I SAMUEL 22 - Navajo Bible

¹ Éí bąą David áádóó dashdiiyáago Adálam kin haal'á bíighahgi tsé'áán góne' ajoolwod, áko hak'isóó danilíinii índa hazhé'é bighandóó danilíinii t'áá ałtso haa dahodiizts'ą́ą'go ákǫ́ǫ́ hach'į' aheeskai.

² Áko diné bich'į' nidahwii'náanii áádóó bąąh hadaaz'áii índa Saul binahat'a' doo bił yá'ádaat'éehii t'áá ałtso haa haaskaigo binanit'a'í dzizlį́į́'. Áko diné dį́įdi neeznádiin daats'í bił nijikai.

³ Áádóó David dah náázdiidzáago Mó'ab kéyahgi Mízpeh kin haal'áajį' jiníyá, áádóó Mó'ab dine'é aláahgo binanit'a'í ábizhdííniid, Nánooshkąąh, bíni' shimá áádóó shizhé'é kwe'é doo'ashgo Diyin God shá ádooníłígíí shił bééhoozinjį' kwe'é nił naháaztą́ą doo.

⁴ Áádóó Mó'ab dine'é aláahgo binanit'a'í baa ho'deet'eezhgo t'áá ákǫ́ǫ́ bił nidzíiztą́ą́ nít'éé'; David éí bidziilgo nahaz'ą́ągi nahont'indi nijighá.

⁵ Ákohgo Diyin God yá halne'ii Géed wolyéii David áyidííniid, T'áadoo t'óó nahont'ingi nanináhí, nidi dah diináahgo Júdah kéyahgóó dínááh. Áádóó David dashdiiyáago tsintahgo hodíłch'ildi Héíreth hoolyéegi jiníyá.

Saul éí Nob kin shijaa'gi nááda'iiłniihii neistseed

⁶ Saul éí díí yaa hodiizts'ą́ą́': David áádóó diné bił nijikaígíí yik'ídaaskai lá, (íídą́ą́' Gíbiyah kin haal'áadi Réímah nahós'a'gi Saul tsinyaagi dzizdáago hatsiidétáán dah jootį́įłgo há nidaal'a'í hanánaazį́).

⁷ Áádóó Saul éí bá nidaal'a'í binaagóó naazínígíí áyidííniid, Bénjamin dine'é nohłíinii, da'íísínółts'ą́ą́', da' t'ááłá'í nootínígo kéyah índa ch'il na'atł'o'ii k'éédílyéeh doogi Jésii biye' wolyéiísh nihaa hodidoo'ááł índa da' t'áásh ánółtso siláo miilgo binanit'a'í danohłį́įgo índa siláo neeznádiingo binanit'a'í danohłį́įgo ánihidoolííł?

⁸ Da' éísh biniinaa t'áá ánółtso shindahosoo'ą́? Shiye' nilíinii éí Jésii biye' yił aha'deet'ánígíí doo ła'da bee shił hoołne' da; t'áá łah dinołt'éhí nidi doo ła' shik'édí nohłį́į da, índa shiye' éí shá naal'a'í shik'ijį' nilį́įgo áyiilaago t'áadoo bee shił dahoołne' da, áko éí díí jį́į́góó atíshidoolíiłgo shaa naa'na'.

⁹ Áádóó Íídam dine'é jílíinii Dóweg joolyéii éí Saul bá nidaal'a'í yinanit'a'í nilį́įgo áhodííniid, Jésii biye' éí Nob kin shijaa'jį' Aháítab biye' Ahímelek yich'į' yigáałgo yiiłtsą́.

¹⁰ Áko éí Bóhólníihii bich'į' David yá sodoolzin, áádóó ch'iyáán ła' ya'níłtsood, índa Filístiya diné Goláíyath bidiltłish yeinítą́.

