JOSHUA 8 - Navajo Bible

Éí'ai kin haal'áii yisnáago ábi'disdįįd

¹ Bóhólníihii éí Jáshowa áyidííniid, T'áadoo nił yé'í; t'áadoo ádił nisindáhí; nídiidáahgo diné nidaabaahii t'áá ałtso dah dii'éeshgo nihílááh, Éí'ai kin haal'áágóó dohkááh; jó, Éí'ai dine'é áádóó aláahgo binanit'a'í áádóó bidine'é áádóó bikin haal'áhígíí índa bikéyah nihílák'eidíí'ą́.

² Áko t'áá Jériko kin haal'áii áádóó aláahgo naat'áanii ííníł'įįdígi át'éego Éí'ai kin haal'áii áádóó aláahgo naat'áanii ákónáádíídlííł. Nidi Éí'ai dine'é bindaalye'é áádóó dabilį́į́' deidoołbįįłígíí t'áá nihí ádá nídadidoohnił. Kin haal'áhígíí bine'dę́ę'go baa nidahidoohkah.

³ Áko Jáshowa dah diiyáago diné nidaabaahii t'áá ałtso bił Éí'ai kin haal'áágóó dashdiikai, áko Jáshowa éí diné ayóó át'éego nidaabaahii tádiindi míilgo nízhdiinilgo tł'ée'go adziis'a'.

⁴ Áko bich'į' hadzoodzíi'go ájíní, Jó, kin haal'áhígíí bine'dę́ę'go baa nihidoohkah. Kin haal'áhídóó t'áadoo nízaadgóó anáhjahí, nidi t'áá ánółtso hasht'e'ádadíínółzin dooleeł.

⁵ Áko shí áádóó diné t'áá ałtso shił naakaígíí bił díí kin haal'áhígíí bit'ááh diijah. Áko átséédą́ą́' ádzaa yę́ęgi át'éego éí nihich'į' ch'íníjée'go bits'ą́ąjį' dadíníichééł.

⁶ Áko nihikéé' nídidoojahgo kin haal'áhídóó nízaadgóó bá iijée'go ádadidooniił, Áłtséédą́ą́' yę́ęgi át'éego nihik'ee yóó'adahizhneezhchą́ą́'. Éí bąą bik'ee yóó'adiijah.

⁷ Áko baa nihinoohkaídóó nídidoohjahgo kin haal'áhígíí dadoołnééł, háálá Bóhólníihii nihiDiyin God éí nihaididoo'ááł.

⁸ Áko kót'ée doo: kin haal'áhígíí dasoołnáago biih dahodidoohnił; Bóhólníihii nihich'į' yee haadzíi'ii bik'ehgo ída'doohłííł. Jó, ákót'éego nihich'į' bee haasdzíi' ni'.

⁹ Áko Jáshowa éí adahwiis'a'go aa nihizhdookahgóó ajookai; éí Béthel kin shijaa'ígíí áádóó Éí'ai kin haal'áhígíí bita'gi Éí'ai e'e'aahjígo aa nijiyeekai. Nidi t'áá éí bitł'éé' Jáshowa éí Ízrel dine'é bitahdi biiską́.

¹⁰ Áko t'ah abínídą́ą́' Jáshowa nízhdii'na'go diné dadeezbaa'ígíí hadzíísid áádóó Ízrel dine'é yiląąjį' naazíinii bił alą́ąjį' Éí'ai kin haal'áágóó dashdiikai.

¹¹ Áko diné nidaabaahii t'áá ałtso hoł naakai nít'é'ígíí hoł dah diikaigo kin haal'áhígíí bich'į' t'áá áyídíjį' nijíkai índa Éí'ai náhookǫsjígo nizhníná, áko Éí'ai kin haal'áii bił hata'gi bokooh lá.

¹² Áko ashdladi mííl diné nízhdiinilgo Béthel kin shijaa'ígíí áádóó Éí'ai kin haal'áhígíí bita'gi Éí'ai e'e'aahjígo aa héeshjée'go ájiilaa.

¹³ Áko kin haal'áhígíí náhookǫsjígo diné nidaabaahii t'áá ałtso áádóó e'e'aahjígo diné aa héeshjé'ígíí ninínáago Jáshowa t'áá éí bitł'éé' yíldzisdi biiską́.

