I SAMUEL 20 - Navajo Bible

David áádóó Jánathan ałch'oo'ní

¹ Áádóó Réímah nahós'a'gi Néíyathdóó David dah náázhdíníichą́ą'go Jánathan baazhníyáago ábizhdííniid, Haa lá yít'įįd? Ha'át'íísh bee doo ákwii íít'įįd da? Índa nizhé'é binááłshą' ha' át'íí bee ádił ni'iisíihgo biniinaa hodiyeeshxééł shó'ní?

² Áko áhodííniid, Dooda lą́ą! Doo dadíítsaał da. Jó, shizhé'é éí ha'át'íida ayóó át'éii, doodaii' áłts'ísígo át'éii t'áadoo yee shił halne'é doo áyóle' át'ée da, áko ha'át'íí biniyé shizhé'é díí shits'ąą neinił'in doo? Dooyee' ákót'į́į da.

³ Áádóó David ánáádoo'niidgo ání, Nizhé'é ts'ídá t'áá yíní át'éego bił bééhózingo éí ajooba' bee shich'oninéego shaa nitsíníkeesígíí bąą ání, Háni'dii Jánathan díí doo bił bééhózin da le', doodago éí yínííł dooleeł. Nidi ts'ídá t'áá aaníí Bóhólníihii hiná, índa ni ałdó' hiníná; ákót'éego dadeestsaałjį' t'ááłáhídi nináádi'dooltał hadziih.

⁴ Ákohgo Jánathan éí David áyidííniid, T'áá ha'át'íhída bídin nílį́įgo éí naa jooshba' doo.

⁵ Áko David éí Jánathan áyidííniid, Jó, yiską́ągo dah yiitįįh; aláahgo naat'áanii bikáá' adání bich'į' bił dah dínéeshkeełgo doo deesih da, nidi shíni' yishááł, táá' yiską́ą́dóó hiłiijį́įjį' hootsotahgi nídideesht'į́į́ł.

⁶ Nizhé'é shíhoosa' ládą́ą́' kóbijiniih, David ts'ídá haleebee náshookąąhgo badi'ní'ą́ągo Béthlehem t'áá bí bikin shijaa'ígóó anáádzá, háálá t'áá nínáhah bik'eh bik'éí t'áá ałtso náá'iiniih bá néit'aah.

⁷ Yá'át'ééh lą́ą, dííniidgo éí ná naal'a'í bił hózhǫ́ǫ doo, nidi t'áá íiyisí báhóóchįįdgo éí t'áá aaníí doo yá'át'ééhgóó shąąh tsídookos.

⁸ Éí bąą ná naal'a'í t'áá íiyisí baa jiiníbaah, háálá Bóhólníihii binááł bee aha'deet'áanii bee ná naal'a'í bił aha'díínít'ą́. Nidi doo ákwii é'ét'éii shii' hólǫ́ǫgo t'áá ni shidiyííłhééł; ha'át'íísh ałdó' biniyé nizhé'é bich'į' shił díí'ash?

⁹ Áádóó Jánathan áhodííniid, Doo ákóndi'doolníił da! Háálá ts'ídá t'áá yíní át'éegi shił bééhózingo shizhé'é doo yá'át'éhígi ándoolíiłgo doósh nił hodeeshnih da?

¹⁰ Ákohgo David éí Jánathan ábijiní, Nizhé'é t'áá na'níle'dii nich'į' haadzíi'goshą', éí háí shił hodoolnih?

¹¹ Áádóó Jánathan éí David áyidííniid, Tį', hootsogóó diit'ash. Áko t'áá ájíłah ákǫ́ǫ́ jiní'áázh.

¹² Áko Jánathan éí David áyidííniid, Ízrel biBóhólníihii Diyin God binááł! Yiską́ągo, doodaii' naakiiską́ągo t'áá kwe'é nahalzhiishgo shizhé'é naa nitsíkeesígíí shił bééhodoozįįł; ákohgo yá'át'éehgo naa nitsíkees ládą́ą́' doósh nił nínáhodeeshnih da?

