JONAH 3 - Navajo Bible

Nínevehgi dine'é łahgo át'éego tsíńdadeezkééz

¹ Áádóó naakidi aleeh góne' Bóhólníihii éí Jónah yich'į' hanáánáádzíi'go ííłní,

² Nídiidáahgo nílááh, Níneveh ayóó át'é kin haal'áajį' dínááh, áádóó nidishnínígíí bee bił hodíílnih.

³ Áko Bóhólníihii bizaad k'ehgo Jónah hasht'e'ádiilyaago Nínevehgóó dashdiiyá. Ákohgo Níneveh ayóó át'é kin haal'á ha'naa nijígháahgo tágí jį́ oodááł bíighah.

⁴ Áádóó Jónah dashdiiyáago kin haal'áá góne' ajííyáago ła'a jį́ oodááł ánízahgóó nizhníyá, áko jidilwoshgo ájíní, Dízdiin jį́ t'ah hadziih áádóó índa Níneveh kin haal'á ałtso ádooldįįł!

⁵ Ákohgo Níneveh dine'é Diyin God dayoosdląąd, áádóó hodílzingo doo adą́ nídaoł'aah, dadííniid áádóó aláahgo ádajít'éii índa a'ohgo ádajít'éii tł'oh yishbizh biih dadziskai.

⁶ Níneveh dine'é aláahgo binanit'a'í hane' yidiizts'ą́ą'go yikáá'dóó naha'áii yikáá'dóó nídii'na'go bi'éénééz agháago yá'át'éhígíí haidiiltsooz áádóó tł'oh yishbizh yiih yíyáago łeeshch'iih yahiikaahígi neezdá.

⁷ Áádóó aláahgo naat'áanii índa bikéédę́ę́' naat'áanii danilíinii éí bee nihoot'áanii kóníigo Níneveh kin haal'áagi t'áá níłtéél nít'éé' baa dahane'go ádayiilaa, Diné áádóó nidaaldlooshii, da'alį́į́' dah danéelkaadii t'ááká ha'át'íhída dayólįh lágo; bíni'dii t'áadoo da'ayání índa t'áadoo da'adlání doo,

⁸ nidi diné índa nidaaldlooshii bíni'dii tł'oh yishbizh bik'ídaasti'go yéego Diyin God nídayookąąh; bíni'dii t'áá ádzíłtso doo yá'áshǫ́ǫ́góó dajíkáahii índa t'áá na'níle'dii ádajooníiłii yóó'adazhdidoo'ááł.

⁹ Háísh díí bił bééhózin? Diyin God daats'í łahgo át'éego tsíńdookos áádóó báhóóchįįdii łahgo át'éego ánéidoodlíiłgo da'át'é, áko doo ádiidįįł da.

¹⁰ Ákohgo Diyin God éí ádajooníiłii doo yá'áshǫ́ǫ́góó dajíkááh nít'éé' yę́ę łahgo áńdajiidlaago yiyiiłtsą́ągo Diyin God éí áhodoołdįįłgo tsídeezkéezii łahgo ánááyiidlaa; atíhodoolíiłgo yee haadzíi'ii t'áadoo áyiilaa da.