JOEL 2 - Navajo Bible

¹ Dził Záiyangi deenásts'aa' bidee' bee í'dísooł áádóó shidził diyinii bighą́ą́'góó bee i'doolnihgo didoots'į́į́ł. Háni' kéyahgóó kéédahojit'íinii t'áá ádzíłtso hatah dahoditłid, háálá Bóhólníihii nídoodáłígíí baa hodoolzhish. T'áá aaníí, k'adę́ę baa hoolzhíísh.

² Éí jínígíí bił chahodoołhiłgo chahałheeł nídoodleeł; k'os bee chadahałheełgo hodoolzhish. Dziłghą́ą́'góó hoos'įįdígi át'éego diné t'óó ahayóigo índa ayóó ádabóodziilii nídoosééł. Yoołkááłdę́ę́' ts'ídá doo ákóhánéeh da nít'éé', doodaii' nináháhááhgóó náás ahoolchíiłii bitahgóó nidi, ts'ídá doo ákónááhodoo'níił da.

³ Bilą́ąjį' kǫ' ó'oołdįįł índa bikéédę́ę́' kǫ' naanídoonałígíí i'diiłk'ą́ą́h. Bidáahgi éí Ííden dá'ák'eh yę́ę honoolnin, nidi bikéédę́ę́' honoojíígóó t'áá át'é t'áá ádzaaí silį́į'ii nahalin, áádóó ts'ídá doo yisdáhóót'i' da hazlį́į́'.

⁴ Ádanóolninígíí łį́į́' nidahalin, índa łį́į́' bee na'abaahii nidahalingo dadilwo'.

⁵ Tsindaabąąs bijáád naakiígíí dadiits'a' nahalingo áádóó ehégod dadéek'ą́ą́h yits'a' nahalingo índa siláo dabidziilii ak'iijeeh nahalingo dził yáhátis aheezhjéé'.

⁶ Bidááhgóó diné bich'į' nidahwii'náago t'áá ałtso binii'jį' deitsoi.

⁷ Diné ayóó ádaat'éii nidahalingo deíjeeh; nidaabaahii nahalingo tsé ahénátł'inii yitis daha'nééh; t'ááłá'í nítínígo t'áá k'éhézdon ałkéé' nít'i'go doo nahjį' háádaalwo' da.

⁸ Doo nidi nahjį' anída'ahilgoh da, t'áá ałtso t'áá bá haz'ą́ą́ góne' deíkááh índa bee na'abaahii yił ch'éhéjeeh, nidi doo ni' kódabiléeh da.

⁹ Kin haal'áhígíí yich'į' ałnánájahgo ditą́ągo binaa ahéé'ítł'inii yikáá'góó hidijeeh áádóó kin yiih hi'néehgo ani'įįhii nahalingo tsésǫ' góne' yah ahidoojah.

¹⁰ Áko bidááhgóó nahasdzáán nahaasnáá' áádóó yót'ááh bii' hiníláii nidahaasnáá'; jį́honaa'éí índa tł'ééhonaa'éí bił chahóół héél áádóó sǫ' doo dadi'níłdíin da silį́į́'.

¹¹ Bóhólníihii éí bisiláo yich'į' haadzíí', áko bits'ą́ą́dóó dah yinéełii ayóó ádaat'é áádóó bizaad yik'eh hół'íinii ayóó ábóodziil. Bóhólníihii beidoołkáłígíí ayóó át'éego ádoonííł índa t'óó hóyé' ígi áhodoonííł. Háishą' yich'į' ha'ólníi doo?

Bóhólníihii bibee ajooba'

¹² K'ad Bóhólníihii kóní, T'áadoo da'ohsání daohchago índa yínííł danohłį́įgo nihijéí t'áá át'é bee shich'į' ninánóhkááh.

¹³ Áko nihijéí nidahohsǫ́ǫ́s; nihi'éé' éí dooda. Bóhólníihii nihiDiyin God bich'į' nináhóhkááh, háálá jooba' áádóó aa a'ááh nízinii nilį́; tąądee bánáháchįįhii nilį́ áádóó ayóó'ó'ó'ní yee t'áá yit'éhí yit'éii nilį́ índa doo yá'át'éehii łahgo át'éego yąąh tsíńdíkos.

¹⁴ Bóhólníihii nídooyisgo łahgo át' éego daats'í tsíńdookos áádóó nihik'izhdoodliiłgo da'át'é. Éí ak'áán índa yanáadzi'go Bóhólníihii nihiDiyin God bich'į' nááhidoonihii daats'í nihaididoo'ááł.

¹⁵ Záíyan kin haal'áagi deenásts'aa' bidee' bee í'dílzoołí bee ída' dohsooł; hodílzingo doo adą́ ats'ánó'aah.

¹⁶ Dílzingo áłah doohłeeł biniyé bíká ádadohní. Diné áłah ádaahłééh; diyingo ádaohłééh; hastóí aląąjį' naazíinii áłah ádaohłééh, áłchíní áádóó t'ah da'ałt'o'ii áłah ádaohłééh. Bíni' diné adooyehii bikindóó ch'éghááh áádóó bá'doogehii ałdó' bíni' bighandóó ch'éghááh.

