I SAMUEL 26 - Navajo Bible

Zif honoojíidi David éí Saul t'áadoo yiyiisxį́į da

¹ Ákohgo Gíbiyah kin haal'áagi Saul nijigháago Zif honoojí dine'é danilíinii ła' haa yíkaigo ádaaní, Ts'ídá t'áá aaníí Jiisháíman honoojíijigo Hakíílah yanáalk'idígi David nant'in.

² Ákohgo Saul dah diiyáago Ízrel dine'é bitahdóó diné táadi míilgo néidiinilgo Zif honoojíígóó yił yíkai; Zif honoojíidi David hádazhdídóo' įįł biniyé ádajit'į́.

³ Áko Jiisháíman honoojíijigo Hakíílah yanáalk'idgi atiin bąąhgóó Saul bisiláo yił dah yinééł. Nidi David éí honoojíidi nijigháago honoojíígóó Saul hakéé' heedzáago baa ákozniizį́į́'.

⁴ Éí bąą David éí naalchi'í ákǫ́ǫ́ adziis'a'go Saul t'áá aaníí níyáá lágo hoł bééhoozin.

⁵ Áádóó David dashdiiyáago Saul ninínánígóó jiníyá, áádóó David éí Saul índa Ner biye' Ábner siláo yinanit'a'í nilíinii ał'ąą ałhoshgo dziiłtsą́. Dah oonéłígíí ałníi'gi Saul sitį́įgo siláo binadeel'á.

⁶ Ákohgo Ahímelek éí Het dine'é nilíinii áádóó Jó'ab bik'is Abísheiyai éí Zerowáíyah biyáázh nilíinii David ábidííniid, Háishą' Saul dah yinéłígóó shił doo'ash? Áko Abísheiyai ání, Shí ákóyaa nił deesh'ash.

⁷ T'áá éí bitł'éé' David áádóó Abísheiyai t'áá ájíłah siláo dah yinéłí góyaa jiní'áázh. Áko dah oonéłígíí ałníi'gi Saul ałhoshgo bitsiidétáán bits'iiyahgi łeeh yí'á. Áko hanaagóó siláo éí Ábner yił shijéé'.

⁸ Ákohgo Abísheiyai éí David áyidííniid, Díí jį́ Diyin God éí ni'ana'í nilíinii nílák'ee yidíí'ą́ą́ lá; éí bąą k'ad, haa'íyee' t'ááłáhídi ni'jį' tsiidétáán bee bighá'níshxíísh, baa nánooshkąąh, áko doo naakidi adooleeł da.

⁹ Nidi David éí Abísheiyai áyidííniid, Doo atídíílíił da, háálá Bóhólníihii ak'ah yik'i yayiiziidgo yiyíísį́į'iishą' háí atíjiilaago doo ádihozhdiilt'i' da doo?

¹⁰ Áko David ádííniid, Ts'ídá t'áá aaníí Bóhólníihii hiná; ákót'éego ts'ídá t'áá aaníí Bóhólníihii hodiyoołhééł, doodaii' dazhdootsaałjį' ahwíidoołkááł, doodaii' anaa' baa na'aldeehgóó jidoogáałgo dazdootsaał.

¹¹ Bóhólníihii ak'ah yik'i yayiiziidgo yiyíísį́'ígíí bik'ijį' nishłį́įgo atídeeshłíłígíí doo yee shá has'ą́ą da, nidi tsiidétáán bits'iiyah sitánígíí nídidíítį́į́ł, baa nánooshkąąh, áádóó tóshjeeh ałdó' bits'ą́ą́' nídidíí'áałgo t'óó néit'ash dooleeł.

¹² Ákohgo David éí tsiidétáán áádóó tóshjeeh Saul bits'iiyah sinil yę́ę nízhdiinilgo dah nízhdiit'áázh. Diné t'áadoo ła' hoołtsą́ą da, t'áadoo ła' hóónii' da, índa t'áadoo ła' ch'énádzidí da, háálá Bóhólníihii bíniik'ehgo t'áá íiyisí da'jiiłhaazh lá.

¹³ Áko David éí yíldzisígíí ha'naa nizhníyáago hata'gi ayóó ánízáadgo dah yisk'id léi' bighą́ą'jį' hajiyá.

¹⁴ Áádóó David éí diné yich'į' hadoolghaazhgo Ner biye' Ábner áyidííniid, Ábner, doósh hadíídzih da? Áko Ábner haadzíi'go ání, Háishą' ánít'į́įgo aláahgo naat'áanii bich'į' dílwosh?