¹³ Nidi nits'ąą díníł'į́į'go Bóhólníihii éí Jánathan yinishyéii atíshidoolííł, áádóó t'ah yówehígi át'éego shich'į' áhodoonííł. Shizhé'é ts'ídá atínídoolííł t'éí yaa nitsíkeesgo éí bee nił hodeeshnih áádóó háájída andeesh'aałgo hózhǫ́ǫgo nanináa doo. Áko Bóhólníihii éí shizhé'é yił hólǫ́ǫ́ nít'éé' yę́ęgi át'éego nił hólǫ́ǫ doo.

¹⁴ T'ah hinishnáago Bóhólníihii bee ajooba' yee ayóó'ó'ó'níinii doo t'áá shí t'éí shił bééhózingo ádíílíił da, ákót'éego doo dadeestsaał da.

¹⁵ Áko ne'ajooba'ii sha'áłchíní náás ahoolchíiłii hool'áágóó doo bits'ą́ąjį' ádíílíił da. Bóhólníihii éí David bi'ana'í t'ááłá'í nítínígo nahasdzáán bikáa'gi áyoołdįįłgo doo nihits'ą́ąjį' kódíílíił da.

¹⁶ Jánathan éí bee aha'deet'áanii binahjį' David ba'áłchíní yił ahada'deest'ą́ągo ání, Háni' Bóhólníihii éí David bi'ana'í k'éididoodlííł.

¹⁷ Áko Jánathan binahjį' David ádee hanááyiyííłdzíí', háálá ayóó'ájó'ní; jó, t'áá hó hwii' sizíinii ayóó'ájó'nínígi át'éego David ayóó'ájó'ní.

¹⁸ Áádóó Jánathan éí David áyidííniid, Yiską́ągo dah yiitįįh; dah nánídaah yę́ęgi doo dah sínídáágóó nídahozdoosah.

¹⁹ Táá' yiską́ągo díí baa nídiildee'go ts'ídá tsxį́įłgo nídidíít'į́į́łgóó díínááł, áádóó Íízel tsé si'ánígi shiba' sínídáa doo.

²⁰ Áko índa k'aa' táa'go bee yínísht'óóh nahalingo t'óó bíighah góne' bee iizhdiyeesht'oh.

²¹ Áádóó, shoo, ákǫ́ǫ́ ashkii deesh'aałgo, Nílááh, k'aa' náhílááh, bidideeshniił. Áádóó ashkii ánáábidideeshniił, Shoo, k'aa' wóshch'ishjígo ahineezdee'; náhílááh, bidííniidgo áádę́ę́' ch'ídíínááł; nich'į' k'é hólǫ́ǫgo t'áadoo atínóle'ígóó hinínáa doo; ts'ídá t'áá aaníí Bóhólníihii hiná; ákót'éego hinínáa doo.

²² Nidi ashkii, K'aa' niláahdi ahineezdee', bidííniidgo éí nílááh yínáał doo, háálá Bóhólníihii ákǫ́ǫ́ anííł'a' doo.

²³ Jó, bee ahadi'niit'ą́ągo ałch'į' bee haiidzíi'ii bídéét'i'go ádíshní, Bóhólníihii nihita'gi hool'áágóó hólǫ́ǫ le'.

²⁴ Áko hootsogi David nídeest'į́į́', áádóó dah yiitą́ągo aláahgo naat'áanii adooyį́į́ł yiniyé dah neezdá.

²⁵ Áádóó bee nástł'ahjí aláahgo naat'áanii dah nánídaahígi dah neezdá, áádóó Jánathan yiizį', áádóó Ábner éí Saul bíighahgi dah neezdá; David dah nánídaah yę́ęgi éí doo naagháhí da.

²⁶ Nidi éí bijį́į́dą́ą́' Saul éí doo ha'át'íhída dííniid da, háálá íinízin, T'áadoo le'égi daats'í hach'į' áhóót'įįd. Jó, t'óó haa'ih; t'áá aaníí, t'óó haa'ih, nízin.

²⁷ Áádóó biiskání naaki jį́į́ góne' David dah nánídaah yę́ęgi t'áá bíni' nááhást'ą́. Áko índa Saul biye' Jánathan nayídééłkidgo ání, Ha'át'éegoshą' Jésii biye' adą́ą́dą́ą́' áádóó jį́į́dą́ą́' nída'iidį́įhgi t'áadoo níyáa da?