¹⁷ Nááda'iiłniihii éí Bóhólníihii yá nidaal'a'í danilíinii bíni' chaha'oh áádóó bikáá' náá'iiniihí bita'gi daachago kódaaníi le', Bóhólníihii, nidine'é yisdánínííł; níí' nilíinii t'ááká baa yáhásinii baa dóó'áałgo ana'í danilíinii bee ádidahólnííh lágo! Áko ha'át'íísh biniyé, Háájíshą' biDiyin God? dabidi'níi doo.

¹⁸ Áko Bóhólníihii bikéyah yíneedlį́į doo índa bidine'é yaa a'ááh dínóozįįł.

¹⁹ Bóhólníihii éí bidine'é yich'į' t'ą́ą́' háádoodzihgo ádidooniił, T ł'oh naadą́ą́' ániidíii áádóó wáin ániidíii índa ak'ah ániidíii nihich'į' kónídeeshdlííł, jó'akon. Áko éí bee hwiih danohłį́į doo. Áko ana'í danilíinii bitahgi nihá nahat'i'go doo ánáánihideeshdlíił da.

²⁰ Náhookǫsdę́ę́' siláo dah yinéełii nihits'ą́ąjį' nízaadgóó kóhodeeshłííł índa kéyah bii' doo naagháhígóó hóółtseiijį' ahodínéeshkał; alą́ąjį' yikahígíí éí ha'a'aahjigo tónteel bii'jį' índa akéédę́ę́' yikahígíí éí e'e'aahjigo tónteel bii'jį' ahodínéeshkał; hats'á dahoníłchxonígíí háátsxaaz doo, háálá doo yá'áshǫ' ayóó át'éii yaa naayá.

²¹ T'áadoo náníldzidí, kéyah nílíinii, nił hózhǫ́ áádóó t'áá íiyisí nił nihoozhǫǫh, háálá Bóhólníihii ayóó át'éego áyiilaa.

²² Halgaigóó naaldlooshii danohłíinii, t'áadoo nihił daayé'í, háálá honoojíígóó nídahootsoi, tsin bineest'ą' nídahasdlį́į́', tsin fig sikaadii áádóó ch'il na'atł'o'ii bąąh nída'neest'ą́.

²³ Záíyan ba'áłchíní danohłíinii, nihił dahózhǫ́ǫgo Bóhólníihii nihiDiyin God bee nihił nidahoozhǫǫh, háálá aak'eego nahałtinígíí nihich'į' kónááyiidlaa; t'áá nááháłtį́į́h yę́ęgi át'éego aak'eego índa dąągo nahałtinígíí nihich'į' kónááyiidlaa.

²⁴ Nída'oolch'ihgóó tł'oh naadą́ą́' hadadeezbin doo; bii' da'aljizhí biyi'dę́ę́' wáin ániidíii áádóó ak'ah ániidíii wó'ądaazlį́į doo.

²⁵ Nahachagiitsoh naanááséłígíí áádóó nidaa'na'ígíí áádóó nanise' yaa nahodikaígíí índa da'agháazhii éí dah yinéełii ayóó ádaat'éii shíhígíí nihich'į' yíł'aadígíí nináháhááh bíighahgo nihits'ą́ą́' da'ííyą́ą'ii nihá bilááh áńdeeshdlííł.

²⁶ T'óó ahayóí da'ohsą́ą doo índa hwiih danohłį́į doo. Áko Bóhólníihii nihiDiyin God bízhi' baa dahohniih doo, éí nihitahgóó ayóó ádaat'éii nihá yaa naayá. Áko shidine'é ts'ídá doo baa yádahasin da doo.

²⁷ Ízrel dine'é bitahgóó honishłǫ́ǫgo nihił béédahózin doo, áko shí Bóhólníihii nihiDiyin God nishłį́, áádóó doo ła' diyin nááhódlǫ́ǫ da. Áko shidine'é ts'ídá doo baa yádahasin da doo.

Diyin God biNíłch'i Diyinii ak'i hoole'

²⁸ Díí kódzaadóó bik'ijį' nihokáá' dine'é t'áá ałtso shiNíłch'i bik'i hwiidooleeł, áko nihiye'ké áádóó nihitsi'ké Diyin God yá dahalne' dadooleeł áádóó nihadahastóí nideiyeeł dooleeł índa nihitsíłke'é bił ádahat'į́į dooleeł.

²⁹ Éí yoołkáałdi diné shá nidaal'a'í índa asdzání shá nidaal'a'í nidi shiNíłch'i t'áá biláahgo baa dideesh'ááł.

³⁰ Áko yót'ááh hiníláii biyi'di áádóó nahasdzáán bikáa'gi ayóó át'éego áhooníiłii éí dił áádóó kǫ' índa łid áhí nahalingo ádadeeshłííł.

³¹ Jį́honaa'éí bił chahodoołhił índa tł'ééhonaa'éí dił nahalin dooleeł. Bóhólníihii t'ah doo beiyíłkaahgóó áhodoonííł; jó, éí ayóó át'é índa oo'áał doo.

³² Áko t'áá háiida Bóhólníihii bízhi' bee józhíigo níjooskanígíí yisdáhodoołtééł, háálá Dził Záíyan bighą́ą'di índa Jerúsalem kin haal'áadi kéédahat' íinii bá ch'ídahwiizt'i' doo. Bóhólníihii yee haadzíí' yę́ęgi át'éego daadzíi'ii bitahgi Bóhólníihii yíká ádííniidígíí kééhat'į́į doo.