JEREMIAH 4 - Navajo Bible

¹ Ízrel dine'é nílíinii, naa nítsínídzáago shaa nídíídááł, ní Bóhólníihii. Áádóó doo bee níldinii honishłǫ́ǫ́dóó nahjį' kwíinilaago áádóó doo shich'į' ni'nílį́į́góogo,

² t'áá aaníí ádíníigo áádóó doo haadeit'éii nidííní'ą́ągo índa t'áá ákogi át'éii bee nitsíníkeesgo, Bóhólníihii hiná, diníigo bee ádee hadíínídzíi'go, áko lá índa hanahjį' ał'ąą dine'é bił nidahoozhǫǫh doo, áádóó hanahjį' haa dahaniih doo.

³ Háálá Júdah kéyahgi índa Jerúsalem kin haal'áagi diné kéédahat'ínígíí Bóhólníihii kwáháłní, Doo nihwiisdládígóó nidahoyołdlaadgo hosh ádaadingóó k'ida'dohłé.

⁴ T'óó báhádzidgo shibee atí'él'íinii doo hadidoonołgo adidoołił da, áádóó ła'da doo ch'ééh yiniłtsées da dooleełígíí biniyé Júdah dine'é nohłíinii índa Jerúsalemgi kééhoht'íinii, Bóhólníihii binááł ádąąh nídahinołgishgo nihijéí bąąhdóó nahjį' ádaahłééh, háálá doo yá'át'éhígíí ádaohnííł.

Júdah dine'é éí ana'í baatįįh yinéhígíí bee bił yéé' áhoolyaa

⁵ Júdah kéyahgi baa dahołne', áádóó Jerúsalem kin haal'áagi bee nidadołghaash, Kéyahgi deenásts'aa' bidee' bee ída'dohsooł. Ahóokáahgo, tį' kin hadaas'á ditą́ągo binída'astł'inígóó dadiikah, diníigo ts'ídá yéego bee nidílghaash.

⁶ Dził Záíyan bich'į'go dah na'at'a'go ánílééh, háálá náhookǫsdę́ę'go ayóó át'éego atí'oolíiłii bi'deeshnih. Ákǫ́ǫ́ dadohjeehgo t'áadoo t'áá kǫ́ǫ́ nidaahkaí.

⁷ Nihikéyahgi doo siláhígóó íidoolííł, áádóó nihikin hadaas'áii naa'iidiyoołkałgo ákǫ́ǫ́ doo nidaagháhí da doo biniyé náshdóítsoh bitsiijį' ditł'ooígíí bighandóó hodíłch'ildę́ę́' ch'íníyá; ał'ąą dine'é atíyoolíiłii aadę́ę́' yigááł.

⁸ Díí biniinaa tł'oh azis bee áká daałzis, áádóó Bóhólníihii t'óó báhádzidgo báhóóchįįdígíí doo nihits'ą́ąjį' kónáyiidlaa da. Díí biniinaa dadinoh'níigo daohchxa.

⁹ Áko éí yoołkáałdi aláahgo naat'áanii índa naat'áanii danilíinii bijéí nitsidadooltłił, áádóó nááda'iiłniihii tsídadidoolyis, índa náás áhodooníiłii yaa dahalne'ii t'óó bił ałtaa daha'aah doo, ní Bóhólníihii.

¹⁰ Áko ádííniid, Ha'át'íí lá ahayóí lá, Bóhólníihii, díí dine'é índa Jerúsalemgi kééhat'íinii nihich'į' hózhǫ́ǫgo kééhoht'į́į dooleeł, bidííníniidgo t'áá íiyisí binisínílo'; jó, diltłishda bee atídanihidi'doolnííł.

¹¹ Éí hoolzhishdi díí dine'é índa Jerúsalemgi kéédahat'íinii bee bich'į' ha'doodzih, Doo bee ąąh doolch'ih da índa chin doo ąąh dooldah da biniyé honoojítahgi wódahgo nahaz'ánígóó shidine'é bitsi' bich'į' t'áá íiyisí hadoh bił dooyoł.

¹² Díí ąąh doolch'ih áádóó ąąh dooldah biniyé yéego bich'į' dooyołgo ádeeshłííł; k'ad há nihodeesh'ááł.

¹³ Shoo, k'os hadahalzhood nahalingo yinééł; bitsindaabąąs bijáád naakiígíí éí nááts'ó'oołdísii nidahalin; atsá naat' a'ígíí bilááh át'éego bilį́į́' dadilwo'. Hatihíláane'ęę! K'ad lą́ą danihi'doolchxǫ'!

¹⁴ Jerúsalemgi kéédahoht'íinii, yisdánihi'didoo'niłígíí biniyé doo yá'áshóonii nihijéí bąąh táádaohgis. T'áadoo biniyéhígóó nitsídaahkeesígíishą' haa nízáágóó nihii' hólǫ́ǫ doo?

¹⁵ Dan dine'é bikéyahdę́ę́' iinéé' ła' halne'; Dził Íífreiyim bighą́ą́'dę́ę́' doo yá'áshónígi ádahodooníłígíí yaa halne'.