¹¹ Ákohgo aláahgo naat'áanii éí Aháítab biye' Ahímelek náá'iiłniihii áádóó Nob kin shijaa'gi hazhé'é bighandóó danilíinii t'áá ałtso éí náá'iiłniihii danilíinii bíká i'jííł'a', áádóó aláahgo naat'áanii yaa haaskai.

¹² Áádóó Saul ádííniid, Aháítab biye' nílíinii, shííníłts'ą́ą́'. Kǫ́ǫ́ naashá, bóhonishníihii, bizhdííniid.

¹³ Áko Saul áhodííniid, Ha'át'íishą' biniinaa ni áádóó Jésii biye' bił shinahosoo'ą́? Jó, bááh béíní' ą́, áádóó diltłish béínítą́ índa Diyin God bich'į' bá ná'iisíníkango éí díí jį́į́góó atíshidoolíiłgo shaa naa'na'.

¹⁴ Áko Ahímelek éí aláahgo naat'áanii áyidííniid, Háishą' t'áá aaníí David ba'ahódlíii aláahgo naat'áanii yaadaaní nilínígi át'éego ná nidaal'a'í bitahgi ba'ahódlí? Áádóó naa ádahalyáanii yinanit'a'í nilį́, índa nighan góne' ił nilį́.

¹⁵ Da' t'áásh éí t'éí Diyin God bich'į' bá ná'iisiskan? Doodayéii, háni'dii aláahgo naat'áanii bá naal'a'í nishłíinii, doodaii' shizhé'é bighandóó danilíinii t'áá ałtso doo yá'át'éehii doo ła' ádá nihił béédahózin da, áko shí t'éí díí t'áá kóníshéhígo shił bééhózin.

¹⁶ Áko aláahgo naat'áanii áhodííniid, Ni Ahímelek índa nizhé'é bighandóó danilíinii t'áádóo nídí t'áá ánółtso dínóohnééł.

¹⁷ Áko aláahgo naat'áanii binaagóó bisiláo naazínígíí áyidííniid, Nídaahisgo, Bóhólníihii binááda'iiłniihii nidaałtseed, háálá David yich'ą́ą́h nidaakai, índa yóó'eelwodgo t'áadoo yee shił dahoolne' da. Nidi aláahgo naat'áanii bá nidaal'a'í éí Bóhólníihii binááda'iiłniihii t'áadoo nideistseed da.

¹⁸ Áádóó aláahgo naat'áanii éí Dóweg áyidííniid, Náhínáahgo, nááda'iiłniihii naniłtsxeed. Áko éí bijį́ Íídamdóó diné Dóweg názyizgo nááda'iiłniihii éí íífad wolyéii na'at'ą́hí łigaii dits'idgo ályaii yee hadadít'éhígíí tsebídiindóó ba'aan ashdla' yilt'éego neistseed.

¹⁹ Áádóó Nob kin shijaa'gi nááda'iiłniihii bikin haal'áhídi diné áádóó asdzání áádóó áłchíní áádóó t'ah da'ałt'o'ígíí áádóó béégashii, télii índa dibé ałtso diltłish bee nidzistseed.

²⁰ Nidi Aháítab biye' Ahímelek wolyéii biye' ła' Abáíyathar wolyéego éí yisdáálwodgo David yikéé' eelwod.

²¹ Áko Abáíyathar éí David bił hojoolne'go ájíní, Saul éí Bóhólníihii binááda'iiłniihii neistseed.

²² Áádóó David éí Abáíyathar áyidííniid, Íídamdóó diné Dóweg hoołtsą́ bijį́į́dą́ą́' t'áá íídą́ą́' t'áá aaníí Saul bił hozhdoolnih lą́ą niizį́į́'. Shiniinaa nizhé'é bighandóó danilíinii t'áá ałtso nidaaztseed.

²³ T'áá kǫ́ǫ́ shił nani'aash, t'áadoo nił yé'í, háálá shizéé' yidoot'įįłii ni ałdó' nizéé' yidoot'įįł, nidi shił nani'aashgo éí nidziih doo.