LUKE 17 - Navajo Bible

Bąąhági áhát'į́ biniinaa nihwiileehii

¹ Áádóó hódahooł'aahii ábizhdííniid, Bąąhági áhodooníiłgo bee na'íhontaah ts'ídá t'áádóo nídí áánííł, nidi haniinaa áhooníiłii, éí doo hojooba' ájíníi da!

² Díí áłchínígi át'éego a'ohgo ádaa nitsídaakeesgo dashoodlánígíí ła'da bąąhági át'į́ ájiilaago, tsé daashjéé' hazéédéet'ą́ągo, tónteel biih hodi'yoolghango há yá'át'éeh doo nít'éé'.

³ Ádaa ádahołyą́; nik'is nich'į' bąąhági ádzaago didííteh, áko yąąh bíni'go yaa tsídeezkéezgo, bá yóó'adidíí'ááł,

⁴ áádóó t'áá ła'a jį́ tsosts'idi nich'į' bąąhági ánádzaago, nít'éé', Bąąh shíni'go baa nitséskees, nidííniidgo tsosts'idi nich'į' ninádzáago bá yóó'anáhididíí'ááł.

Nihe'oodlą' bee aa dadzííníidlíhígíí bilááh ánílééh

⁵ Áko daal'aadii éí Bóhólníihii ádeidííniid, Nihe'oodlą' bee aa dadzííníidlíhígíí bilááh ánílééh!

⁶ Áádóó Bóhólníihii ázhdííniid, Nihe'oodlą' bee aa dzódlí ch'il mástad yolyéhígíí bílástsii'gi áníshéhí nidi, díí tsin síkamin sikaadii ábididoohniił, Hani'dólts'ǫǫdgo tónteel bii'di k'ini'dólyééł, áko t'áá ákǫ́ǫ́ nihik'ehgóó ádoonííł.

Naal'a'í binaanish

⁷ Da' nihíísh nihitahdóó ła' nihá naal'a'í hólǫ́ǫgo, áko éí nihwiiłdlaadę́ę́', doodaii' na'niłkaadę́ę́' nádzáago ábididoohniił, Hágoshį́į́ nídaahgo ííyą́?

⁸ Dooda lą́ą. Kót'éego bich'į' hadoohdzih, Ni'éé' bee áká nílzisgo adeeshį́į́ł áádóó adeeshdlį́į́ł biniyé ch'iyáán shá áníléehgo shiyaa ni'níkaah, áádóó índa ni adííyį́į́ł áádóó adíídlį́į́ł?

⁹ Da' há naal'a'ísh ábizhdííniidígi ádzaaígíí biniyé ahéhee' bijiníi doo? Dooda!

¹⁰ T'áá ákót'éego nihí ałdó' bich'į' danihi'dool'aadígíí ádaahłaago ádadidoohniił, Á naal'a'í doo ílíinii daniidlį́; t'áá bich'į' danihi'dool'aadígíí t'éí ádeiilyaa.

Diné neeznált'éego łóód ats'íís yiyáanii naałdzidii bee bąąh dah nahaz'áanii hadaałt'é áńdabi'diilyaa

¹¹ Jerúsalemgóó joogáałgo Samériya índa Gálilii kéyah bita'góó ch'ízhníyá.

¹² Nít'éé' kin sinil léi'gi jiníyáago, diné neeznált'éego łóód ats'íís yiyáanii naałdzidii bee bąąh dah nahaz'ą́ą́ léi' hadááh yíkaigo, t'áá nízaadę́ę́' naazį́,

¹³ áko hadadeeshghaazhgo ádahodííniid, Jesus, Bóhólníihii nílíinii, nihaa jiiníbaah.

¹⁴ Áko jiiłtsą́ągo ábizhdííniid, Nihílááh, nááda'iiłniihii danihinóoł'į́į́'. Nít'éé' t'áá ákǫ́ǫ́ yikahgo, hadaałt'é nídaasdlį́į́'.

¹⁵ Nít'éé' ła' hadaałt'é násdlį́į'go bił bééhoozin, áko yéego Diyin God yaa haniihgo t'ą́ą́' nádzá,

¹⁶ áko Jesus yich'į' nitsidinígo'go yich'į' ahééh niizį́į́'. Éí Samériya dine'é jílį́įgo ájít'į́.

¹⁷ Áko Jesus haadzíi'go ádííniid, Da' doósh neeznált'éego hadaałt'é nídaasdlį́į' da? Náhást'éí yilt'éhígíí éí háájí?

