³⁰ éí díí k'ad hoolzhishígíí biyi' hwee hólónígíí lą'ídi ahą́ą́h nániiláago haa nídoolyééł, áádóó łahgo náhodeesdzáago iiná doo ninít'i'ii hwee hodooleeł.

Jesus bidi'yoolyéłígíí yaa nááhálne'

³¹ Nít'éé' naakits'áadahígíí yił t'áá sahdii niikaigo áyidííniid, Jó'akon, Jerúsalem góde deekai, áko Diyin God yá dahalne'ii Diné Silį́į'ii yaa dahalne'go yee ak'eda'ashchínígíí t'áá ałtso bidahodoolnííł.

³² Háálá doo Jew dine'é danilíinii baa hodi'doot'ááł, áko há nidahodoołt'ih, áádóó baa yáhásinígi ádahodoolííł índa hak'ídahididoozhah;

³³ nahóda'doołtsxis índa dahodiyoołhééł, áko tágí jį́ aleeh góne' náázhdidoodááł.

³⁴ Nidi bee hadzoodzí'ígíí hódahooł'aahii t'áadoo yik'ida'diitą́ą da, háálá bits'ąą nídees'į́į́', áko ázhdííniidígíí t'áadoo bił béédahoozin da.

Jesus éí adókeedii doo oo'íinii oo'į́ áyiilaa

³⁵ Áádóó bik'ijį' Jériko k'adę́ę baa jígháahgo, diné léi' doo oo'íinii atiin bąąhgi adókeedgo sidáá lá,

³⁶ áko diné ayóó át'é nooyéłígíí yidiizts'ą́ą'go na'ídééłkidgo ádííniid, Ha'át'íishą' baa na'aldeeh?

³⁷ Áko yee yił dahoolne'go ádaaní, Názarethdóó Jesus aadę́ę́' yigááł.

³⁸ Áko hadoolghaazhgo ání, Jesus, David biYe' nílíinii, shaa jiiníbaah!

³⁹ Áko alą́ąjį' yikahígíí, T'áadoo ádíníní, dahałníigo hach'adahashké, nidi t'ah yówehgo hanáázhdoolghaazhgo ájíní, David biYe' nílíinii, shaa jiiníbaah!

⁴⁰ Áko Jesus t'áá ákǫ́ǫ́ yiizį'go ádííniid, Shaa honohłóós, áko diné doo oo'íinii t'áá áyídídę́ę́' niníyáago áyidííniid,

⁴¹ Ha'át'íishą' shá baa nizhdoogaał shííní'ní? Áko ábizhdííniid, Bóhólníihii, eesh'į́ ánáshídlééh.

⁴² Áko Jesus áhodííniid, Ííní'į́ nánídleeh; ne'oodlą' bee doo ánít'éhí da násínídlį́į́'.

⁴³ T'áá áko ajoo'į́ nídzísdlį́į́' áádóó Diyin God baa hojiniihgo Jesus bikéé' dashdiiyá, áko diné t'áá ałtso dahoołtsą́ągo, Diyin God yaa dahaznih.