¹⁴ Áko Éí'ai dine'é aláahgo binanit'a'í díí yiyiiłtsą́ągo kin haal'áhídóó dine'é t'áá a łtso t'ah abínídą́ą́' tsį́įłgo nídiijéé'; bí índa bidine'é t'áá bee nihoot'ą́ą́ góne' honíteelgi Ízrel dine'é bidááshníjée'go anaa' dahodzisłį́į́', nidi kin haal'áhígíí bine'dę́ę'go baa neheekaígíí doo bił bééhózin da.

¹⁵ Áko Jáshowa áádóó Ízrel dine'é t'áá ałtso hak'eh hodeesdlį́į́' ádahozhdil'į́įgo dabinááł nídazhdíníchéehgo honoojíijigo ajííjéé'.

¹⁶ Ákohgo kin haal'áá góne' diné kéédahat'ínígíí t'áá ałtso hágo bidoo'niidgo hakéé' dah diijéé', áko Jáshowa yikéé' ííjée'go kin haal'áádóó nízaadgóó yits'áníjéé'.

¹⁷ Éí' ai kin haal'áagi áádóó Béthel kin shijaa'ígi doo nidaagháhí da; éí t'áá ałtso Ízrel dine'é yikéé' ííjéé', áko kin haal'áhígíí t'áá ąą át'éego ádayiilaago Ízrel dine'é yikéé' ííjéé'.

¹⁸ Ákohgo Bóhólníihii éí Jáshowa áyidííniid, Tsiidétáán dah yítį́łígíí Éí' ai kin haal'áii bich'į'go bił dah didiilnííh, háálá éí nílák'ee dideesh'ááł áádóó Jáshowa éí tsiidétáán neitinígíí kin haal'áhígíí yich'į'go yił dah didiilnii'.

¹⁹ Áko aa héeshjée'go naháaztánídóó tsį́įłgo nídiijéé'. Jáshowa t'áá dah didiilnii'góó t'áá áko dah diijée'go kin haal'áá góne' ííjéé' áádóó éí deisnáago kin haal'áhígíí tsį́įłgo yiih dahodeeznil.

²⁰ Ákohgo Éí'ai dine'é t'ą́ą́' nídadéét'į́į́' nít'éé'; jó, kin haal'áhídóó łid yá biyi' góde hááyá, áko t'áá háajigoda dah didoojahígi doo bíighah da silį́į́', háálá Ízrel dine'é honoojíígóó danéechéhígíí hach'į' t'ą́ą́' naanázhjéé'.

²¹ Áko Jáshowa áádóó Ízrel dine'é t'áá ałtso éí aa nidahaaskaígíí kin haal'áii deisnáago łid hááyáhígíí dayiiłtsą́ągo Éí'ai dine'é yich'į' t'ą́ą́' naanázhjée'go nideistseed.

²² Áko Ízrel dine'é ła'ígíí kin haal'áhídóó éí yich'į' ch'íníjéé', ákohgo Éí'ai dine'é éí Ízrel dine'é bita'gi tsístł'aaskai, áko Ízrel dine'é ałts'ą́ą́hjí niníjée'go ałtso nidahastseed; łá'í nidi doo ła' joodzíi' da, índa doo ła' yisdájííyáhí da.

²³ Nidi Éí'ai dine'é aláahgo binanit'a'í nilíinii deisnáago Jáshowa yaa deizlóóz.

²⁴ Áádóó ákódzaago Ízrel dine'é éí Éí'aigi kéédahat'íinii honoojíígóó hakéé' yóó'ííjé'ígíí t'áá ałtso nideistseedgo Éí'ai dine'é ts'ídá ałtso diltłish yee dayííghą́ą́', áko Ízrel dine'é éí t'áá ałtso Éí'aijį' t'ą́ą́' nákai; áadi ałdó' diltłish yee nideistseed.

²⁵ Áko éí bijį́ diné áádóó asdzání danilíinii t'áá ałtso daneeznánígíí naakits'áadahdi mííl ánéelą́ą́' lá; éí t'áá ałtso Éí'ai dine'é danilį́į́ nít'éé'.