¹⁶ Ał'ąą dine'é bił dahólne'go nízaadi kéyahdę́ę́' ni'ana'í hadanisíidii nidahaaznáago ninídoolzhish; Júdah kéyahgi kin hadaas'áii yik'ijį' danilį́įgo yit'ááh nájahgo nidadilghaash doo, diníigo Jerúsalem kin haal'á bik'ijį' nílį́įgo hólne', jó'akon.

¹⁷ Dooda bee shich'į' nidadziste'ígíí biniinaa dá'ák'eh yaa ádahalyáanii nahalingo hak'i dinaadę́ę́' hada'asíidgo yinídoolzhish, ní Bóhólníihii.

¹⁸ Bee ánít'éii índa áánííł yę́ę éí bee díí nik'i néit'i'. Díí lą́ą doo yá'áshǫ́ǫ́góó íínít'įįdii áádóó t'áá íiyisí dích'íi'ii nijéí bínéés'ąąd.

¹⁹ Shii' sizíinii nílíinii, deenásts'aa' bidee' bee í'dílzoołí dadiits'a'go índa ałt'ááh jííjée'go disíníts'ą́'ígíí biniinaa nitsináshtłi'ii bee nitsináshtłi', áádóó shijéí diniih, shijéí doo hasht'edit'eehgóó doo dííníshxéel da.

²⁰ Doo asohodoobéézhgóó atí'oolnííł. Kéyah t'áá náhwiist'ą́ą́ nít'éé' doo siláhígóó ályaa. T'áá ha'oo'nihee shiníbaal naaznilii daalchxǫ' áádóó dáádadeezbaalii nidayiisdláád.

²¹ Haa lá nízáágóó dah na'at'a'ígíí nísh'į́į doo? Índa haa lá nízáágóó deenásts'aa' bidee' bee í'dílzoołí dadiits'a'go diists'a' doo?

²² Jó, shidine'é doo ádahalyą́ą da; doo shéédahósin da; t'óó ádahodiilgis; doo ak'ida'diitįįh da. Doo yá'áshǫ' ádeidoolíłígíí yaa dahóyą́; yá'át'éehii yaa nidadookahígíí doo bił béédahózin da.

²³ Nahasdzáán bikáa'jį' déé'į́į́' nít'éé', shoo, t'áadoo ánoolniní da áádóó t'áadoo bikáá' siláhí da. Yót'ááh góde déé'į́į́' nít'éé', doo dadi'nídíin da.

²⁴ Daadziłgóó déé'į́į́' nít'éé', shoo, daditłid, áádóó dah daask'idii t'áá át'é ałnáádaalki'go nidaha'ná.

²⁵ Náádéésht'į́į́' nít'éé', shoo, doo naagháhí da, tsídii nidi t'áá ałtso yóó'adahaast'a' lá.

²⁶ Náádéésht'į́į́' nít'éé', shoo, kéyahgi lą'í na'nt'ą'ígi honoojí t'éiyá haazlį́į́' lágo yiiłtsą́, áádóó ákwii kin hadaas'áii Bóhólníihii binááł índa t'óó báhádzidígi át'éego báhóóchįįdígíí bidáahjį' ałtso atídaalyaago nihidadíl'áago yiiłtsą́.

²⁷ Jó, Bóhólníihii kóní, Kéyah t'áá náhwiist'ą́ą́ nít'éé' hóóchxǫ'go haz'ą́ą doo, nidi doo t'áá át'é hodeeshchxǫǫł da.

²⁸ Díí biniinaa nihokáá' dine'é atínídadindleeh doo, índa yádiłhił éí yidoojį́į́ł, háálá kót'éego bik'eh ádahooshłaa, áádóó bee haasdzíí'; t'áadoo t'ą́ą́' hónéisdzaa da, índa t'áadoo łahgo át'éego tsíńdíkéez da.

²⁹ Łį́į́' bikétł'in áádóó ałtį́į́' anídahata'go dadiists'ą́ą'go kin haal'áagi diné kééhat'ínígíí t'áá át'é dadínóodzoł, áko hodíłch'il góne' adahidoolwoł, áadi tséghą́ą́' hadahidoo'nah. Kin hadaas'áii t'áá át'é yits'ádínóodzoł; ákwii diné doo ła' kééhat'į́į da doo.

³⁰ Áko kin haal'áii doo naagháhígóó haz'áanii, haashą' díínííł? Azhą́ naa'at'ą́hí łichxíi'ii ni'éé' íinilaa nidi, índa óola bee na'ádíních'ąą' nidi, áádóó ninák'eegi hoshínídléezhgo nináátsohgo íinilaa nidi, t'áadoo biniyéhígóó ayóó áníínílningo í'dinilyaa. Bił ałch'į' dah danilwo'ii dani'į́; dandiyoołhéełgo naa nidahaakai.

³¹ Asdzání i'niiłchíihgo bił hodiniihígi át'éego yichago awéé' ts'ídá áłtsé yidoołchíiłii k'adę́ę yiłchí nahalingo Záíyan bich'é'é bíká i'doolwołígíí yiniyé dah doolnihgo ch'ééh didziihgo índa yichago da'agháanii bąąh nanííłna' biniinaa dooládó' hojooba' ádíshníi da! níigo diséts'ą́ą́'.