¹⁸ Da' Diyin God yich'į' ahééh dadínóozįįł biniyé t'áadoo t'ą́ą́' nákai da, t'áá hazhó'ó díí łahdę́ę́' dine'é nilíiniísh t'éiyá?

¹⁹ Áádóó áhozhdííniid, Nídiidáahgo nílááh yínááł; ne'oodlą' bee doo ánít'éhí da násínídlį́į́'.

Diyin God bee bóhólníihgo bił haz'áanii bił hoolzhishii

²⁰ Nít'éé' Férisii danilíinii nidahódééłkidgo ádadííniid, Hahgoshą' Diyin God bee bóhólníihgo bił haz'áanii baa hodoolzhish? Áko hadzoodzíi'go ábizhdííniid, Diyin God bee bóhólníihgo bił haz'áanii yit'į́įgo doo hodooleeł da;

²¹ doo nidi kódadidoohniił da, Jó, kǫ́ǫdí! éí doodaléi', Jó, níláhgóó! háálá jó'akon, Diyin God bee bóhólníihgo bił haz'áanii nihiyi'di hólǫ́.

²² Áádóó hódahooł'aahii ábizhdííniid, T'áá ła'a jínígoda Diné Silį́į'ii dzoołtsééł laanaa danohsingo yoołkáał dooleełii baa hodoolzhish, nidi doo deiidoołtséeł da.

²³ Áádóó ádanihididooniił, Jó, níláhgóó! éí doodago, Jó, kǫ́ǫdí! danihiłníigo t'ááká ákǫ́ǫ́ dah doohjeeh yíila', t'ááká bikéé' dadohkááh lágo.

²⁴ Háálá t'áá atsiniltł'ish aheta'go yá ha'naa aheta'ígi át'éego Diné Silį́į'ii beidoołkááł.

²⁵ Nidi k'ad átsé lą'ígóó ti'hwiizhdoonih áádóó díí oochíłígíí doo dahodínóozįįł da.

²⁶ T'áá Nóah bíyoołkááł yę́ędą́ą́' áhoot'éé nít'é'ígi át'éego, t'áá ákót'éego ałdó' Diné Silį́į'ii náádááł beiníłką́ągo ákóhoot'ée doo.

²⁷ Nóah tsinaa'eeł yiih híyáajį', diné da'ayą́ áádóó da'adlą́ índa nida'ayeh áádóó ahaa daha'nííł nít'éé', ákondi tó yíląądgo ałtso ábísdįįd.

²⁸ T'áá Lat bíyoołkááł yę́ędą́ą́' áhoot'éé nít'é'ígi át'éego, da'jiyą́ áádóó da'jidlą́, ahaa nida'jiilniih, haa nida'iiniih, k'éédazh'didlééh áádóó kin ádajile',

²⁹ nidi Lat éí Sádam kin haal'áádóó ch'íníyá bijį́įdi yádiłhił biyi'dę́ę́' kǫ' índa tsékǫ' łitsoígíí nááłtą́ągo diné ałtso íísdįįd;

³⁰ ts'ídá ákót'éego Diné Silį́į'ii yit'íní ályaa bijį́įdi áhodoonííł.

³¹ Éí bijį́įdi, t'áá háiida hakin bighą́ą'di nijigháhígíí wóne'dę́ę́' hanaalye'é ch'ízhdoojih biniyé doo yahanízhdoolwoł da, áádóó t'áá ákót'éego t'áá háiida dá'ák'ehgi nijigháhígíí doo t'ą́ą́' nízhdoolwoł da.

³² Lat be'asdzą́ą́ béédaałniih.

³³ T'áá háiida jiinánígíí ádá shójoost'e'ígíí éí yóó'azhdootłish, nidi t'áá háiida jiinánígíí yóó'azhdíí'ą́ągo éí jiinánígíí doodzih.

³⁴ Ánihidishní, T'áá éí bitł'éé' diné ła' tsásk'eh yikáá' shitéezh doo; ła' nídidooltééł, ła'ígíí éí t'áá ákǫ́ǫ dooleeł.

³⁵ Asdzání nidilt'éego t'ááłáhígóó ak'áa dooleeł; ła' nídidooltééł, ła'ígíí éí t'áá ákǫ́ǫ dooleeł.

³⁶ [Áko dá'ák'ehgi diné naaki naa'aash doo; ła' nídidooltééł, ła'ígíí éí t'áá ákǫ́ǫ doo.]

³⁷ Áádóó ádahodííniid, Bóhólníihii, díishą' háadi ákóhodoonííł? Áádóó ábizhdííniid, T'áá ha'át'íhída daaztsą́ągo sitį́įgi, ákwe'é jeeshóó' áłah nilį́į doo.