I SAMUEL 2 - Navajo Bible

Hánnah biyiin

¹ Áko Hánnah sozdoolzingo ájíní, Dooládó' shijéí bee Bóhólníihii t'áá íiyisí baa shił nihoozhǫǫh da; Bóhólníihii bee shidziil sélį́į́'. Shide ádeinízinii t'óó bá nahasht'i', háálá nibee yisdá'iildéehii t'áá íiyisí baa shił nihoozhǫǫh.

² Bóhólníihiigi át'éego doo ła' náádíyin da, háálá nigi át'éii doo ła' nááhódlǫ́ǫ da; nihiDiyin God éí tsé bine' na'adzi'ígi át'éego doo ła' nááhódlǫ́ǫ da.

³ T'áadoo ayóó át'éego ádaa hó'niihgo yáníłti'í; t'áadoo ádaa hodzódlí bee hahídziihí, háálá Bóhólníihii Diyin God t'áá ałtsoní bił bééhózin, áádóó bí t'éiyá baa nida'aldeehígíí t'áá ákóne' yeinít'į́.

⁴ Diné ayóó ádaat'éii be'ałtį́į́' nidahaastǫ', áádóó bijáyah da'nijilii bidziilgo áńdeidle'.

⁵ T'áadoo bídin dajílíní da yę́ę k'ad éí t'áá bídin hóyée'go da'jiyą́, nidi dichin danilį́į́ nít'éé' yę́ę éí doo dichin danilį́į da daazlį́į́'. Doo ałchíii yę́ę ba'áłchíní tsosts'id hazlį́į́', nidi ła' ba'áłchíní t'óó ahayóí yę́ę éí doo ałchíi da silį́į́'.

⁶ Bóhólníihii na'ałtseed áádóó hinááh áńda'adle'; jishcháa'jį' i'iiłnííh áádóó jishcháá'dę́ę́' náá'di'yiiłjeeh.

⁷ Bóhólníihii éí ahojoobá'ígo ó'oolííł, áádóó at'į́įgo ałdó' ó'oolííł, ayáhígo ó'oolííł, áádóó ayóó é'ét'éego ałdó' ó'oolííł.

⁸ Ayóó ádaat'éii yił dah naháaztą́ą doo biniyé áádóó bikáá'dóó nahat'áii bits'ádi'nílíidii bíí' dadooleeł biniyé badahojoobá'íii éí łeezh dibahí bits'ą́ą́dę́ę́' náyiilááh áádóó da'dókeedii éí chąą' biłeeshch'iih tahdę́ę́' hááyii'nííł, háálá nahasdzáán bee niłdzilii éí Bóhólníihii bíí', áádóó éí bikáa'gi nahasdzáán niiní'ą́.

⁹ Bidiyį́į́' danilíinii deíkááhgóó yaa áhályą́, nidi doo yá'ádaashóonii éí chahałheeł yii' dadéesxéel doo, háálá diné bibee adziilii doo yee ak'eh doodleeł da.

¹⁰ Bóhólníihii bi'ana'í danilíinii deididooséí; yá'ąąshdę́ę́' ii'ni' nahalingo hach'į' hadoodzih. Bóhólníihii éí nahasdzáán nidahonees'ą́ąjį' aa nídóot'įįł, áádóó bee adziilii éí há aláahgo naat'áanii nilíinii yeididoo'ááł, áko t'áá hó ak'ah bik'i yajiidziidii ayóó át'éego ázhdoolííł.

¹¹ Áko Elkéínah dah nízdiidzáago Réímah kin shijaa'ídi haghangi nídzídzá. Áádóó ashkii Sámuel éí náá'iiłniihii Íílai binááł Bóhólníihii yá nihidiil'a'.

Íílai ba'áłchíní bik'ijį' ha'oodzíí'

¹² Áko Íílai biye'ké éí diné doo yá'áshóonii nilį́; Bóhólníihii doo yééhósin da.

