JOHN 2 - Navajo Bible

Kéínadi iigeh

¹ Nít'éé' táá' yiską́ągo kéyah Gálilii biyi' Kéína kin sinilígi iigeh lá, áko Jesus bimá ákwii nijighá;

² Jesus índa bídahooł'aahii iigehjį' hágo bi'doo'niid.

³ Nít'éé' wáin ásdįįdgo, Jesus bimá ábidííniid, Wáin bee ádaasdįįd.

⁴ Áko Jesus bimá áyidííniid, Asdzání, shíísh haa shidíílíiłgo shaa nánít'į́? Baa nideeshaałígíí t'ah doo shá baa hoolzhíish da.

⁵ Áko hamá éí nidaal'a'ígíí áyidííniid, T'áá ánihiłnínígóó ádaahnííł.

⁶ Nít'éé' ákwii Jew dine'é binahagha' bik'ehgo tó bee tá'ádígis biniyé tóshjeeh nitsaii tsé bee ádaalyaaígíí hastą́ągo sinil, naadiin daats'í, doodaii' tádiin daats'í tó yikááł dabíighah.

⁷ Nít'éé' Jesus áhodííniid, Tóshjeeh bii' tó hadadołbin. Áko t'áá dabidáa'jį' hadazhdééłbįįd.

⁸ Áádóó ánááhodoo'niid, K'ad ła' haohkaahgo bik'ehgo áda'azįįdii baa nohkaah. Áko baa dadzizką́.

⁹ Áádóó bik'ehgo áda'azįįdii tó wáin ániidíii silį́'ígíí yizlįh, nít'éé' hazlį́į́'dę́ę́' doo bił bééhózin da (nidi nidaal'a'í tó hadayiizkánígíí t'éiyá bił béédahózin), áko bik'ehgo áda'azįįdii adooyehii hágo yidííniidgo

¹⁰ ííłní, Diné ła' wáin yá'át'éhígíí alą́ąjį' aa dayiikaah łeh, lą'í deidlį́į́hdóó bik'ijį' índa wáin t'áá azlį́'ígíí łeh, nidi ni t'éiyá wáin yá'át'éhígíí akéédę́ę́' aa dííkáałgo áásínísįįd lá.

¹¹ Díidí ts'ídá áłtséedi Jesus bibee adziilii bee béédahózinii áyiilaii át'é, éí kéyah Gálilii biyi' Kéína kin sinilígi yaa naayá, áko yee ayóó át'éii ííshją́ą́ áyiilaago bídahooł'aahii daboosdląądgo baa dadzoozlíí'.

¹² Áádóó bik'ijį' Kapérniyam góyaa, hamá áádóó hatsilíké índa hódahooł'aahii bił jíkai, áko áadi t'áá díkwíí dahwiiską́.

Kin bii' sohodizin nidayiiłchxǫǫhii ch'íneelkaad

¹³ Ákohgo Jew dine'é bi'atis'adeesdzá bee bééhániihii k'adę́ę baa hoolzhíishgo, Jerúsalem góde Jesus dah diiyá.

¹⁴ Kin bii' sohodizin bił haz'ą́ą́ góne' béégashii áádóó dibé áádóó hasbídí nidayiiłniihígíí nida'iiłniihgo índa béeso ałghááda'a'nilii nidaháaztą́ągo béeso t'áá sahdii ádaat'éhígíí yił ałghááda'a'nilgo bik'ízhníyá.

¹⁵ Áko tł'óół ts'ósí bee atsxis ájiilaago kin bii' sohodizin bił haz'ání biyi'dóó diné áádóó dibé índa béégashii t'áá ałtso ch'ínizhníłkaad, áádóó béeso ałghááda'a'nilii bibéeso yajiyiiką́, áádóó bikáa'gi ałghááda'a'nil naa'adziistł'ííd.

¹⁶ Hasbídí nidayiiłniihii ábizhdííniid, Díidí ch'ídahohjááh; shiTaa' bikin biyi' góne' t'áadoo na'iiniih bá haz'ą́ągo ádaał'íní.

¹⁷ Nikin t'áá íiyisí baa hą́ą́h nisingo bíneeshdlínígíí t'áá áshidoołdįįłgo shide át'é, ha'níigo bee ak'e'ashchínígíí hódahooł'aahii yéédáálnii'.

¹⁸ Áko Jew dine'é hadaasdzíi'go ádahodííniid, Nóhólníihgo díí íinidzaaígíishą' ha'át'íí bee bééhózin dooleełii bee nihił bééhodíísįįł?

¹⁹ Jesus ánáábidoo'niid, Díí kin bii' sohodizin atídaahłééh, áádóó táá' yiską́ąjį' ninádeesh'ááł.

²⁰ T'áá áko Jew dine'é ádadííniid, Díí kin bii' sohodizin t'áá álnéehgo dízdiindóó ba'aan hastą́ą́h nááhai, da' ákoósh táá' yiską́ąjį' nínáábididííłááł lá?

²¹ Nidi t'áá hó hats'íís kin bii' sohodizin át'éego éí ábijiní.

²² Éí bąą dadziztsą́ą́dę́ę́' nááho'diilzáago, hódahooł'aahii díí bee hadzoodzí'ígíí yéédáálnii', áko Diyin God bizaad bee ak'e'ashchínígíí áádóó Jesus saad bee hadzoodzí'ígíí dayoosdląąd.

Diné ádaat'éhígíí t'áá ałtso Jesus bił bééhózin

²³ Atis'adeesdzá bee bééhániihgo hodílzingo áłah ná'ádleehgo Jerúsalemgi nijigháago, habee adziilii bee éédahózinii ájiilaaígíí dayoo'į́įgo t'óó ahayóí dahoosdląądgo haa dadzoozlíí',

²⁴ nidi Jesus éí t'áadoo haa ádeet'ą́ą da, háálá diné ádaat'éhígíí t'áá ałtso hoł bééhózin,

²⁵ áádóó t'áá háiida diné ádaat'éegi yee hoł hodoolnihgi doo bee hach'į' anáhóót'i' da, háálá diné ádeinízinígíí Jesus t'áá bí bił bééhózin.