²⁸ Áádóó Jánathan éí Saul yich'į' haadzíi'go ání, David éí haleebee náshoohkąąhgo Béthlehem kin shijaa'góó bi'níłnii',

²⁹ David kóníigo bąą, Shíni'dii yishááł, baa nánooshkąąh, háálá shik'éí éí kin shijaa'gi náá'iiniih dayiił'aah, índa shínaaí áadi nanináa doo, shidííniid. Áko k'ad ajooba' bee shich'oninéego shaa nitsíníkees ládą́ą́', háni'dii shínaaíké nídeideestsééł biniyé ákǫ́ǫ́ deeshááł. Díí biniinaa aláahgo naat'áanii ná'ádįįhgi David doo nádáah da.

³⁰ Áádóó Saul éí yik'ee nídiiltáalgo Jánathan yich'į' báhóóchįįdgo áyidííniid, Asdzání be'ádíláahgo naalteehii biyáázh nílíinii, da' doósh shił bééhózin da, t'óó baa yáhásinígi át'éego Jésii biye' nídiniłtį́, índa nimá nidi t'óó baa yáhásinígi át'éego t'áá ákohígo nííníłt'e'?

³¹ T'áá nahasdzáán bikáá' Jésii biye' hináago ni índa aláahgo naat'áanii nílį́įgo bee níhólníihgo bił haz'áanii doo chánah dooleeł da. Éí bąą bíká i'dííł'aałgo shich'į' nidahodoohłóós, háálá t'áá aaníí dazdootsaał.

³² Áádóó Jánathan éí bizhé'é Saul áyidííniid, Ha'át'íishą' biniinaa hodi'yoolyééł? Haash jíít'įįd?

³³ Áádóó Saul éí tsiidétáán yee hwííníisi', áko Jánathan hoł bééhoozin, hazhé'é éí David ts'ídá diyoolyéłí, yó'níí lá.

³⁴ Áko Jánathan éí t'óó báhádzidgo báhóóchįįdgo bikáá' adání si'ánídóó nídii'na' áádóó naaki jį́į́ góne' t'áadoo ajííyą́ą' da, háálá David baa yínííł dzizlį́į́'; jó, hazhé'é éí David t'óó baa yáhásinígi áyííł'įįd.

³⁵ Áádóó t'ah abínídą́ą́' Jánathan éí hootsogi David bá nihozhní'áníjį' ashkii yázhí bił jiní'áázh.

³⁶ Áádóó ashkii ábizhdííniid, K'aa' bee adizhyeesht'ohígíí nááhidííla biniyé ákǫ́ǫ́ nídidíílwoł. Áko ashkii nídiilwodgo k'aa' bee biláahjį' iidziist'oh.

³⁷ Áádóó ashkii éí Jánathan k'aa' yee adziist'ohíjį' yílwodgo Jánathan ábidííniid, Da' niláahdiísh k'aa' doo ahineezdee' da?

³⁸ Áádóó Jánathan éí ashkii bíká ázhdííniid, Tsxį́įłgo, nánílyeed; t'áadoo t'áá aadi nanináhí! Áko Jánathan be'ashkii éí k'aa' náyiizláá' áádóó binanit'a'í yaa nálwod.

³⁹ Nidi díí biniyé áhóót'įįdígíí ashkii doo bił bééhózin da; Jánathan áádóó David t'éiyá bił bééhózin.

⁴⁰ Áko Jánathan hak'aayééł éí ashkii baazhnínilgo ábijiní, Nílááh, kin haal'áágóó díjááh.

⁴¹ Áádóó ashkii dah diilwodgo t'áá áko shádi'ááh bich'ijígo David nízhdii'na' áádóó ni'jį' nitsizhdinígo'go táadi yaa áńdziidzaa áádóó ahidiníłnáago ahidzizts'ǫs índa David yéego hajííchxago ahaa jíícha.

⁴² Ákohgo Jánathan éí David áyidííniid, Nílááh, hózhǫ́ǫgo yínááł le', shą́ą́' Bóhólníihii bízhi' binahjį' t'áá ákót'éego ałhadi'niit'áani', Bóhólníihii nihita'gi hólǫ́ǫ doo, índa shéélchíín áádóó néélchíín bita'gi hool'áágóó hólǫ́ǫ doo. Áádóó nízhdii'na'go dashdiiyá; Jánathan éí kin haal'áágóó anáádzá.