I SAMUEL 29 - Navajo Bible

Filístiya dine'é éí David yaa ayadahooliih

¹ Áko Filístiya dine'é bisiláo t'áá ałtso Éífek kin shijaa'ígi áłah silį́į́', índa Ízrel dine'é éí Jézriyel nahós'a' tó háálínígi dah yinééł.

² Filístiya dine'é bindanit'a'í éí neeznádiingo áádóó miil daalt'éego ałkéé' deínééh, índa David áádóó diné hoł naakaígíí éí Éíkish bił akéédę́ę́' níná.

³ Filístiya dine'é bindanit'a'í ádadííniid, Díí Hííbrew dine'éshą' kwe'é ha'át'íí yaa naakai? Áko Éíkish éí Filístiya dine'é bindanit'a'í áyidííniid, Díísh doo David át'į́į da? Éí Ízrel dine'é aláahgo binanit'a'í Saul yá naal'a'í, t'áá shił tádí'aashgo díí jį́į́góó yoołkááł áádóó nináháháahgo hoolzhish, áko t'áá shich'į' dah diiyáádóó díísh jį́įjį' doo aaníinii doo ła' bá shił bééhoozin da.

⁴ Nidi Filístiya dine'é bindanit'a'í doo hasht'é'égóó hach'į' hashké daniidzį́į́' áádóó ádahodííniid, Díí diné nihééníł'á, áko kéyah baa dííní'ą́ yę́ęgóó nihéédoodááł; bíni'dii anaa'góó doo nihił jidoobah da, áko anaa'gi doo nihi'ana'í dooleeł da. Haash yit'éego binanit'a'í yił k'éná'ahididoo'niił? Doósh nihisiláo bitsiits'iin hizhdoołniiłígíí bee ákójíléeh da?

⁵ Da' díísh doo David át'į́į da? Éí baa hoł dahózhǫ́ǫgo da'jilzhishgo dahojitaałgo kódabizhdííniid, Saul éí damíilgo neistseed, índa David éí neeznáá damííl biláahgo neistseed.

⁶ Ákohgo Éíkish éí David hágo yidííniidgo ííłní, Ts'ídá t'áá aaníí Bóhólníihii hiná; ákót'éego ts'ídá t'áá aaníí t'áá ákóne' ánít'į́, índa hidínááhgóó ts'ídá nizhónígo shinááł shił anaa' áníł'į́, háálá yoołkááłdę́ę́' shéíníyáádóó díí jį́įjį' doo aaníinii ts'ídá t'áadoo ła' ná shił bééhoozin da. Azhą́ ákót'ée nidi naat'áanii danilíinii doo nich'ijí na'astą́ą da.

⁷ Nílááh, t'óó náádááł; nił hózhǫ́ǫgo náádááł, áko Filístiya dine'é bindanit'a'í bił dahoníshǫ́ǫgo yá'át'ééh.

⁸ Áádóó David éí Éíkish ábizhdííniid, Haashą' yít'įįd? Yoołkááłdę́ę́' nił naash'aashgo díí jį́įdi ha'át'íí ná naal'a'í bá nił bééhoozin? Bóhonishníihii aláahgo naat'áanii nílíinii, ha'át'éegoshą' ni'ana'í doo bił da'ahideeshgą́ął da?

⁹ Áko Éíkish éí David ánéídoo'niid, Diyin God bidiyingo naal'a'í nahonílingo shinááł ts'ídá t'áadoo bee nik'íhót'ahí daígíí shił bééhózin, nidi Filístiya dine'é bindanit'a'í ádaaní, Anaa'góó doo nihił dajidoobah da.

¹⁰ Ákohgo t'áá íiyisí yikáíhdą́ą́' ninanit'a'í bá nidaal'a'í nił yíkaígíí ch'éédaasdzidgo ałtso hoos'įįdgo dah nídidoohkah.

¹¹ Áko David éí diné bił nijikaígíí t'ah abíínídą́ą́' ch'éédaasdzidgo Filístiya dine'é bikéyahgóó aníjookai. Nidi Filístiya dine'é éí Jézriyel nahós'a' góde dah diiná.