¹³ Íídą́ą́' nááda'iiłniihii éí kót'éego diné yá áda'ał'į́į́ nít'éé': t'áá háiida náá'iiłniihgo náá'iiłniihii binaal'a'í nilíinii bíla'táa'ii nineezígíí yootį́įłgo yighááh, áko atsį' yibéezhgo

¹⁴ tsee'í, doodaii' ásaa' nímazí, doodaii' ásaatsoh, doodaii' ásaa' éí bíla'táa'ii yee yiih atsihgo atsį' t'áá át'é hayé'áłtsihígíí éí náá'iiłniihii bíí' yileeh. Sháíloh haz'ánídi Ízrel dine'é t'áá ałtso nehekáhígíí ákódeiił'į́į́ nít'éé'.

¹⁵ Ákohgo atsį' bąąh ak'ahígíí t'ah doo didlidgóó náá'iiłniihii binaal'a'í yighááh áádóó diné náá'iiłniihígíí ááhyiłniih, Atsį' éí náá'iiłniihii ła' bá doolt'isígíí baa diní'aah, háálá atsį' shibézhígíí éí doo yinízin da; t'áá t'éehgo t'éiyá yinízin.

¹⁶ Áko diné ła' áhodííniidgo ání, Bíni'dii ak'ahígíí átsé dadidlid, áko índa t'áá nínízinígi ánéelt'e'go bá nídidíínił, hałniih, nidi ábijiniih, Dooda, t'áá k'ad shaa diní'aah; éí doodago t'áá shizááká nídideesh'ááł.

¹⁷ Éí bąą díí dinééh nidilt'éego Bóhólníihii binááł ayóó át'éego ádił ni'iisíí', háálá Ízrel dine'é éí Bóhólníihii yich'į' nááda'iiłniihgo t'áá íiyisí ák'eh dahal'į́ daazlį́į́'.

¹⁸ Nidi Sámuel éí t'ahdii ashkii yázhí nilį́įgo Bóhólníihii yá naal'a'; yisdizígíí bee na'at'ą́hí łigaii dits'idgo ályaii bee íífad wolyéii yił ákászaaz.

¹⁹ Áádóó Sámuel hamá éí éétsoh yázhí há ánáyiil'įįhgo haa néíłtsos; t'áá nináháhááh bik'eh Hánnah áádóó hahastiin bił náázhdi'yoołnihgóó ałnáájít'ashgo nááhidoonihii náájiiłniih.

²⁰ Ákohgo Íílai éí Elkéínah áádóó hwe'asdzą́ą́ yił yik'ijisdli'go ání, Bóhólníihii éí díí asdzání binahjį' áłchíní neidiyii'aahígíí Bóhólníihii baa nídinoo'áanii bitsásk'ehgi niha'áłchíní danilį́į doo. Áádóó haghangóó aníjoot'áázh.

²¹ Áko Bóhólníihii éí Hánnah yik'iníjídliih, áko Elkéínah bá anáz'niiltsąąhgo ashiiké tált'é índa at'ééké nidilt'é éí t'áá ałkéé' nijiishchį́. Áko Bóhólníihii binááł ashkii Sámuel noosééł.

²² Áko Íílai éí t'áá íiyisí hadzistih, áádóó haye'ké éí Ízrel dine'é t'áá ałtso yich'į' ááníłígíí baa hozdiizts'ą́ą́', ákót'éego níbaal bii' dahozdísinii bich'éédą́ą'gi asdzání nidaal'a' biniyé áłah nádleehígíí ła' bił názhníjahgo baa niji'aash lá.

²³ Áko Íílai haye'ké ábizhdííniid, Yáadishą' bąą t'óó nichxǫ́'ígi óht'į́. Diné t'áá ałtso bits'ą́ą́dóó t'óó baa'ihígi óht'į́įgo nihaa hodiists'a'.

²⁴ Dooda, shiye'ké, doo yá'áshónígi óht'į́įgo nihaa hane'go diists'a'. Bóhólníihii bidine'é bee haz'áanii dayiitíihgo íínóhsin lá.

²⁵ Diné ła'da diné náánáła' yich'į' ádił ni'iilzíihgo ánihwii'aahii haa nídóot'įįł, nidi diné ła' Bóhólníihii bich'į' ádił adzisiihgo háishą' há na'ak'íyádoołtih? Azhą́ haye'ké kóbizhdííniid nidi doo hwíists'ą́ą' da nít'éé', háálá Bóhólníihii áhodeeshdįįł, nízin.