¹⁵ Áko David éí Ábner áyidííniid, Da' doósh diné doo nánílyéesii nílį́į da? Háishą' nigi át'éego Ízrel dine'é yitahdóó ayóó át'é? Ha'át'éegoshą' ninanit'a'í aláahgo naat'áanii nilíinii doo bik'i ha'ídííníl'į́į' da? Háálá diné ła' éí ninanit'a'í aláahgo naat'áanii yidiyoołhééł yiniyé nich'į' niníyáá nít'éé'.

¹⁶ Ákónít'į́įgo éí doo yá'át'éeh da, ts'ídá t'áá aaníí Bóhólníihii hiná; ákót'éego ts'ídá t'áá aaníí aniné t'éí bąąh anohłį́į doogo át'é, háálá ninanit'a'í éí Bóhólníihii ak'ah yik'i yayiiziidgo yiyíísį́'ígíí doo bik'i ha'adííníl'į́į' da. Jó, k'ad aláahgo naat'áanii bitsiidétáán áádóó tóshjeeh bits'iiyah sinil yę́ęgi díní'į́į́'.

¹⁷ Saul éí David biinéé' yééhoosįįdgo ání, Shiye' David niísh ádíní? Áko David ádííniid, Aoo', bóhonishníihii aláahgo naat'áanii nílíinii, shí ádíshní.

¹⁸ Áko ánáázhdoo'niid, Shinanit'a'í nílíinii, ha'át'íishą' biniyé ná naal'a'í nishłį́įgo shikéé' nahídá? Haashą' yisdzaa? Ha'át'íí doo yá'áshóonii shį́įshą' baa niséyá?

¹⁹ Éí bąą k'ad nánooshkąąh, bóhonishníihii aláahgo naat'áanii, ná naal'a'í nishłį́įgo shizaad diits' į́į́h. Bóhólníihii naniiłáago shidinilkaalgo éí háni'dii nááhániihii néidiilé, nidi diné ahijoolchíiłii t'éí ádajit'į́įgo éí Bóhólníihii binááł hóyée'go há ha'doodzih, háálá díí jį́ ch'ídashineeshchą́ą'go Bóhólníihii bił haz'áanii doo shíí' dooleeł da biniyé ádashiłní, Nílááh, diyin dabidi'níinii bich'į' nahółá.

²⁰ Éí bąą k'ad, Bóhólníihii binááł nahasdzáán bikáa'gi doo shidił doonah da, háálá dziłghą́ą́'góó dééłdánii hazhnitáhígi át'éego Ízrel dine'é aláahgo binanit'a'í éí łééchąą'í biya' haintá nahalingo shíkantá.

²¹ Saul ádííniid, Ádił asésiih, shiye' David, shaa nánídááh; doo haada náándeeshdlíił da, háálá she'iina' ílį́įgo baa nitsíníkees lá. Jó, shí éí doo áháshyą́ą da áádóó ina'ashło'go baa naashá.

²² Áko David hanáánáádzíi'go ání, Kodi aláahgo naat'áanii bitsiidétáán naashtin, háni'dii dinééh ániid naagháii ła' yaa doogáałgo néididootį́į́ł.

²³ Bóhólníihii éí t'ááłá'í jinítínígo ts'ídá t'áá ákogi ádajít'éego índa hada'ahódlíigo ádajíít'įįdígíí hach'į' nidi'yoolééł, háálá díí jį́ Bóhólníihii shílák'ee nihidíí'ą́. Áko Bóhólníihii ak'ah yik'i yayiiziidgo ats'áiníłtíinii doo atídeeshłíił da.

²⁴ Jó, díí jį́ ne'iina' ts'ídá ílį́įgo baa nitséskeesígi át'éego she'iina' ałdó' ts'ídá ílį́įgo Bóhólníihii shaa nitsíkees le', áádóó ayóó át'éego ti'hoo'níhígíí t'áá ałtso bits'ą́ąjį' yisdáshiiłteeh le'.

²⁵ Áko Saul éí David áyidííniid, Shiye' David nílíinii, nik'ihojidlíi doo, ayóó ádaat'éii t'óó ahayóí áálíił doo áádóó ałdó' ak'eh dinídlį́į dooleeł. Ákohgo David dah nídiidzá, áádóó Saul ałdó' bikéyahgóó anáádzá.