²⁶ Háálá Jáshowa éí t'áadoo t'ą́ą́' anídílníhí tsiidétáán t'áá yił dah doolnihgo Éí'aigi kéédahat'íinii ałtso ádeisdįįdjį' yił dah doolnih nít'éé'.

²⁷ T'áá hazhó'ó éí kin haal'áhídóó dabilį́į́' áádóó bindaalye'é éí Ízrel dine'é dayoosbą́ągo t'áá bí ádá nídeidii'nil; Bóhólníihii bizaad k'ehgo Jáshowa yich' į' yee haadzíi'ii ádayiilaa.

²⁸ Áko Jáshowa éí Éí'ai kin haal'áhígíí iidííłk'ą́ą́' áádóó éí hool'áágóó ałk'i yanáa'áago yíchxǫ'go éí díísh jį́į́góó ákót'é.

²⁹ Áádóó Éí'ai dine'é aláahgo binanit'a'í yę́ę tsin bąąh dah hizhdiilo'go t'áá yąąh dahidíłtį́įgo i'íí'ą́, áko jį́honaa'éí ííyáago Jáshowa áníinii bik'ehgo éí aláahgo naat'áanii bits'íís éí tsin bąąhdę́ę́' nida'iidiiłtį́įgo kin haal'áhígíí bich'é'étiinjį' adayiisxan áádóó ayóó át'éego tsé éí yik'i yáádayiitsi; éí díí jį́įjį' ákót'é.

Dził Ííbal si'ánídi bee haz'áanii bee ak'e'ashchį́

³⁰ Áko Jáshowa éí Ízrel dine'é biBóhólníihii Diyin God bá Dził Ííbal si'ánídi bikáá' náá'iiniihí ájiilaa.

³¹ Mózes éí Bóhólníihii yá naal'a'í nilíinii Ízrel dine'é yich'į' yee haadzíí' yę́ęgi át'éego í'jiilaa; t'áá Mózes bibee haz'áanii biyi' naaltsoos bik'e'ashchínígi át'éego tsé hadaałt'éii diné doo ła' béésh yee néidííłne'ii bee bikáá' náá'iiniihí ájiilaago bikáa'gi didlidgo náádahaniihii éí Bóhólníihii bich'į' náádajiiłniih nít'éé', índa hózhǫ́ǫ́jí nááhániihii ałdó' náádadziisnii'.

³² Áko ákwii Mózes bibee haz'áanii tsé bikáa'gi bee ak'e'jishchį́; éí Ízrel dine'é dabinááł bee ak'e'ashchį́įgo ájiilaa.

³³ Áko Ízrel dine'é t'áá ałtso áádóó éí aląąjį' naazíinii áádóó naat'áanii danilíinii índa bi'ándahwii'aahii éí Líívai dine'é nááda'iiłniihii danilínígíí Bóhólníihii bitsits'aa' dílzinii éí bee aha'deet'áanii bii' sinilii deí'aahígíí ałnaashiijí naazį́; éí dé'éyóní danilíinii, Ízrel dine'é t'áá bił ałníí'dóó Dził Gérazim bitsį́į́dóó naazį́, índa náá'áłníí'dóó éí Dził Ííbal bitsį́į́dóó nináádaasdzį́; t'áá Mózes éí Bóhólníihii yá naal'a'í nilíinii yich'į' yee haadzíi'ii bik'ehgo éí Ízrel dine'é danilíinii yik'idajidlíi doo.

³⁴ Íídą́ą́' Jáshowa éí bee haz'áanii bits'ą́ą́dóó saadígíí t'áá ałtso jííłta'; bee ak'ihojidlí áádóó hóyée'go á ha'iidziih bik'ehgo éí t'áá ałtso naaltsoos bii' bee haz'áanii bee ak'e'ashchį́.

³⁵ Mózes saad yee haadzíi'ii t'áadoo doodaí t'áá át'é Ízrel dine'é áłah nilínígíí t'áá ałtso binááł Jáshowa saad jííłta'; éí asdzánída áádóó á łchíní t'áá ádaałts'íísíjį' índa dé'éyóní danilíinii hatahgóó kéédahat'ínígíí da'íists'ą́ą́' nít'éé'.