²⁶ Áko ashkii Sámuel jinoosééł áádóó t'ááłáhígi át'éego hach'oha'níigo Bóhólníihii índa diné bił jílį́į́ nít'éé'.

²⁷ Áko Diyin God bits'ą́ą́dóó diné léi' Íílai yaa níyáago áyidííniid, Bóhólníihii kóní, Nizhé'é yę́ę bada'áłchíní Ííjip kéyahdi Féro yinaalte' danilį́ yę́ędą́ą́' bich'į' ííshjání í'diishyaa.

²⁸ Áádóó Ízrel dine'é t'áá ałtso bitahdóó shináá'iiłniihii jílį́į doo biniyé náhodiiłtį́įgo éí tsin bijeeh dilidgo łikání halchingo nááhániihii shibikáá' náá'iiniihí bikáa'jį' náájiiłniih doo índa shinááł íífad wolyéii bee hazhdít'ée doo. Áko nizhé'é yę́ę áádóó ba'áłchíní náás da'ahílchíihii éí didlidgo nááhániihii Ízrel dine'é baa diní'ą́.

²⁹ Áko ha'át'éegoshą' didlidgo nááhániihii áádóó nááhániihii bee nihoní'áanii doo nihił danilį́į́góó bik'i naahkai, áádóó ha'át'éegoshą' shiláahgo niye'ké nił yílįįdgo t'áá nihí ádadisinoołk'ahgo shidine'é Ízrel bits'ą́ą́dóó nááhániihii aláahgo ádaat'éii bídin óhnééh lá?

³⁰ Éí bąą Ízrel dine'é biBóhólníihii Diyin God kóní, Díí shí bee nihá nihoní'ą́ą ni': nidine'é áádóó nizhé'é yę́ę bidine'é shinááł naaldeehgo hool'áágóó shá nidaal'a' doo, nidi k'ad Bóhólníihii ání, K'ad t'áá ákódí doo; shił dajílínígíí éí hoł danishłį́, nidi doo dashinízinii doo hoł danishłį́į da.

³¹ Jó, bich'į' yoołkááł; nibee adziilii ádeeshdįįł índa nizhé'é yę́ę bidine'é bibee adziilii ádeeshdįįł, ákohgo nik'éí t'áadoo hadaatihí dadínóonééł.

³² Áko shiníbaal bii' hodílzinii biyi' éí nighahodidoot'áałii nił bééhodoozįįł; Diyin God éí Ízrel dine'é ts'ídá yá'ádaat'éehii yeidiní'ą́ą nidi ákóhodoonííł, áko nighandóó danilíinii bitahgi diné haastihii doo hólǫ́ǫ́góó ahool'áa doo.

³³ Áádóó bikáá' náá'iiniihí shíhígíí t'áadoo bits'ą́ąjį' nideestsiłígíí éí t'áá awołí bee daahchago índa nihijéí yínííł danilį́įgo ádayósin doo, áádóó nihik'éí t'ah tsíłkéí danilį́įgo dadínóonééł.

³⁴ Áko díí bee nich'į' ééhózin doo: éí niye' nidilt'éego bik'i hwiidooleeł, Háfnai áádóó Fíniyas t'áá ła'óo jį́ t'áá ájíłah jidínóonéé ł.

³⁵ Áádóó náá'iiłniihii ba'ahódlíii ádá nídideeshtéłígíí éí shijéí yinízinii áádóó baa nitséskeesii yik'eh hół'į́į doo, áádóó náás oochííłgóó shá naal'a' doo, índa ak'ah bik'i yaadziidgo yilzį́į'ii shíhígíí yinááł hináago ahool'áa doo.

³⁶ Áádóó éí ákódaadzaadóó nits'ą́ą́dóó yichíiłii daadzí'ígíí t'ááłá'í nítínígo yich'į' nitséédígohgo béésh łigaii ła' áádóó bááh ła' yíyókeed doo índa ádidooniił, Nánihooshkąąh, náá'iiłniihii binaanish danilíinii ła' shaa diní'aah, áko bááh ła' yishą́ą doo.