II SAMUEL 9 - Navajo Bible

David éí Miifíbosheth yaa joozba'

¹ Áádóó David ádííniid, Saul yę́ę ba'áłchíníísh t'ah ła' yidziih; éí Jánathan binahjį' baa jiideeshbaał.

² Nít'éé' Saul yę́ę ba'áłchíní bighandóó ła' naal'a'í nilį́į́ léi' Záíba wolyéé lá, áádóó David aláahgo naat'áanii bá hágo dahodííniidgo áhodííniid, Da' niísh Záíba yinílyé? Áádóó ábizhdííniid, Aoo', ná naal'a'í nishłį́įgo ásht'į́.

³ Áko aláahgo naat'áanii ádííniid, Saul yę́ę ba'áłchíní doósh ła' t'ah yidziih da? Éí Diyin God bibee ajooba' bee baa jiideeshbaał. Nít'éé' Záíba éí aláahgo naat'áanii áyidííniid, Jánathan yę́ę biye' ła' t'ah yidziih; éí na'niłhod.

⁴ Aláahgo naat'áanii áhodííniid, Háadish naaghá? Áádóó Záíba éí aláahgo naat'áanii áyidííniid, Shoo, Ló-dííbar kin shijaa'di Ámiyel biye' Méíkir yighandi sidá.

⁵ Áko aláahgo naat'áanii David éí dah adiił'a'go Ló-dííbar kin shijaa'di Ámiyel biye' Méíkir bighandę́ę́' hoł nídazhdookah biniyé i'jííł'a'.

⁶ Áádóó Jánathan yę́ę biye' Saul yę́ę binálí Miifíbosheth wolyéii David yaa níyáago yich'į' nitsideelgo'go ni'jį' tsé'yaa neeshjoolgo hodísin. Áádóó David áhodííniid, Miifíbosheth. Áko ájíní, Jó, ná naal'a'í nishłíinii ásht'į́.

⁷ David áhodííniid, T'áadoo nił yé'í. Jó, ts'ídá t'áádóo nídí naa jiideeshbaałgo Jánathan nizhé'é yę́ę bá ákóndeeshłííł, áádóó Saul ninálí yę́ę bikéyah nít'é'ígíí t'áá át'é naa dideesh'ááł áádóó shibikáá' adání bich'į' dah nánídaahgo ná'ídį́įhgo hoolzhish doo.

⁸ Áádóó yaa ádzaago ání, Ná naal'a'í nishłíinii, ha'át'íísh nishłį́? Jó, łééchąą'í daaztsáaniigi yee' ánísht'éego ayóogo shíninidlį́įgo shiníníł'į́.

⁹ Nít'éé' aláahgo naat'áanii éí Záíba hágo yidííniid, éí Saul yę́ę yá naal'a'í nilį́įgo ííłní, Bá nanil'a' yę́ę biye' baa diní'áanii éí Saul yę́ę bíí' nít'éé' yę́ę índa ba'áłchíní t'áá ałtso daabíí' nít'éé' yę́ę ałtso baa diní'ą́.

¹⁰ Éí bąą ni áádóó niye'ké índa ná nidaal'a'í dá'ák'eh bá nidahwiidiyoołdlałgo daneest'áanii yah adahidoohééł, áko bá nanil'a'í yę́ę biye' yidooyį́įłii hólǫ́ǫ doo. Nidi bá nanil'a'í yę́ę biye' Miifíbosheth éí shibikáá' adání yich'į' dah náńdaahgo t'áá áłahjį' ná'ádį́įh doo. Jó, Záíba éí biye' ashdla'áadah yilt'é índa bá nidaal'a'í éí naadiin yilt'é.

¹¹ Áko Záíba éí aláahgo naat'áanii áyidííniid, Bóhonishníihii aláahgo naat'áanii bá naal'a'í nishłį́įgo shich'į' yee hahaasdzí'ígíí t'áá ałtso bik'ehgo ná naal'a'í nishłíinii éí bik'eh ádeeshnííł. Jó, aláahgo naat'áanii ájíní, Miifíbosheth éí shibikáá' adání yich'į' dah náńdaahgo aláahgo naat'áanii biye'ké atah jílį́įgo bił nída'jidį́įh doo.

¹² Áádóó Miifíbosheth biye' dinééh nilį́, éí Máíka wolyé. Záíba bighangi kéédahat'ínígíí t'áá ałtso éí Miifíbosheth yá nidaal'a'.

¹³ Áko Miifíbosheth éí Jerúsalem kin haal'áagi kééhat'į́, háálá t'áá áłahjį' aláahgo naat'áanii bibikáá' adání yich'į' dah náńdaahgo ná'ádį́į́h, áádóó éí bikee' t'áá ałch'ijí yee na'niłhod.