JOSHUA 3 - Navajo Bible

Ízrel dine'é éí Jórdan tooh ha'naa niníná

¹ T'ah abíínídą́ą́' Jáshowa nídii'na'go Shíttimdóó dah náádadii'ná, áko Jórdan toohjį' Ízrel dine'é t'áá ałtso bił jiníná, índa t'ah doo ha'naa niinééhgóó t'áá ákwii dabiiską́.

² Áádóó ákódzaago táá' yiską́ą́dóó bik'ijį' diné naat'áanii danilíinii dah da'ínéhígíí yitahgóó tádookaigo

³ diné yich'į' hadaasdzíi'go ádaaní, Bóhólníihii nihiDiyin God bitsits'aa' dílzinii éí bee aha'deet'áanii bii' sinilii Líívai dine'é nááda'iiłniihii éí deí'aahgo deidoołtsééł índa bikéé' dah didoohkahgo bikéé' wohkah doo.

⁴ Ákót'ée nidi nihita' ahonízahgi bídadí'nóoł'aał go táadi mííl ké silá ánízahdę́ę́' bikéé' wohkah doo. Tsits'aa' dílzinii éí t'áadoo bit'áahjį' nidaahkaí, áko disoohkaigóó nihił béédahózin doo, háálá t'ah doo kojį' dohkáah da nít'éé'.

⁵ Áádóó Jáshowa éí diné áyidííniid, T'áá nihí diyingo áda'didoołnííł, háálá yiską́ągo nihitahgi Bóhólníihii álílee ayóó ádaat'éii íidoolííł.

⁶ Áádóó Jáshowa éí nááda'iiłniihii áyidííniid, Tsits'aa' dílzinii éí bee aha'deet'áanii bii' sinilii nídadooh'aahgo diné bilą́ąjį' deínóh'aah doo. Áko tsits'aa' dílzinii éí bee aha'deet'áanii bii' sinilii nídeidii'ą́ągo diné yilą́ąjį' dah diikai.

⁷ Áko Bóhólníihii éí Jáshowa áyidííniid, Díí jį́ Ízrel dine'é t'áá ałtso dabinááł ayóó át'éii nílį́įgo ándeeshłííł, áko díí bił béédahózin doo: Mózes bił honishłǫ́ yę́ęgi át'éego nił honishłǫ́ǫ doo.

⁸ Áádóó bich'į' bee handziihgo nááda'iiłniihii éí tsits'aa' dílzinii éí bee aha'deet'áanii bii' sinilii deí'aahígíí ábidiní, Jórdan tooh bibąąhjį' oohkaigo Jórdan tooh ałníi'gi hazhó'ó deidoosįįł.

⁹ Áko Jáshowa éí Ízrel dine'é áyidííniid, Wóshdę́ę́' hidohkááh, Bóhólníihii nihiDiyin God bizaad dadidoohts'į́į́ł.

¹⁰ Áko Jáshowa ání, Díí nihił béédahodoozįįł: Diyin God hináanii nihitahgi hólǫ́; éí t'áadoo ch'ééh ííł'íní nihilą́ąjį' Kéínan dine'é, Het dine'é, Háíva dine'é, Píírez dine'é, Gírgas dine'é, Ámor dine'é índa Jííbas dine'é ałtso baa ch'íhidoojah.

¹¹ Jó, nahasdzáán t'áá át'é bee Bóhólníihii bitsits'aa' dílzinii éí bee aha'deet'áanii bii' sinilii nihilą́ąjį' Jórdan tooh ha'naa nidoot'ááł.

¹² Éí bąą k'ad Ízrel dine'é bitahdóó diné naakits'áadahgo nídiinííł; diné t'ááł á'í nítínígo ał'ąą dóone'é danilį́įgo nídidíínił.

¹³ Áádóó kót'ée doo: nááda'iiłniihii éí Bóhólníihii bitsits'aa' dílzinii deí'aah dooígíí taah dadeestáalgo, éí nahasdzáán t'áá át'é bee Bóhólníihii bitsits'aa' dílzinii éí bee Jórdan tooh áhodidoolzih, áko Jórdan tooh wódahdę́ę́' nílínígíí áhodiilzee'go doo nílį́į da dooleeł índa nihidii'áa dooleeł.

¹⁴ Ákódzaago diné dabiníbaaldóó Jórdan tooh ha'naagóó dah dadiináago tsits'aa' dílzinii éí bee aha'deet'áanii bii' sinilii diné yilą́ąjį' deí'aahgo yikah.

¹⁵ Áádóó tsits'aa' dílzinii deí'aahígíí Jórdan toohjį' yíkaigo áádóó nááda'iiłniihii tsits'aa' dílzinii deí'aahígíí tábąąhgi táyi' deizį'go, (Jórdan tooh éí t'áá nída'nt'į́į́h bik'eh nádląąhgo ałtso wó'anídadziiłhał,)

¹⁶ áko íídą́ą́' tooh wódahdę́ę́' nílínígíí Záretan t'áá áyídígi Ádam kin haal'áhídóó nízaadi i'nool'ąądgo áhodiilzee'go doo nílį́į da índa nihidii'á silį́į́'; dzígaigi tónteel siyínígíí, éí Tónteel Dók'ǫ́ǫzhii hoolyéii, bich'į'go tó nílínígíí íígo', índída Ízrel dine'é éí Jériko bich'ijigo tsé'naa niníná.

¹⁷ Áádóó nááda'iiłniihii éí Bóhólníihii bitsits'aa' dílzinii éí bee aha'deet'áanii bii' sinilii deí'aahgo ni' hóółtseigi Jórdan tooh ałníi'gi naazį́į́ nít'éé'; Ízrel dine'é t'áá ałtso ni' hóółtseigóó tsé'naa yikahgo diné ałtso Jórdan tooh ha'naa niikai.